H

ରାସ୍ତାକଡରେ ଶୋଉଥିବା ତରାସ ମାଉସୀଙ୍କ ଦୁଃଖ ଜାଣିବା ପରେ ନିଜେ ଜିଲ୍ଲାପାଳ ତାଙ୍କୁ ଭେଟିଥିଲେ । ତରାସଙ୍କ ସବୁ ଦୁଃଖ ଶୁଣି ତାଙ୍କୁ ଘରଟିଏ ଦେବାକୁ ପ୍ରତିଶ୍ରୁତି ଦେଇଥିଲେ । ଆଉ ସେ କଥାକୁ ଜିଲ୍ଲାପାଳ ଏବେ ପାଳନ କରିଛନ୍ତି । ତରାସଙ୍କୁ ଘରଟିଏ ଦେଇଛି ପ୍ରଶାସନ । ଆଉ ଘରଟିଏ ପାଇ ତରାସ ହସ ହସ ମୁହଁରେ ସରକାରଙ୍କ ସମସ୍ତ ଅଧିକାରୀଙ୍କୁ ଧନ୍ୟବାଦ ଦେଇଛନ୍ତି ।

ସୋନପୁର ସହରର ତରାସ ବାଘ ହେଉଛନ୍ତି ବେଶ୍ ପରିଚିତା । ଜୀବଜନ୍ତୁଙ୍କ ପାଇଁ ଯାହାଙ୍କ ପ୍ରାଣ ସବୁବେଳେ କାନ୍ଦୁଥାଏ । ନିଜେ ନଖାଇ ନପିଇ ଭିକ୍ଷାବୃତି କରି ଗାଈ ଓ ବିଲେଇମାନଙ୍କୁ ଖାଇବା ଦିଅନ୍ତି । ସେମାନଙ୍କ ଯତ୍ନ ନିଅନ୍ତି । ଯେଉଁ ବାରଣ୍ଡାରେ ପାରନ୍ତି ସେଇଠି ଶୋଇପଡ଼ନ୍ତି । ହେଲେ ଗାଈ ଓ ବିଲେଇମାନଙ୍କ କିଛି ଅସୁବିଧା ହେଲେ କାନ୍ଦନ୍ତି । ଏ ସବୁ ଜାଣିବା ପରେ ନିଜେ ଜିଲ୍ଲାପାଳ ତାଙ୍କ ନିକଟକୁ ଆସି ଦୁଃଖ ବୁଝିଥିଲେ । ଆଉ ଏବେ ଜିଲ୍ଲା ପ୍ରାଣୀ ଚିକିତ୍ସା ବିଭାଗର ଘରକୁ ମରାମତି କରି ସେଥିରେ ବିଦ୍ୟୁତ, ପିଇବା ପାଣିର ସୁବିଧା ଓ ତା’ ସହ ଅନ୍ୟାନ୍ୟ ଆନୁସାଙ୍ଗିକ ବ୍ୟବସ୍ଥା କରି ତରାସ ମାଉସୀଙ୍କୁ ସେହି ଘରେ ଛାଡିଛି ପ୍ରଶାସନ ।