ଡାକ୍ତର ହେବା ଆଶାରେ ଯାଇଥିଲେ, ହେଲେ ନିଜେ ଶବ ହୋଇ ଫେରିବେ

ଦିଗପହଣ୍ଡି ୨୬।୧୦: ରାଜସ୍ଥାନ କୋଟାରେ ପୁଣି ଜଣେ ଓଡ଼ିଆ ଛାତ୍ରଙ୍କ ମୃତ୍ୟୁ । ନିଟ୍ କୋଚିଂ ନେଉଥିବା ଗଞ୍ଜାମ ଜିଲ୍ଲା ପାତ୍ରପୁର ବ୍ଲକ୍ ଅଭୟପୁର ଗାଁର ଛାତ୍ରଙ୍କ ସନ୍ଦେହଜନକ ମୃତ୍ୟୁ ହୋଇଛି । ନିଟ୍ କୋଚିଂ ନେବାପାଇଁ ସେ ରାଜସ୍ଥାନର କୋଟାକୁ ଯାଇଥିଲେ । ଛାତ୍ର ଜଣକ ପାତ୍ରପୁର ବ୍ଲକ୍ ଜରଡ଼ା ପଞ୍ଚାୟତ ଅଭୟପୁର ଗ୍ରାମର ରାଧେଶ୍ୟାମ ପାତ୍ରଙ୍କ ପୁଅ ରୋଶନ କୁମାର ପାତ୍ର ବୋଲି ଜଣାପଡିଛି ।

ସୂଚନାଯୋଗ୍ୟ ଯେ, ଗଞ୍ଜାମ ଜିଲ୍ଲା ପାତ୍ରପୁର ବ୍ଲକ୍ ଜରଡ଼ା ପଞ୍ଚାୟତ ଅଭୟପୁର ଗ୍ରାମର ରୋଶନ କୁମାର ପାତ୍ର ଗତ ବର୍ଷ ଠାରୁ କୋଟାରେ ରହି ଏକ ଅନୁଷ୍ଠାନରେ ନିଟ୍ ପାଇଁ କୋଚିଂ ନେଉଥିଲେ । ସେ ରହୁଥିବା ରୁମ୍‌ରେ ତାଙ୍କର ସନ୍ଦେହଜନକ ମୃତ୍ୟୁ ଘଟିଛି । ଏ ନେଇ ଖବର ପାଇ ତାଙ୍କ ବାପା ଏବଂ କକା କୋଟା ଅଭିମୁଖେ ବାହାରିଛନ୍ତି । ପରିବାର ଲୋକ ସେଠାରେ ପହଞ୍ଚିବା ପରେ ରୋଶନଙ୍କ ମୃତ୍ୟୁର କାରଣ ଜଣାପଡ଼ିବ ବୋଲି କୁହାଯାଉଛି ।