ୱାଶିଂଟନ୍: ମଙ୍ଗଳ ଗ୍ରହରେ ଜୀବନର ସନ୍ଧାନ ନେଇ ବୈଜ୍ଞାନିକମାନେ ଲଗାତାର ଗବେଷଣା ଚଳାଇଥିବା ବେଳେ ଏବେ ଏକ ଆଶ୍ଚର୍ଯ୍ୟଜନକ ତଥ୍ୟ ସାମ୍ନାକୁ ଆସିଛି। ୨୦୦୧ ମସିହାରେ ମଙ୍ଗଳ ଗ୍ରହରେ ପ୍ରଥମ ଥର ପାଇଁ ଦେଖାଯାଇଥିବା ଏକ ପିରାମିଡ୍ ଆକୃତିର ଗଠନକୁ ନେଇ ପୁଣିଥରେ ବିତର୍କ ଆରମ୍ଭ ହୋଇଛି। କୋଟି କୋଟି ବର୍ଷ ପୂର୍ବେ ଲାଲ୍ ଗ୍ରହରେ ମଣିଷ ଭଳି ଜୀବ ବସବାସ କରୁଥିଲେ କି ନାହିଁ, ତାହାକୁ ନେଇ ଏହି ଛବି ନୂଆ ପ୍ରଶ୍ନବାଚୀ ସୃଷ୍ଟି କରିଛି।
Also Read: Roti Vs Rice: ଭାତ ନା ରୁଟି ? ଜାଣନ୍ତୁ ରାତ୍ରିଭୋଜନ ପାଇଁ କେଉଁ ଖାଦ୍ୟଟି ଅଧିକ ଲାଭଦାୟକ
ନାସାର କ୍ୟାମେରାରେ କଏଦ୍ ହୋଇଥିଲା ଚିତ୍ର
ଏହି ଚିତ୍ରଟି ନାସାର (NASA) ‘ମାର୍ସ ଗ୍ଲୋବାଲ ସର୍ଭେୟର’ (MGS) ମିଶନ୍ ଦ୍ୱାରା ଉତ୍ତୋଳନ କରାଯାଇଥିଲା। ଗବେଷକ କିଥ୍ ଲାନି ତଥ୍ୟ ଯାଞ୍ଚ କରୁଥିବା ବେଳେ ଏହି ତିନି ପାର୍ଶ୍ୱ ବିଶିଷ୍ଟ ପିରାମିଡ୍ ଆବିଷ୍କାର କରିଥିଲେ। ତାଙ୍କ ମତରେ ଏହା ଏକ କୃତ୍ରିମ ଗଠନ ହୋଇପାରେ। ପ୍ରାୟ ୨୫ ବର୍ଷ ପରେ ଡକ୍ୟୁମେଣ୍ଟାରୀ ନିର୍ମାତା ବ୍ରାଏନ୍ ଡୋବସ୍ ଏହି ଫଟୋକୁ ସୋସିଆଲ୍ ମିଡିଆରେ ସେୟାର କରିବା ପରେ ଏହା ଏବେ ଭାଇରାଲ୍ ହେବାରେ ଲାଗିଛି। ତାଙ୍କ କହିବା ଅନୁଯାୟୀ, ଏହି ପିରାମିଡ୍ର ଆକାର ଇଜିପ୍ଟର ‘ଗ୍ରେଟ୍ ପିରାମିଡ୍’ ସହ ପ୍ରାୟ ସମାନ।
କେଉଁଠି ଅଛି ଏହି ପିରାମିଡ୍?
* ଏହି ସଂରଚନାଟି ମଙ୍ଗଳ ଗ୍ରହର ସୌରମଣ୍ଡଳର ଦ୍ୱିତୀୟ ବୃହତ୍ତମ କାନିୟନ୍ (ଗଭୀର ଗଣ୍ଡ) ଭାଲ୍ଲେସ୍ ମେରିନେରିସ୍ (Valles Marineris) ଭିତରେ ଥିବା କାଣ୍ଡୋର ଚାସମା (Candor Chasma) ର ପଶ୍ଚିମ ଭାଗରେ ଅବସ୍ଥିତ।
* ୨୦୦୧ ରୁ ୨୦୧୬ ମଧ୍ୟରେ ନାସାର ବିଭିନ୍ନ ମିଶନ୍ (MGS ଏବଂ Mars Reconnaissance Orbiter) ଦ୍ୱାରା ଏହାର ଅତିକମରେ ୫ ଥର ଫଟୋ ନିଆଯାଇଛି।
* ୨୦୦୧ ରୁ ଆରମ୍ଭ କରି ୨୦୧୬ ପର୍ଯ୍ୟନ୍ତ ନିଆଯାଇଥିବା ହାଇ-ରେଜୋଲ୍ୟୁସନ୍ ଫଟୋଗୁଡ଼ିକରେ ଆଲୋକ ଏବଂ ଛାଇର ପ୍ରଭାବ ସତ୍ତ୍ୱେ ପ୍ରତ୍ୟେକ ଥର ଏହାର ତିନୋଟି ରେଖା ସମ୍ପୂର୍ଣ୍ଣ ସିଧା ଦେଖାଯାଇଛି, ଯାହା ଏହାର ଜ୍ୟାମିତିକ ଆକାରକୁ ସ୍ପଷ୍ଟ କରୁଛି।
ବିଶେଷଜ୍ଞ ଏବଂ ନାସାର ମତ କଣ?
ମାର୍ସ ଗବେଷକ ଜର୍ଜ ହାସ୍ ଏକ ରିସର୍ଚ୍ଚ ପେପରରେ ଉଲ୍ଲେଖ କରିଛନ୍ତି ଯେ, ଏହାର ସମମିତି (Symmetry) ଏବଂ ଜ୍ୟାମିତିକ ଆକାରକୁ ଦେଖିଲେ ଏହା କୌଣସି କୃତ୍ରିମ ସଭ୍ୟତା ଦ୍ୱାରା ନିର୍ମିତ ହୋଇଥିବାର ଯଥେଷ୍ଟ ସମ୍ଭାବନା ରହିଛି। ସିଆଇଏ (CIA) ର ‘ପ୍ରୋଜେକ୍ଟ ଷ୍ଟାରଗେଟ୍’ (Project Stargate) ସହ ଜଡିତ କିଛି ରିପୋର୍ଟ ମଧ୍ୟ ସାମ୍ନାକୁ ଆସିଛି, ଯେଉଁଥିରେ ଅତୀତରେ ମଙ୍ଗଳରେ ଏକ ପ୍ରାଚୀନ ସଭ୍ୟତା ଥିବା ନେଇ ସୂଚନା ମିଳିଥିଲା।
ଅନ୍ୟପଟେ ନାସା ଏହି ଦାବିକୁ ସିଧାସଳଖ ଖଣ୍ଡନ ନକରି କହିଛି ଯେ, ଏହି ଅଞ୍ଚଳରେ ଥିବା ତୀକ୍ଷ୍ଣ ପାହାଡ଼ ଏବଂ ନିୟମିତ ଭୂସ୍ଖଳନ କାରଣରୁ ପ୍ରାକୃତିକ ଭାବେ ଏଭଳି ଅଦ୍ଭୁତ ଜ୍ୟାମିତିକ ଆକୃତି ସୃଷ୍ଟି ହୋଇପାରେ। ବର୍ତ୍ତମାନ ଏଲନ୍ ମସ୍କଙ୍କ ଭଳି ବ୍ୟକ୍ତିବିଶେଷ ମଙ୍ଗଳ ଗ୍ରହକୁ ମାନବ ଜାତିର ପରବର୍ତ୍ତୀ ଠିକଣା ବୋଲି ଭାବୁଥିବା ବେଳେ, ଏହି ପିରାମିଡ୍ର ରହସ୍ୟ ଲାଲ୍ ଗ୍ରହର ଇତିହାସକୁ ନେଇ ନୂଆ ପ୍ରଶ୍ନ ସୃଷ୍ଟି କରିଛି।
Also Read: ଭାରତର କେଉଁ ରାଜ୍ୟରେ ରହିଛି ସର୍ବାଧିକ ରେଳ ଷ୍ଟେସନ? ରାଜସ୍ଥାନ କିମ୍ବା ପଶ୍ଚିମବଙ୍ଗ ନୁହେଁ…ଜାଣନ୍ତୁ ସଠିକ୍ ଉତ୍ତର
