ନୂଆଦିଲ୍ଲୀ: ୨୦୨୫-୨୬ ଆର୍ଥିକ ବର୍ଷରେ ଭାରତର ପ୍ରତିରକ୍ଷା ରପ୍ତାନି ସର୍ବକାଳୀନ ରେକର୍ଡ ସ୍ତରରେ ପହଞ୍ଚିଛି। ବିଶ୍ୱର ଦ୍ୱିତୀୟ ବୃହତ୍ତମ ଅସ୍ତ୍ରଶସ୍ତ୍ର ଆମଦାନୀକାରୀ ଦେଶ ଭାବେ ପରିଚିତ ଭାରତ ଏବେ ଅସ୍ତ୍ରଶସ୍ତ୍ର ନିର୍ମାଣ ଏବଂ ରପ୍ତାନିରେ ୪ ବିଲିୟନ୍ ଡଲାର (ପ୍ରାୟ ୩୮,୪୨୪ କୋଟି ଟଙ୍କା) ର ଏକ ବଡ଼ ମାଇଲଖୁଣ୍ଟ ଅତିକ୍ରମ କରି ନୂଆ ଇତିହାସ ରଚିଛି।
Also Read: Digital Census 2027: ୧୫ ବର୍ଷ ପରେ ପ୍ରଥମ ଥର ଡିଜିଟାଲ୍ ସର୍ଭେ, ଜାଣନ୍ତୁ କେଉଁ ୩୩ଟି ପ୍ରଶ୍ନର ଦେବାକୁ ହେବ ଉତ୍ତର
ମେକ୍ ଇନ୍ ଇଣ୍ଡିଆର ସଫଳତା
ପ୍ରତିରକ୍ଷା ମନ୍ତ୍ରଣାଳୟର ସୂଚନା ଅନୁଯାୟୀ, ୨୦୨୪ ତୁଳନାରେ ଏଥିରେ ପ୍ରାୟ ୬୦ ପ୍ରତିଶତର ବୃଦ୍ଧି ଘଟିଛି। ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ କହିଛନ୍ତି ଯେ, “ଭାରତ ଏକ ଗ୍ଲୋବାଲ୍ ଡିଫେନ୍ସ ମାନୁଫ୍ୟାକ୍ଚରିଂ ହବ୍ (Global defense manufacturing hub) ହେବା ଦିଗରେ ଦ୍ରୁତ ଗତିରେ ଆଗେଇ ଚାଲିଛି। ପ୍ରତିରକ୍ଷା ରପ୍ତାନିରେ ଏହି ବଡ଼ ଲମ୍ଫ ଭାରତର ସ୍ୱଦେଶୀ ଜ୍ଞାନକୌଶଳ ତଥା ଉନ୍ନତ ନିର୍ମାଣ କ୍ଷମତା ଉପରେ ବିଶ୍ୱର ବଢ଼ୁଥିବା ବିଶ୍ୱାସକୁ ପ୍ରମାଣିତ କରୁଛି।”
ମୋଟ ରପ୍ତାନିର ପ୍ରାୟ ୫୫ ପ୍ରତିଶତ ସରକାରୀ ପ୍ରତିରକ୍ଷା କମ୍ପାନୀଗୁଡ଼ିକ ଦ୍ୱାରା ହୋଇଥିବା ବେଳେ ବାକି ୪୫ ପ୍ରତିଶତ ଘରୋଇ କମ୍ପାନୀଙ୍କ ଦ୍ୱାରା ହୋଇଛି, ଯାହାକି ଏକ ଆତ୍ମନିର୍ଭର ପ୍ରତିରକ୍ଷା ଇକୋସିଷ୍ଟମର ବଢ଼ୁଥିବା ଶକ୍ତିକୁ ଦର୍ଶାଉଛି।
ଭାରତର ପ୍ରମୁଖ ୫ ଗ୍ରାହକ ଦେଶ
ଭାରତ ବର୍ତ୍ତମାନ ବିଶ୍ୱର ୧୦୦ରୁ ଅଧିକ ଦେଶକୁ କ୍ଷେପଣାସ୍ତ୍ର, ରାଡାର୍ ସିଷ୍ଟମ୍, ରକେଟ୍ ଲଞ୍ଚର୍, ଏବଂ ଇଲେକ୍ଟ୍ରୋନିକ୍ ଯନ୍ତ୍ରାଂଶ ଆଦି ରପ୍ତାନି କରୁଛି। ତେବେ ଏକ ରିପୋର୍ଟ ଅନୁଯାୟୀ ଭାରତରୁ ସାମଗ୍ରୀ କିଣୁଥିବା ଶୀର୍ଷ ୫ଟି ଦେଶ ହେଲେ:
- ଆମେରିକା (USA): ଆମେରିକା ଭାରତଠାରୁ ବୁଲେଟ୍ ପ୍ରୁଫ୍ ଜ୍ୟାକେଟ୍, ହେଲମେଟ୍, ଅସ୍ତ୍ରଶସ୍ତ୍ରର ଯନ୍ତ୍ରାଂଶ ଏବଂ ଏରୋ କମ୍ପୋନେଣ୍ଟ୍ କିଣୁଛି।
- ଇସ୍ରାଏଲ୍ (Israel): ଭାରତରୁ ବିଭିନ୍ନ ଅସ୍ତ୍ରଶସ୍ତ୍ରର ପାର୍ଟସ୍, ବ୍ୟାଟେରୀ ଏବଂ ସବ୍-ସିଷ୍ଟମ୍ ଆମଦାନୀ କରୁଥିବା ପ୍ରମୁଖ ଦେଶମାନଙ୍କ ମଧ୍ୟରେ ଇସ୍ରାଏଲ୍ ଅନ୍ୟତମ।
- ବ୍ରିଟେନ୍ (UK): ବୁଲେଟ୍ ପ୍ରୁଫ୍ ଜ୍ୟାକେଟ୍ ଏବଂ ଇଞ୍ଜିନିୟରିଂ ସେବା ସମେତ ଅନେକ ପ୍ରତିରକ୍ଷା ସାମଗ୍ରୀ ବ୍ରିଟେନ୍କୁ ଯାଉଛି।
- ଫ୍ରାନ୍ସ (France): ଫ୍ରାନ୍ସ ଭାରତଠାରୁ ଏରୋସ୍ପେସ୍ କମ୍ପୋନେଣ୍ଟ୍ ଏବଂ ବିଭିନ୍ନ ବ୍ୟାଟେରୀ କିଣୁଛି।
- ଜର୍ମାନୀ (Germany): ୟୁରୋପର ସବୁଠାରୁ ବଡ଼ ଅର୍ଥନୀତି ଜର୍ମାନୀ ମଧ୍ୟ ଆର୍ମର୍-ସିଲ୍ଡିଂ ଉପକରଣ ଏବଂ ବୁଲେଟ୍ ପ୍ରୁଫ୍ ଜ୍ୟାକେଟ୍ ପାଇଁ ଭାରତ ଉପରେ ନିର୍ଭର କରୁଛି।
ବଡ଼ ଅସ୍ତ୍ରଶସ୍ତ୍ର କିଣିବାରେ ଆଗରେ ଆର୍ମେନିଆ ଏବଂ ଫିଲିପାଇନ୍ସ
ଯନ୍ତ୍ରାଂଶ ଓ ସବ୍-ସିଷ୍ଟମ୍ କ୍ଷେତ୍ରରେ ଆମେରିକା ଏବଂ ଫ୍ରାନ୍ସ ଆଗରେ ଥିଲେ ମଧ୍ୟ ଭାରତର ସମ୍ପୂର୍ଣ୍ଣ ସ୍ୱଦେଶୀ ଅସ୍ତ୍ରଶସ୍ତ୍ର କିଣିବାରେ ଆର୍ମେନିଆ ଏବଂ ଫିଲିପାଇନ୍ସ ସବୁଠାରୁ ଆଗରେ ଅଛନ୍ତି।
- ଆର୍ମେନିଆ: ଭାରତଠାରୁ ୧୫ଟି ‘ଆକାଶ’ ସର୍ଫେସ୍-ଟୁ-ଏୟାର୍ ମିସାଇଲ୍ ସିଷ୍ଟମ୍ (୪୦୦ଟି କ୍ଷେପଣାସ୍ତ୍ର ସହିତ), ପିନାକା ମଲ୍ଟି-ବ୍ୟାରେଲ୍ ରକେଟ୍ ଲଞ୍ଚର୍, ୯୦ରୁ ଅଧିକ ଆଡଭାନ୍ସଡ୍ ଟୋୱଡ୍ ଆର୍ଟିଲାରୀ ଗନ୍ ସିଷ୍ଟମ୍ (ATAGS), ସ୍ୱାତୀ ୱେପନ୍ ଲୋକେଟିଂ ରାଡାର୍ ଏବଂ ଜେନ୍ ଆଣ୍ଟି-ଡ୍ରୋନ୍ ସିଷ୍ଟମ୍ କିଣିଛି।
- ଫିଲିପାଇନ୍ସ ଓ ଇଣ୍ଡୋନେସିଆ: ଫିଲିପାଇନ୍ସ ‘ବ୍ରହ୍ମୋସ୍’ (BrahMos) କ୍ଷେପଣାସ୍ତ୍ର ପାଇଁ ୨୦୨୨ ରେ ୩୭୫ ନିୟୁତ ଡଲାରର ଏକ ବଡ଼ ଚୁକ୍ତି କରିଥିଲା ଏବଂ ଅଧିକ କିଣିବାକୁ ମଧ୍ୟ ବିଚାର କରୁଛି। ଅନ୍ୟପକ୍ଷରେ, ଇଣ୍ଡୋନେସିଆ ମଧ୍ୟ ନିଜର ସାମୁଦ୍ରିକ ସୁରକ୍ଷା ପାଇଁ ଭାରତଠାରୁ ବ୍ରହ୍ମୋସ୍ କ୍ଷେପଣାସ୍ତ୍ର କିଣିବାକୁ ନିକଟରେ ରାଜି ହୋଇଥିବା ଜଣାପଡ଼ିଛି।
