କୁଇନ୍ସଲ୍ୟାଣ୍ଡ: ଅଷ୍ଟ୍ରେଲିଆର କୁଇନ୍ସଲ୍ୟାଣ୍ଡ ଉପକୂଳକୁ ଏକ ବଡ଼ ପ୍ରାକୃତିକ ବିପଦ ମାଡ଼ି ଆସୁଛି। ଟ୍ରପିକାଲ୍ ସାଇକ୍ଲୋନ୍ ‘ନାରେଲ୍’ ଏବେ କ୍ୟାଟେଗୋରୀ-୫ (Category 5) ମହାବାତ୍ୟାର ରୂପ ନେଇସାରିଲାଣି। ବିଶେଷଜ୍ଞଙ୍କ ମତରେ ଏହା ଗତ କିଛି ଦଶନ୍ଧି ମଧ୍ୟରେ ଦେଖାଯାଇନଥିବା ଏକ ଭୟଙ୍କର ବାତ୍ୟା ଏବଂ ଏହାକୁ ଏକ “୧୦୦ ବର୍ଷରେ ଥରେ ଆସୁଥିବା ଘଟଣା” ବୋଲି କୁହାଯାଉଛି। ଶୁକ୍ରବାର ସକାଳେ ଏହା ସ୍ଥଳଭାଗ ଛୁଇଁବାର ସମ୍ଭାବନା ରହିଛି।
୧୦୦ ବର୍ଷର ରେକର୍ଡ ଭାଙ୍ଗିବ ‘ନାରେଲ୍’
- କୁଇନ୍ସଲ୍ୟାଣ୍ଡ ପ୍ରିମିୟର ଡେଭିଡ୍ କ୍ରିସାଫୁଲିଙ୍କ କହିବା ଅନୁଯାୟୀ, ଯଦି ଏହି ବାତ୍ୟା ଲକହାର୍ଟ ରିଭର ଏବଂ କୁକଟାଉନ୍ ମଧ୍ୟରେ ସ୍ଥଳଭାଗ ଅତିକ୍ରମ କରେ, ତେବେ ଗତ ୧୦୦ ବର୍ଷରୁ ଅଧିକ ସମୟ ମଧ୍ୟରେ ହୋଇଥିବା ଏହି ଅଞ୍ଚଳରେ ଏହା ପ୍ରଥମ ଘଟଣା ହେବ। ସେହିପରି ଗତ ୫୦ ବର୍ଷ ଭିତରେ କୁଇନ୍ସଲ୍ୟାଣ୍ଡ ଉପକୂଳ ଅତିକ୍ରମ କରିବାରେ ଏହା ହେବ ଚତୁର୍ଥ ବାତ୍ୟା।
- ସ୍ଥଳଭାଗ ଅତିକ୍ରମ କରିବା ବେଳେ ଘଣ୍ଟାପ୍ରତି ୨୨୫ କିଲୋମିଟରରୁ ଅଧିକ ବେଗରେ ପବନ ବହିବ। ଏଥିସହ ପ୍ରବଳ ବର୍ଷା ଯୋଗୁଁ ଉପକୂଳବର୍ତ୍ତୀ ଅଞ୍ଚଳରେ ଆକସ୍ମିକ ବନ୍ୟା ପରିସ୍ଥିତି ସୃଷ୍ଟି ହେବାର ଆଶଙ୍କା ରହିଛି। ଏହା ଏକ ଗୁରୁତର ଘଟଣା ହୋଇଥିବାରୁ ସମସ୍ତଙ୍କୁ ସତର୍କ ରହିବାକୁ ସରକାର ନିବେଦନ କରିଛନ୍ତି।
Also Read: କେଉଁଥିରେ ରହିଛି ଅଧିକ ପ୍ରୋଟିନ୍ ? ଜାଣନ୍ତୁ ଓଜନ କମାଇବାକୁ କେଉଁଟି ବେଷ୍ଟ
ଏକ ସଂକୁଚିତ କିନ୍ତୁ ଅତି ଘାତକ ବାତ୍ୟା
- ପାଣିପାଗ ବିଭାଗ ଅନୁଯାୟୀ, କୋରାଲ୍ ସାଗରରେ ସୃଷ୍ଟି ହୋଇଥିବା ଏହି ବାତ୍ୟା ଏକ ‘କମ୍ପାକ୍ଟ ସାଇକ୍ଲୋନ୍’। ଏହାର ଅର୍ଥ ହେଉଛି ବାତ୍ୟାର କେନ୍ଦ୍ରବିନ୍ଦୁ (Eye) ଚାରିପାଖରେ ଏକ ଛୋଟ ଅଞ୍ଚଳରେ ପବନର ବେଗ ଅତି ଭୟଙ୍କର ରହିବ।
- କେନ୍ଦ୍ରରୁ ମାତ୍ର ୫୦ କିମି ବ୍ୟାସାର୍ଦ୍ଧ ମଧ୍ୟରେ ସର୍ବାଧିକ କ୍ଷୟକ୍ଷତି ଘଟାଇବାର କ୍ଷମତା ଏହି ଝଡ଼ର ରହିଛି। ଏହା ଘଣ୍ଟାପ୍ରତି ୨୬ କିମି ବେଗରେ କେପ୍ ୟର୍କ ଆଡ଼କୁ ମାଡ଼ି ଆସୁଛି। ସମୁଦ୍ର ପୃଷ୍ଠର ତାପମାତ୍ରା ସ୍ୱାଭାବିକ ଠାରୁ ୦.୫-୧.୦ ଡିଗ୍ରୀ ସେଲସିୟସ୍ ଅଧିକ ଥିବାରୁ ଏହା ଏତେ ଶକ୍ତିଶାଳୀ ହୋଇପାରିଛି।
Also Read: Roti Vs Rice: ଭାତ ନା ରୁଟି ? ଜାଣନ୍ତୁ ରାତ୍ରିଭୋଜନ ପାଇଁ କେଉଁ ଖାଦ୍ୟଟି ଅଧିକ ଲାଭଦାୟକ
ବାତ୍ୟାର ଆଗାମୀ ଗତିପଥ ଏବଂ ପୂର୍ବ ଇତିହାସ
- କେପ୍ ୟର୍କ ପେନିନସୁଲା ଅତିକ୍ରମ କରିବା ପରେ ଏହା କିଛି ମାତ୍ରାରେ ଦୁର୍ବଳ ହେବ। କିନ୍ତୁ ପରେ ଏହା ପଶ୍ଚିମ ଦିଗରେ ଗଲ୍ଫ ଅଫ୍ କାର୍ପେଣ୍ଟାରିଆ ଦେଇ ଗତି କରିବ ଏବଂ ସପ୍ତାହାନ୍ତ ସୁଦ୍ଧା ନର୍ଦ୍ଦନ ଟେରିଟୋରୀରେ ପହଞ୍ଚି ପୁଣି ଏକ ଭୟଙ୍କର ବାତ୍ୟାର ରୂପ ନେଇପାରେ।
- ସୂଚନାଯୋଗ୍ୟ ଯେ, ୧୮୯୯ ମସିହା ମାର୍ଚ୍ଚ ମାସରେ ଠିକ୍ ଏହି ଅଞ୍ଚଳରେ ହିଁ ଅଷ୍ଟ୍ରେଲିଆ ଇତିହାସର ସବୁଠାରୁ ଘାତକ ତଥା ବିଶ୍ୱର ଅନ୍ୟତମ ଭୟଙ୍କର ‘ସାଇକ୍ଲୋନ୍ ମାହିନା’ ମାଡ଼ ହୋଇଥିଲା, ଏବେ ‘ନାରେଲ୍’ ମଧ୍ୟ ସେହିଭଳି ଏକ ବିପଦ ଆଣିବାକୁ ଯାଉଛି।
