ଦେଶକୁ ଇନ୍ଧନ ମାମଲାରେ ଆତ୍ମନିର୍ଭର କରିବା ପରିବେଶକୁ ସ୍ୱଚ୍ଛ ରଖିବା ଉଦ୍ଦେଶ୍ୟରେ ଭାରତରେ ଆନୁଷ୍ଠାନିକ ଭାବେ E85 ଫୁଏଲ୍ ଲଞ୍ଚ କରିଛି । ଏହି ନୂଆ ଇନ୍ଧନ କେବଳ ପରିବେଶ ଅନୁକୂଳ ହେବ ନାହିଁ ବରଂ ଆପଣଙ୍କ ଖର୍ଚ୍ଚକୁ ମଧ୍ୟ କମ କରିବ । ପେଟ୍ରୋଲିୟମ୍ ଏବଂ ପ୍ରାକୃତିକ ଗ୍ୟାସ ମନ୍ତ୍ରୀ ହରଦୀପ ପୁରୀଙ୍କ ଅନୁଯାୟୀ, ଏହା ବର୍ତ୍ତମାନର E20 ଇନ୍ଧନ ଅପେକ୍ଷା ଲିଟର ପିଛା ୨୦ ଟଙ୍କା ଶସ୍ତା ହେବ ।
Published By: Ajit – Prameya-News7 Bureau | June 05, 2026 09:52 PM
NEWS7
ନୂଆଦିଲ୍ଲୀ: ମଧ୍ୟପ୍ରାଚ୍ୟ ସଂଘର୍ଷ ଯୋଗୁଁ ବିଶ୍ୱବ୍ୟାପୀ ଅଶୋଧିତ ତୈଳ ମୂଲ୍ୟରେ ଲାଗାତାର ଅସ୍ଥିର ହୋଇ ରହିଛି । ଏହାରି ଭିତରେ ଭାରତ ନିଜ ଶକ୍ତି ସୁରକ୍ଷାକୁ ସୁଦୃଢ଼ କରିବା ପାଇଁ ଏକ ବଡ଼ ପଦକ୍ଷେପ ନେଇଛି । ଦେଶକୁ ଇନ୍ଧନ ମାମଲାରେ ଆତ୍ମନିର୍ଭର କରିବା ପରିବେଶକୁ ସ୍ୱଚ୍ଛ ରଖିବା ଉଦ୍ଦେଶ୍ୟରେ ଭାରତରେ ଆନୁଷ୍ଠାନିକ ଭାବେ E85 ଫୁଏଲ୍ ଲଞ୍ଚ କରିଛି । ଏହି ନୂଆ ଇନ୍ଧନ କେବଳ ପରିବେଶ ଅନୁକୂଳ ହେବ ନାହିଁ ବରଂ ଆପଣଙ୍କ ଖର୍ଚ୍ଚକୁ ମଧ୍ୟ କମ କରିବ । ପେଟ୍ରୋଲିୟମ୍ ଏବଂ ପ୍ରାକୃତିକ ଗ୍ୟାସ ମନ୍ତ୍ରୀ ହରଦୀପ ପୁରୀଙ୍କ ଅନୁଯାୟୀ, ଏହା ବର୍ତ୍ତମାନର E20 ଇନ୍ଧନ ଅପେକ୍ଷା ଲିଟର ପିଛା ୨୦ ଟଙ୍କା ଶସ୍ତା ହେବ ।
E85 ଏକ ସ୍ୱତନ୍ତ୍ର ପ୍ରକାର ପେଟ୍ରୋଲ ମିଶ୍ରଣ, ଏଥିରେ ପ୍ରାୟ ୮୦ରୁ ୮୫ ପ୍ରତିଶତ ଯାଏ ଇଥାନଲ୍ ମିଶ୍ରଣ କରାଯାଇଥାଏ । ଇଥାନଲ୍ ହେଉଛି ଏକ ଜୈବ ଇନ୍ଧନ ଯାହା ମୁଖ୍ୟତଃ କୃଷି ଉତ୍ପାଦ ଏବଂ ଏହା ସହ ଜଡ଼ିତ କଞ୍ଚାମାଲରୁ ଉତ୍ପାଦିତ ହୁଏ । ଭାରତ ପୂର୍ବରୁ E20 କିମ୍ବା ୨୦ ପ୍ରତିଶତ ଇଥାନଲ୍ ସହିତ ମିଶ୍ରିତ ପେଟ୍ରୋଲ ଆଡ଼କୁ ଗତି କରିଛି । E85 ଆରମ୍ଭ ହେବା ପରେ ଏହି ପଦକ୍ଷେପକୁ ପରବର୍ତ୍ତୀ ସ୍ତରକୁ ନେବାର ଏକ ପ୍ରୟାସ ଭାବରେ ଦେଖାଯାଉଛି ।
ଲଞ୍ଚିଂ ସମୟରେ ପେଟ୍ରୋଲିୟମ ସଚିବ ନୀରବ ମିତ୍ତଲ କହିଛନ୍ତି E85 ଫୁଏଲ୍ ବଜାରକୁ ଆସିବା ପରେ ଗାଡ଼ିରୁ ବାହାରୁଥିବା କ୍ଷତିକାରକ ଧୂଆଁ ଏବଂ ଅଙ୍ଗାରକାମ୍ଲ ନିର୍ଗମ ହ୍ରାସ ହେବ । ଏହି ଇନ୍ଧନ ବାୟୁ ପ୍ରଦୂଷଣ ଦୂର କରିବାରେ ସାହାଯ୍ୟ କରିବା ସହ ଗ୍ରାହକଙ୍କୁ ଇନ୍ଧନ ଚୟନ କରିବାର ନୂଆ ବିକଳ୍ପ ଦେବ ।
ସାଧାରଣ ଲୋକଙ୍କ ବଜେଟକୁ ଦୃଷ୍ଟିରେ ରଖି, ସରକାର ବର୍ତ୍ତମାନର E20 ଫୁଏଲ୍ ତୁଳନାରେ E85 ଇନ୍ଧନର ମୂଲ୍ୟ ଲିଟର ପିଛା ୨୦ ଟଙ୍କା ହ୍ରାସ କରିବାକୁ ନିଷ୍ପତ୍ତି ନେଇଛନ୍ତି । ପେଟ୍ରୋଲିୟମ୍ ସଚିବ କହିଛନ୍ତି ଯେ ଏହି ପଦକ୍ଷେପ ବିଦେଶୀ ଅଶୋଧିତ ତେଲ ଉପରେ ଭାରତର ନିର୍ଭରଶୀଳତାକୁ ଯଥେଷ୍ଟ ହ୍ରାସ କରିବ । ଭାରତ ବିଦେଶରୁ ତେଲ କିଣି ବାର୍ଷିକ କୋଟି କୋଟି ଡଲାର ଖର୍ଚ୍ଚ କରେ, କିନ୍ତୁ ବର୍ତ୍ତମାନ ଘରୋଇ ଭାବରେ ଉତ୍ପାଦିତ ଇଥାନଲ୍ ସହିତ ଆମେ ଗୁରୁତ୍ୱପୂର୍ଣ୍ଣ ସଞ୍ଚୟ କରିପାରିବୁ । ଏହି ଶୁଭାରମ୍ଭ କେନ୍ଦ୍ର ସରକାରଙ୍କ ବୃହତ ରଣନୀତିର ଏକ ଅଂଶ ଯାହା ଦେଶକୁ ଦ୍ରୁତ ଗତିରେ ସ୍ୱଚ୍ଛ ଏବଂ ସ୍ୱଦେଶୀ ଇନ୍ଧନରେ ପରିଣତ କରିବ ।
ଏହି ଇଥାନଲ୍ ମିଶନରେ ଦେଶର ଚାଷୀମାନେ ଏକ ପ୍ରମୁଖ ଭୂମିକା ଗ୍ରହଣ କରିବେ । ପେଟ୍ରୋଲିୟମ୍ ସଚିବ ନୀରଜ ମିତ୍ତଲ କହିଛନ୍ତି, ଭାରତର ଚାଷୀମାନେ ଏବେ କେବଳ “ଖାଦ୍ୟ ଯୋଗାଣକାରୀ” ନୁହଁନ୍ତି ବରଂ ଦେଶର “ଶକ୍ତି ଯୋଗାଣକାରୀ” ହେବାକୁ ଯାଉଛନ୍ତି । ଆଖୁ, ମକା ଏବଂ ଅନ୍ୟାନ୍ୟ କୃଷି ଅବଶିଷ୍ଟାଂଶରୁ ଇଥାନଲ୍ ଉତ୍ପାଦନ କରାଯାଏ । ଇଥାନଲର ଚାହିଦା ବଢ଼ିବା ସହିତ ଆମର ଚାଷୀଙ୍କ ଫସଲର ଚାହିଦା ମଧ୍ୟ ବଢ଼ିବ । ଏହା ଗ୍ରାମୀଣ ଭାରତରେ ପରିବର୍ତ୍ତନ ଆଣିବ, ଗ୍ରାମୀଣ ଅର୍ଥନୀତିକୁ ସୁଦୃଢ଼ କରିବ ଏବଂ ଚାଷୀଙ୍କ ଆୟରେ ଉଲ୍ଲେଖନୀୟ ବୃଦ୍ଧି କରିବ । ଏହା ଭାରତକୁ ଇନ୍ଧନ କ୍ଷେତ୍ରରେ ଆତ୍ମନିର୍ଭରଶୀଳ କରିବାର ଏକ ପଥ, ଯାହା ସମ୍ପୂର୍ଣ୍ଣ ଭାବରେ ଆମର ଚାଷୀଙ୍କ ହାତରେ ରହିବ ।
ଭାରତର ଶକ୍ତି କ୍ଷେତ୍ରରେ E85 ଇନ୍ଧନର ପ୍ରଚଳନକୁ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ଭାବରେ ଦେଖାଯାଉଛି । ସରକାର ଆଶା କରୁଛନ୍ତି ଯେ ଏହା କାର୍ବନ ନିର୍ଗମନକୁ ହ୍ରାସ କରିବ, ଶକ୍ତି ସୁରକ୍ଷାକୁ ସୁଦୃଢ଼ କରିବ ଏବଂ ଗ୍ରାମାଞ୍ଚଳକୁ ଆର୍ଥିକ ଲାଭ ପ୍ରଦାନ କରିବ।
