ମୁମ୍ବାଇ, ୧୪/୦୮: ଲୋକପ୍ରିୟ ଆଇପିଏଲ ଷ୍ଟାର୍ ସଞ୍ଜୁ ସାମସନ । ଆଗାମୀ ଆଇପିଏଲ୍ ପୂର୍ବରୁ ରାଜସ୍ଥାନ ରୟାଲ୍ସ ଛାଡ଼ିବା ନିଶ୍ଚିତ ହୋଇଯାଇଛି । ଏହି ଘଟଣା ଉପରେ ଉଭୟ ପକ୍ଷ ନିରବ ରହିଥିଲେ ହେଁ ରାଜସ୍ଥାନ ରୟାଲ୍ସ ଟ୍ରେଡ୍ ପାଇଁ ବିଭିନ୍ନ ଫ୍ରାଞ୍ଚାଇଜ୍ ସହ ଯୋଗାଯୋଗ ଚଳାଇଛି । ସାମସନଙ୍କୁ ନେବା ପାଇଁ ମଧ୍ୟ ଅନେକ ଫ୍ରାଞ୍ଚାଇଜ୍ ପ୍ରୟାସ ଚଳାଇଛନ୍ତି ।
ଚେନ୍ନାଇ ସୁପରକିଙ୍ଗ୍ସ ସାମସନଙ୍କୁ ନେବା ପାଇଁ ଆଗ୍ରହୀ ରହିଥିଲେ ହେଁ ରାଜସ୍ଥାନ ରୟାଲ୍ସର ସର୍ତ୍ତରେ ରାଜି ହେଉ ନାହିଁ । ଟ୍ରେଡିଂରେ ରାଜସ୍ଥାନ ରୟାଲ୍ସ ସାମସନଙ୍କ ବଦଳରେ ୨ଜଣ ଖେଳାଳି ଚାହୁଁଛି । ପ୍ରଥମ ଖେଳାଳି ଭାବେ ରବିନ୍ଦ୍ର ଜାଡ଼େଜା ଓ ଦ୍ୱିତୀୟ ଖେଳାଳି ଭାବେ ଋତୁରାଜ ଗାଏକୱାଡ୍ ଓ ଶିବମ ଦୁବେଙ୍କ ମଧ୍ୟରୁ ଜଣଙ୍କୁ ଚୟନ କରିଛି ରାଜସ୍ଥାନ ରୟାଲ୍ସ । ଏହି ୩ଜଣ ଯାକ ଖେଳାଳି ସୁପରକିଙ୍ଗ୍ସର ମେରୁଦଣ୍ଡ । ଦୁବେ ପୂର୍ବରୁ ରାଜସ୍ଥାନ ରୟାଲ୍ସ ପକ୍ଷରୁ ଖେଳି ସାରିଛନ୍ତି ।
ମିଳିଥିବା ତଥ୍ୟ ଅନୁଯାୟୀ ସୁପରକିଙ୍ଗ୍ସ କୌଣସି ଖେଳାଳିଙ୍କୁ ଛାଡ଼ିବାକୁ ଚାହୁଁନାହିଁ । ସୂଚନାଯୋଗ୍ୟ, ଆଗାମୀ ସିଜନ ପୂର୍ବରୁ ତାଙ୍କୁ ଟ୍ରେଡ୍ କିମ୍ବା ରିଲିଜ କରିବା ପାଇଁ ସାମସନ ଗତ ୧୩ ତାରିଖରେ ରାଜସ୍ଥାନ ରୟାଲ୍ସକୁ ଅନୁରୋଧ କରିଥିଲେ । ଏହି ଘଟଣା ପ୍ରକାଶ ପାଇବା ପରେ ଉଭୟ ପକ୍ଷ ମଧ୍ୟରେ ଅନେକ ଘଟଣାକୁ ନେଇ ମତ ପାର୍ଥକ୍ୟ ରହିଥିବା ସ୍ପଷ୍ଟ ହୋଇଥିଲା । ବିଶେଷ କରି ଗତ ମେଗା ନିଲାମପୂର୍ବରୁ ଜୋସ ବଟଲରଙ୍କୁ ରିଲିଜ କରିବାର ନିଷ୍ପତ୍ତିକୁ ସାମସନ ବିରୋଧ କରିଥିଲେ ।
ମାତ୍ର ଫ୍ରାଞ୍ଚାଇଜ୍ ତାଙ୍କ କଥା ରଖି ନଥିଲା । ନିକଟରେ ସାମସନ ଏକ ପୋଡକାଷ୍ଟ ଅବସରରେ ଏହି ଘଟଣା ପ୍ରକାଶ କରିଥିଲେ । ଏପରିକି ଇଂଲଣ୍ଡ ବିପକ୍ଷ ଗତ ଘରୋଇ ସୀମିତ ଓଭର ସିରିଜ ସମୟରେ ସେ ବଟଲରଙ୍କୁ ସାକ୍ଷାତ କରି ଏ ବିଷୟରେ ଜଣାଇଥିଲେ । ମେଗା ନିଲାମରେ ଗୁଜରାଟ ଟାଇଟନ୍ସ ୧୫.୭୫ କୋଟି ଟଙ୍କାରେ ବଟଲରଙ୍କୁ କିଣିଥିଲା । ସେ ଦଳ ପକ୍ଷରୁ ୫୩୮ ରନ ସଂଗ୍ରହ କରିଥିଲେ ।
