ଭୁବନେଶ୍ଵର: ଦକ୍ଷିଣ ଆଣ୍ଡାମାନ ସାଗରରେ ସୃଷ୍ଟି ହୋଥିବା ଲଘୁଚାପ ଆସନ୍ତା ୨୪ରେ ଅବପାତର ରୂପ ନେବା ସମ୍ଭାବନା । କିଛି ମଡେଲ୍ ଦର୍ଶାଇଛି ଏହା ୨୬ରେ ବାତ୍ୟାରେ ପରିଣତ ହେବା ଆଶଙ୍କା ରହିଛି। ସମ୍ଭାବ୍ୟ ବାତ୍ୟା ଆନ୍ଧ୍ର ଓ ଓଡ଼ିଶା ଉପକୂଳ ଆଡ଼କୁ ମୁହାଁଇବା ଆଶଙ୍କାକୁ ମଧ୍ୟ ଏଡ଼ାଇ ଦିଆଯାଇ ନପାରେ। ତେଣୁ ସମ୍ଭାବ୍ୟ ବାତ୍ୟାକୁ ନଜରରେ ରଖି ଚିନ୍ତାରେ ଚାଷୀକୁଳ । ଦକ୍ଷିଣ ଓଡିଶାରୁ ଉପକୂଳ ଓଡିଶା ଯାଏ ଚାଷୀ ମାନେ ସେମାନଙ୍କ ପାଚିଲା ଧାନକୁ କିପରି ସୁରକ୍ଷିତ ଭାବେ ଅମଳ କରିବେ ସେଥିପାଇଁ ଫୁରୁସତ ନାହିଁ ….
ଦକ୍ଷିଣ ଆଣ୍ଡାମାନ ସାଗରରେ ସୃଷ୍ଟି ହୋଇଛି ଏକ ଲଘୁଚାପ । ଏହା ୨୪ରେ ଅବପାତର ରୂପ ନେବା ସମ୍ଭାବନା ରହିଛି । ମାଲାକ୍କା ସମୁଦ୍ର ସନ୍ଧି ପାର୍ଶ୍ଵବର୍ତ୍ତୀ ଦକ୍ଷିଣ ଆଣ୍ଡାମାନ ସାଗରରେ ସୃଷ୍ଟି ହୋଇଛି ଏହି ଲଘୁଚାପ । ପରବର୍ତ୍ତୀ ସମୟରେ, ଏହା ପଶ୍ଚିମ-ଉତ୍ତର ପଶ୍ଚିମ ଦିଗକୁ ଗତି କରି ୨୪ ତାରିଖ ବେଳକୁ ଆହୁରି ଘନୀଭୂତ ହୋଇ ଦକ୍ଷିଣ ପୂର୍ବ ବଙ୍ଗୋପସାଗର ଉପରେ ଅବପାତରେ ପରିଣତ ହେବାର ସମ୍ଭାବନା ରହିଛି । ପରବର୍ତ୍ତୀ ୪୮ ଘଣ୍ଟା ମଧ୍ୟରେ ଏହା ପଶ୍ଚିମ-ଉତ୍ତର ପଶ୍ଚିମ ଦିଗକୁ ଅଗ୍ରସର ହୋଇ ଦକ୍ଷିଣ-ପଶ୍ଚିମ ବଙ୍ଗୋପସାଗରରେ ଅଧିକ ଘନୀଭୂତ ହେବାର ସମ୍ଭାବନା ରହିଛି ।
କିଛି ମଡେଲ୍ ଅନୁଯାୟୀ ଏହା ୨୬ରେ ବାତ୍ୟାରେ ପରିଣତ ହେବା ଆଶଙ୍କା ରହିଛି। ସମ୍ଭାବ୍ୟ ବାତ୍ୟା ଆନ୍ଧ୍ର ଓ ଓଡ଼ିଶା ଉପକୂଳ ଆଡ଼କୁ ମୁହାଁଇବା ଆଶଙ୍କାକୁ ଏଡ଼ାଇ ଦିଆଯାଇ ନପାରେ। ଲ୍ୟାଣ୍ଡଫଲ୍ ପାଇଁ ଆହୁରି ସପ୍ତାହେରୁ ଅଧିକ ସମୟ ରହିଛି। ସମ୍ଭାବ୍ୟ ବାତ୍ୟା ଯେଉଁଠାରେ ଲ୍ୟାଣ୍ଡଫଲ୍ କଲେ ମଧ୍ୟ ଓଡ଼ିଶାରେ ବର୍ଷା ସମ୍ଭାବନା ରହିଛି । ତେଣୁ ଚାଷୀମାନେ ସତର୍କତା ପଦକ୍ଷେପ ନେବା ଆବଶ୍ୟକ ବୋଲି କହିଛନ୍ତି କୃଷି ପାଣିପାଗ ବିଶେଷଜ୍ଞ।
ତେବେ ସମ୍ଭାବ୍ୟ ବାତ୍ୟା ସମ୍ଭାବନାକୁ ଦେଖି ଦକ୍ଷିଣ ଓଡିଶା ସମେତ ଉପକୁଳ ଓଡିଶାର ବିଭିନ୍ନ ସ୍ଥାନରେ ଚିନ୍ତାରେ ପଡିଯାଇଛନ୍ତି ଚାଷୀ । ଗଞ୍ଜାମ ଜିଲ୍ଲା ଆସିକା, ଶେରଗଡ଼, କବିସୂର୍ଯ୍ୟନଗର, ହିଞ୍ଜିଳି , ଓ ଧରାକୋଟ ଅଞ୍ଚଳର ଚାଷୀ ମାନଙ୍କୁ ଘାରିଲାଣି ବାତ୍ୟା ଭୟ l ଚାଷୀ ସେମାନଙ୍କ ପାଚିଲା ଧାନକୁ ସୁରକ୍ଷିତ ଅମଳ କରିବାକୁ ପ୍ରୟାସ ଆରମ୍ଭ କରିଛନ୍ତି । ବଙ୍ଗୋପସାଗରରେ ସୃଷ୍ଟ ଲଘୁଚାପ ଜନିତ ବର୍ଷାର ସମ୍ଭାବନା ଗଜପତି ଜିଲ୍ଲାରେ ରହିଥିବା ହେତୁ ଭୟରେ ଗଜପତି ଜିଲ୍ଲାର ଚାଷୀକୁଳ। କିପରି ସେମାନଙ୍କ ପାଚିଲା ଧାନ ଖରକୁ ଆଣିବେ ସେଥିପାଇଁ ଲାଗି ପଡିଛନ୍ତି । ତରତରିଆ ଭାବେ ମେସିନ ଲଗାଇ ଚାଷୀ ଆନ ଅମଳ କରୁଥିବା ଜିଲ୍ଲାର ଅନେକ ସ୍ଥାନରେ ଦେଖିବାକୁ ମିଳୁଛି ।
ସେହିପରି ସମ୍ଭାବ୍ୟ ବାତ୍ୟାକୁ ନେଇ ଏବେ ଚିନ୍ତାରେ ପଡିଛନ୍ତି ଜଗତସିଂହପୁର ଜିଲାର ଧାନ ଚାଷୀ । ଚଳିତ ବର୍ଷ ଜିଲ୍ଲାରେ ଭଲ ଧାନ ଫସଲ ହୋଇଥିବା ବେଳେ ଏବେ ପାଚିଲା ଧାନ ବିଲରେ ସୁନାର ଲହରୀ ଖେଳୁଛି । ହେଲେ ଏହି ସମୟରେ ବାତ୍ୟା କିମ୍ବା ବର୍ଷା ହେଲେ ଧାନ ସମ୍ପୂର୍ଣ୍ଣ ଉଜୁଡି ଯିବାର ସମ୍ଭାବନା ଥିବାରୁ ଏହା ଚାଷୀଙ୍କୁ ଚିନ୍ତାରେ ପକାଇଛି ।
କୋରାପୁଟ ଜିଲ୍ଲାରେ ଏବେ ଧାନ, ମାଣ୍ଡିଆ, ସୁଆଁ ଭଳି ଅନେକ ଚାଷ କରାଯାଇଛି। କିଛି ଅଞ୍ଚଳରେ ଏ ସବୁ ଶସ୍ୟ ପାଚିଥିବା ବେଳେ ଆଉ କିଛି ଅଞ୍ଚଳରେ ଅଧାରୁ ଅଧିକ ପରିମାଣରେ ଶସ୍ୟ ପାଚି ବିଲରେ ରହିଛି । ଆଗକୁ ବାତ୍ୟା ଆସୁଥିବା ଦେଖି ଚାଷୀ ମାନେ ସମ୍ପୂର୍ଣ୍ଣ ପାଚି ନଥିବା ଅମଳକୁ କାଟି ଖଳାକୁ ନେବା ପାଇଁ ବାଧ୍ୟ ହେଉଛନ୍ତି। ଏବେ ପୁଣି ବାତ୍ୟା ଆସିଲେ ଚାଷ କ୍ଷୟକ୍ଷତି ହେବା ସହ ମେରୁଦଣ୍ଡ ଭାଙ୍ଗିଯିବା କହିଛି ଚାଷୀ।
