ନୂଆଦିଲ୍ଲୀ: ଇରାନ୍ ଉପରେ ଇସ୍ରାଏଲ ଏବଂ ଆମେରିକା ମିଳିତ ଭାବରେ ଆକ୍ରମଣ କରିଥିଲେ । ଏହି ଯୁଦ୍ଧକୁ ୩୦ ଦିନ ବିତିଛି, କିନ୍ତୁ ତୀବ୍ରତା ବୃଦ୍ଧି ପାଇଛି । ଇରାନ୍ ଦେଉଛି ଜୋରଦାର ଜବାବ । ଇସ୍ରାଏଲ ସମେତ ନିଜର ପଡ଼ୋଶୀ ଗଲ୍ଫ ଦେଶଙ୍କୁ ଟାର୍ଗେଟ କରୁଛି ଇରାନ୍ । ଘନଘନ ମିସାଇଲ୍ ମାଡ଼ରେ ୟୁଏଇ, କୁଏତ ଏବଂ ସାଉଦି ଆରବ ଭଳି ଦେଶ ଅସ୍ତବ୍ୟସ୍ତ ହୋଇପଡ଼ିଛନ୍ତି । ଯୁଦ୍ଧ ମଧ୍ୟରେ ଗଲ୍ଫ ଦେଶ ଉପରେ ଆକ୍ରମଣ କରାଯିବ ନାହିଁ ବୋଲି ଇରାନ ରାଷ୍ଟ୍ରପତି ପ୍ରତିଶ୍ରୁତି ଦେଇଥିଲେ । କିନ୍ତୁ ଏହାର କିଛି ଦିନ ପରେ ଇରାନ୍ ପକ୍ଷରୁ ଏହି ସବୁ ଦେଶ ଉପରେ ଆକ୍ରମଣ ଆରମ୍ଭ ହୋଇଥିଲା । ଏହାରି ମଧ୍ୟରେ ଶନିବାର ଇରାନ୍, କୁଏତ, ଦୁବାଇ ଏବଂ ଇସ୍ରାଏଲ ଉପରେ ମିସାଇଲ୍ ମାଡ଼ କରିଥିବା ଜଣାପଡ଼ିଛି ।
ଇରାନୀୟ ସେନା ଶନିବାର କହିଛି ଯେ, ୟୁଏଇରେ ଥିବା ୟୁକ୍ରେନର ଡ୍ରୋନ ପ୍ରତିରୋଧୀ ପ୍ରଣାଳୀ ଉପରେ ଆକ୍ରମଣ କରାଯାଇଛି । ଏହି ପ୍ରଣାଳୀ ଆମେରିକୀୟ ସେନାକୁ ସହାୟତା କରିବା ଉଦ୍ଦେଶ୍ୟରେ ସ୍ଥାପନ କରାଯାଇଥିଲା । ଇରାନର କେନ୍ଦ୍ରୀୟ ସେନା ଅଭିଯାନର ମୁଖ୍ୟ ସରକାରୀ ଟିଭିକୁ ପ୍ରତିକ୍ରିୟା ଦେଇ କହିଛନ୍ତି, ଦୁବାଇରେ ଥିବା ଆମେରିକୀୟ ସୈନିକ ଠିକଣା ସମେତ ୟୁକ୍ରେନୀୟ ଡ୍ରୋନ ପ୍ରତିରୋଧୀ ପ୍ରଣାଳୀକୁ ଟାର୍ଗେଟ କରାଯାଇଛି । ଏହା ପୂର୍ବରୁ ଆଜି ୟୁକ୍ରେନ ରାଷ୍ଟ୍ରପତି ଭୋଲଡିମିର ଜେଲେନସ୍କି ୟୁଏଇରେ ପହଞ୍ଚି ଦେଶର ରାଷ୍ଟ୍ରପତିଙ୍କୁ ଭେଟିଛନ୍ତି । ଦୁଇ ଦେଶ ପ୍ରତିରକ୍ଷା କ୍ଷେତ୍ରରେ ସହଯୋଗ ଲାଗି ସହମତି ପ୍ରକାଶ କରିଛନ୍ତି ବୋଲି ଜେଲେନସ୍କି କହିଛନ୍ତି ।
ଇସ୍ରାଏଲ ଉପରେ ଆକ୍ରମଣ
ଇରାନ ସମର୍ଥିତ ହୁତି ବିଦ୍ରୋହୀମାନେ ଶନିବାର ପ୍ରତ୍ୟୁଷରେ ଇସ୍ରାଏଲରେ ଏକ କ୍ଷେପଣାସ୍ତ୍ର ମାଡ଼ କରିଥିବା ଦାବି କରିଛନ୍ତି । ଏହା ମଧ୍ୟପ୍ରାଚ୍ୟ ଯୁଦ୍ଧ ଆରମ୍ଭ ହେବା ପରଠାରୁ ସେମାନଙ୍କର ପ୍ରଥମ ଆକ୍ରମଣ। ଇସ୍ରାଏଲୀ ସେନା କହିଛି ଯେ, ଏହି କ୍ଷେପଣାସ୍ତ୍ରକୁ ଆକାଶରେ ଧ୍ବଂସ କରାଯାଇଛି । ଇସ୍ରାଏଲ ଶୁକ୍ରବାର ତେହେରାନ ବିରୁଦ୍ଧରେ ଏହାର ଅଭିଯାନକୁ ‘ତୀବ୍ର ଏବଂ ବିସ୍ତାର’ କରିବାକୁ ଧମକ ଦେଇଥିଲା । ଏହାର କିଛି ଘଣ୍ଟା ପରେ ଇସ୍ରାଏଲ ଇରାନର ପରମାଣୁ ପ୍ରତିଷ୍ଠାନ ଉପରେ ଆକ୍ରମଣ କରିଥିଲା।
ଦୁବାଇ ଆକ୍ରମଣ
ପଶ୍ଚିମ ଏସିଆରେ ଚାଲିଥିବା ସଂଘର୍ଷ ମଧ୍ୟରେ ଇରାନ ଶନିବାର ଦିନ ଦାବି କରିଛି ଯେ, ଏହା ଦୁବାଇରେ ଦୁଇଟି ଆମେରିକୀୟ ସାମରିକ ଘାଟି ଉପରେ ଆକ୍ରମଣ କରିଛି। ଇରାନର ସରକାରୀ ଗଣମାଧ୍ୟମ, ଫାର୍ସ ନ୍ୟୁଜ୍ ଏଜେନ୍ସି ଏହା ରିପୋର୍ଟ କରିଛି। ସମ୍ବାଦ ସରବରାହ ସଂସ୍ଥା ଅନୁଯାୟୀ, ହଜରତ ଖାତମ ଅଲ-ଆନବିୟାର କେନ୍ଦ୍ରୀୟ ମୁଖ୍ୟାଳୟର ଜଣେ ମୁଖପାତ୍ର ଦାବି କରିଛନ୍ତି ଯେ ଏହି ଅଞ୍ଚଳରେ ଥିବା ଆମେରିକୀୟ ଘାଟି ଉପରେ ଇରାନୀ ଆକ୍ରମଣ ପରେ ଆମେରିକୀୟ ସାମରିକ କର୍ମଚାରୀମାନେ ଏହି ସ୍ଥାନଗୁଡ଼ିକୁ ଛାଡ଼ି ଚାଲି ଯାଇଛନ୍ତି । ଫାର୍ସ ନ୍ୟୁଜ୍ ଏଜେନ୍ସି ଅନୁଯାୟୀ, IRGC ଏହି ସ୍ଥାନଗୁଡ଼ିକୁ ଚିହ୍ନଟ କରି ସଠିକ୍ କ୍ଷେପଣାସ୍ତ୍ର ଏବଂ ଡ୍ରୋନ୍ ଆକ୍ରମଣ କରିଛି ।
