ନୂଆଦିଲ୍ଲୀ: ଚୀନ ଇତିହାସରେ ସବୁଠାରୁ ବଡ଼ ଡାଟା ଚୋରି ଘଟଣା ସାମ୍ନାକୁ ଆସିଛି । ଚୀନର ସୁପର କମ୍ପ୍ୟୁଟରକୁ ହ୍ୟାକ କରି ଗୁରୁତ୍ବପୂର୍ଣ୍ଣ ଡାଟା ଚୋରି କରିନେଇଛନ୍ତି ହ୍ୟାକର୍ସ । ଏଥିରେ ଚୀନର ପ୍ରତିରକ୍ଷା ସହ ଜଡ଼ିତ ତଥ୍ୟ, ମିସାଇଲ୍ ବ୍ଲୁ-ପ୍ରିଣ୍ଟ ଏବଂ ଅନ୍ୟାନ୍ୟ ସମ୍ବେଦନଶୀଳ ଡାଟା ଚୋରି ହୋଇଥିବା ଜଣାପଡ଼ିଛି । ଏକ ହ୍ୟାକର ଗ୍ରୁପ ସରକାରଙ୍କ ସୁପର କମ୍ପ୍ୟୁଟରକୁ ହ୍ୟାକ କରି ଏସବୁ ତଥ୍ୟ ଚୋରି କରିଥିବା କୁହାଯାଉଛି । ତିଆନଜିନରେ ଥିବା ଏହି ସୁପର କମ୍ପ୍ୟୁଟରରୁ ପ୍ରାୟ ୧୦ ପେଟାବାଇଟସ୍ ଡାଟା ଚୋରି କରିନେଇଛନ୍ତି ହ୍ୟାକର୍ସ ।
କେତେ ଡାଟା ଚୋରି ?
ଚୋରି ହୋଇଥିବା ତଥ୍ୟ ୧୦ ପେଟାବାଇଟସ୍ ହେବ ବୋଲି କୁହାଯାଉଛି। ହ୍ୟାକର ଏହାର ଏକ ଛୋଟ ଅଂଶ ଅନଲାଇନରେ ପୋଷ୍ଟ କରିଛି ଏବଂ ଦାବି କରିଛି ଯେ, ଅବଶିଷ୍ଟ ତଥ୍ୟ ବିକ୍ରୟ ପାଇଁ ଉପଲବ୍ଧ। ଏଥି ପାଇଁ ହ୍ୟାକର ଗ୍ରୁପ ଲକ୍ଷ ଲକ୍ଷ ଡଲାର ଦାବି କରାଛି। ଏହି ଅର୍ଥ ହ୍ୟାକର ଗ୍ରୁପ କ୍ରିପ୍ଟୋକରେନ୍ସିରେ ନେବ ବୋଲି କହିଛି । ଫଳରେ ଏହାକୁ ଟ୍ରାକ୍ କରିବା କଷ୍ଟକର ।
ସବୁଠାରୁ ବଡ଼ ଡାଟା ଚୋରି
ସାଇବର ବିଶେଷଜ୍ଞଙ୍କ ଅନୁଯାୟୀ, ଆକ୍ରମଣକାରୀ ଏକ ଦୁର୍ବଳ ନେଟୱାର୍କ ମାଧ୍ୟମରେ ସିଷ୍ଟମରେ ପ୍ରବେଶ କରିଥିଲେ। ତା’ପରେ ସେ ବିଭିନ୍ନ ସର୍ଭରରୁ ଧୀରେ ଧୀରେ ଡାଟା ବାହାର କରିବା ପାଇଁ ଏକ ବଟନେଟ୍ ନାମକ ଏକ ପ୍ରୋଗ୍ରାମ ବ୍ୟବହାର କରିଥିଲେ। ଏହି ପ୍ରକ୍ରିୟା ପ୍ରାୟ ଛଅ ମାସ ଧରି ଚାଲିଥିଲା, ସିଷ୍ଟମ ଦ୍ୱାରା ଚିହ୍ନଟ ହୋଇନଥିଲା। ଏହି ପଦ୍ଧତି, ଛୋଟ ଅଂଶରେ ଡାଟା ବାହାର କରି, ଆଲର୍ଟକୁ ଏଡାଇ ଦେଇଥିଲା । ଏହା ହିଁ ଏତେ ବଡ଼ ଚୋରିକୁ ସମ୍ଭବ କରିଥିଲା ଏବଂ ଏକ ଗୁରୁତ୍ୱପୂର୍ଣ୍ଣ ସୁରକ୍ଷା ତ୍ରୁଟିକୁ ପ୍ରକାଶ କରିଛି।
ସୁରକ୍ଷା ଉପରେ ପ୍ରଶ୍ନବାଚୀ
ଏହି ଘଟଣା ଚୀନ୍ର ସାଇବର ସୁରକ୍ଷା ବ୍ୟବସ୍ଥା ଉପରେ ଗମ୍ଭୀର ପ୍ରଶ୍ନ ଉଠାଇଛି। ବିଶେଷଜ୍ଞମାନେ କହିଛନ୍ତି ଯେ, ଏତେ ବଡ଼ ଚୋରି ଦେଶର ବୈଷୟିକ ଏବଂ ପ୍ରତିରକ୍ଷା ସୂଚନାକୁ ବିପଦରେ ପକାଇପାରେ। ଚୀନରେ ପୂର୍ବରୁ ବଡ଼ ଧରଣର ତଥ୍ୟ ଚୋରି ହୋଇଛି , ଯାହା ଦେଶର ଦୁର୍ବଳ ସୁରକ୍ଷା ବ୍ୟବସ୍ଥାକୁ ନେଇ ଚିନ୍ତା ସୃଷ୍ଟି କରିଛି। ସରକାର ଏବେ ସୁରକ୍ଷା ଉନ୍ନତି ଉପରେ ଗୁରୁତ୍ୱ ଦେଉଛନ୍ତି, କିନ୍ତୁ ଏହି ଘଟଣା ବିଶ୍ୱବ୍ୟାପୀ ଚିନ୍ତା ମଧ୍ୟ ସୃଷ୍ଟି କରିଛି।
