ଇସଲାମାବାଦ: ପାକିସ୍ତାନ ଏବଂ ଚୀନ୍ ମଧ୍ୟରେ ଥିବା ସଂପର୍କ ଏବେ ଭାଙ୍ଗିବାକୁ ଯାଉଛି । ଟଙ୍କା ପାଇଁ ଦୁଇ ଦେଶର ସଂପର୍କରେ ଫାଟ ସୃଷ୍ଟି ହୋଇଛି । ନିକଟତମ ପ୍ରତିଯୋଗୀ ପାକିସ୍ତାନକୁ ଧମକ ଦେଇଛି ଚୀନ୍ । ପ୍ରାୟ ୨୦୫୦ କୋଟି ଟଙ୍କା ବକେୟା ବିଲକୁ ନେଇ ଦୁଇ ବନ୍ଧୁ ରାଷ୍ଟ୍ରଙ୍କ ମଧ୍ୟରେ ତିକ୍ତତା ଆରମ୍ଭ ହୋଇଛି । ଚୀନ୍ ପାଖରୁ ବିଜୁଳି ଏବଂ ଗ୍ୟାସ୍ ଆମଦାନୀ କରୁଥିବା ବେଳେ ବିଲ୍ ପୈଠ କରିନାହିଁ । ଏହି ବିଲ୍ ଏବେ ୨୦୫୦ କୋଟିରୁ ଅଧିକ ହୋଇଗଲାଣି ।
ସେପଟେ ବକେୟା ବିଲ୍ ପରିଶୋଧ ନକଲେ ବିଦେଶୀ ଫଣ୍ଡ ବନ୍ଦ କରିଦେବ ବୋଲି ଧମକ ଦେଇଛି ବେଜିଂ । ଚୀନ୍ ପାକିସ୍ତାନକୁ କଡ଼ା ଚେତାବନୀ ଦେଇ କହିଛି ଯେ, ୟୁନାଇଟେଡ୍ ଏନର୍ଜି ପାକିସ୍ତାନ (UEP)କୁ ବକେୟା ଦେୟ ତୁରନ୍ତ ପ୍ରଦାନ କରାଯାଉ। ପାକିସ୍ତାନର ଏଭଳି କାର୍ଯ୍ୟ, କେବଳ ଅନ୍ତର୍ଜାତୀୟ ନିବେଶକଙ୍କ ବିଶ୍ୱାସକୁ କ୍ଷୁର୍ଣ୍ଣ କରିବ ନାହିଁ ବରଂ ଭବିଷ୍ୟତର ନିବେଶ ପଥକୁ ମଧ୍ୟ ଅବରୋଧ କରିପାରେ।
ଦି ନ୍ୟୁଜରେ ପ୍ରକାଶିତ ଏକ ରିପୋର୍ଟ ଅନୁଯାୟୀ, ବେଜିଂରେ ଥିବା ପାକିସ୍ତାନୀ ରାଷ୍ଟ୍ରଦୂତ ତାଙ୍କ ସରକାରଙ୍କୁ ଏକ ‘ଜରୁରୀ ନୋଟ୍’ ପଠାଇଛନ୍ତି। ନୋଟରେ ସ୍ପଷ୍ଟ ଭାବରେ ଉଲ୍ଲେଖ ଅଛି ଯେ, ଯଦି ଟଙ୍କା ନ ମିଳେ, ତେବେ କମ୍ପାନୀର କାର୍ଯ୍ୟ ବନ୍ଦ ହୋଇପାରେ। ଏହି ପରିସ୍ଥିତି ସିଧାସଳଖ ପାକିସ୍ତାନର ଶକ୍ତି ଯୋଗାଣକୁ ପ୍ରଭାବିତ କରିବ।
ପୂରା ମାମଲା କ’ଣ ?
ପାକିସ୍ତାନର ସ୍ପେଶାଲ୍ ଇନଭେଷ୍ଟମେଣ୍ଟ ଫ୍ୟାସିଲିଟେସନ୍ କାଉନସିଲ୍ (SIFC) ମଧ୍ୟ ଏହି ମାମଲାରେ ହସ୍ତକ୍ଷେପ କରିଛି । ବିଦେଶୀ ନିବେଶକଙ୍କ ବିଶ୍ୱାସ ଫେରାଇ ଆଣିବା ପାଇଁ ଏହି ବକେୟା ରାଶି ତୁରନ୍ତ ପରିଶୋଧ କରିବାକୁ ପରିଷଦ ସରକାରଙ୍କୁ ଅନୁରୋଧ କରିଛି। ସୁଇ ଦକ୍ଷିଣ ଗ୍ୟାସ କମ୍ପାନୀ (SSGC) ଯୁକ୍ତି ଦେଇଛି ଯେ, ଦେୟ ଦେବାକୁ ଚାହୁଁଥିଲେ ମଧ୍ୟ ତା ପାଖରେ ପାଣ୍ଠିର ଅଭାବ ଅଛି। ଏସଏସଜିସିର ଫେଡେରାଲ ବୋର୍ଡ ଅଫ୍ ରେଭିନ୍ୟୁ (FBR) ପାଖରେ କୋଟି କୋଟି ଟଙ୍କା ରିଫଣ୍ଡ ପଡ଼ି ରହିଛି। କମ୍ପାନୀ କହିଛି ଯେ, ସରକାର ପୁରୁଣା ରିଫଣ୍ଡ ନଦେବା ପର୍ଯ୍ୟନ୍ତ ଏହା ଚୀନ୍ କମ୍ପାନୀର ବକେୟା ଦେବା ସ୍ଥିତିରେ ନାହିଁ।
