ସାବାଲେଙ୍କା କହିଛନ୍ତି, “ଏହି ମୁହୂର୍ତ୍ତରେ ମୁଁ କେବଳ ଟେନିସ୍ ଛାଡ଼ିବାକୁ ଚାହୁଁଛି । କିଛି ଦିନ ପରେ ଦେଖିବା କ’ଣ ହେଉଛି । ଆଶା କରୁଛି ମୁଁ ମାନସିକ ସ୍ତରରେ ପୁଣି ଥରେ ଟ୍ରାକକୁ ଫେରିବି ।”
Published By: Ajit – Prameya-News7 Bureau | June 04, 2026 08:44 PM
NEWS7
ନୂଆଦିଲ୍ଲୀ: ବିଶ୍ୱର ନମ୍ବର ୧ ଟେନିସ୍ ଖେଳାଳି ଆରିନା ସାବାଲେଙ୍କାଙ୍କ ପ୍ରଥମ ଫ୍ରେଞ୍ଚ ଓପନ୍ ଟାଇଟଲ୍ ଜିତିବାର ସ୍ୱପ୍ନ ଏକ ନାଟକୀୟ ମୋଡ଼ରେ ଶେଷ ହୋଇଛି । ଶକ୍ତିଶାଳୀ ଅଗ୍ରଣୀ ହାସଲ କରିବା ପରେ ମଧ୍ୟ କ୍ୱାର୍ଟର ଫାଇନାଲରେ ସେ ଏକ ଆଶ୍ଚର୍ଯ୍ୟଜନକ ପରାଜୟର ସମ୍ମୁଖୀନ ହେଲେ । ଡାଏନା ସ୍ନାଇଡରଙ୍କ ବିରୋଧରେ ସାବାଲେଙ୍କା ପ୍ରଥମ ସେଟ୍ ଜିତିବା ସହ ଦ୍ୱିତୀୟ ସେଟରେ ୪-୧ରେ ଆଗୁଆ ରହି ମ୍ୟାଚ୍ ଉପରେ ପୂରା ନିୟନ୍ତ୍ରଣ ରଖିଥିଲେ । ଏପରିକି ମ୍ୟାଚ୍ ଜିତିବା ପାଇଁ ସର୍ଭିସ୍ କରୁଥିବା ବେଳେ ସେ ବିଜୟଠାରୁ ମାତ୍ର ଦୁଇ ପଏଣ୍ଟ ଦୂରରେ ଥିଲେ । ତେବେ ବେଲାଋଷର ଏହି ଖେଳାଳି ନିଜର ଲୟ ହରାଇଥିଲେ ଏବଂ ସ୍ନାଇଡର୍ ଏକ ଚମତ୍କାର କମବ୍ୟାକ୍ କରି ୩-୬, ୭-୫, ୬-୦ରେ ବିଜୟୀ ହୋଇ ନିଜର ପ୍ରଥମ ଗ୍ରାଣ୍ଡ ସ୍ଲାମ ସେମିଫାଇନାଲରେ ପ୍ରବେଶ କରିଛନ୍ତି ।
ଏହି ପରାଜୟ ପରେ ସାବାଲେଙ୍କା ସମ୍ପୂର୍ଣ୍ଣ ଭାବେ ଭାଙ୍ଗି ପଡ଼ିଥିବା ଦେଖିବାକୁ ମିଳିଥିଲା । ବଡ଼ ମଞ୍ଚରେ ଆଉ ଏକ ବିପର୍ଯ୍ୟୟ ପରେ ସେ ନିଜର ମାଇଣ୍ଡ ସେଟ୍ ଉପରେ ପ୍ରଶ୍ନ ଉଠାଇଥିଲେ । ସାବାଲେଙ୍କା କହିଛନ୍ତି, “ଏହି ମୁହୂର୍ତ୍ତରେ ମୁଁ କେବଳ ଟେନିସ୍ ଛାଡ଼ିବାକୁ ଚାହୁଁଛି । କିଛି ଦିନ ପରେ ଦେଖିବା କ’ଣ ହେଉଛି । ଆଶା କରୁଛି ମୁଁ ମାନସିକ ସ୍ତରରେ ପୁଣି ଥରେ ଟ୍ରାକକୁ ଫେରିବି ।”
— TNT Sports U.S. (@TNTSportsUS) June 3, 2026
ଗତ ବର୍ଷ ଫ୍ରେଞ୍ଚ ଓପନ୍ ଫାଇନାଲରେ କୋକୋ ଗଫ୍ଙ୍କ ଠାରୁ ସାବଲେଙ୍କା ପରାଜିତ ହୋଇଥିଲେ । ଏହି ମ୍ୟାଚରେ ପରାଜୟ ଗତ ବର୍ଷର ପରାଜୟର ଯନ୍ତ୍ରଣାକୁ ସତେଦ କରିଦେଇଛି । ସ୍ନାଇଡରଙ୍କ ବିରୋଧରେ ଖେଳିବା ବେଳେ ସାବଲେଙ୍କା ଭୁଲ୍ ପରେ ଭୁଲ୍ କରି ହତାଶ ହୋଇପଡ଼ିଥିଲେ । ସେ ଶେଷ ୧୩ଟି ଗେମ୍ ମଧ୍ୟରୁ ୧୨ଟିରେ ପରାଜିତ ହୋଇଥିଲେ ।
ପରାଜୟ ଉପରେ ପ୍ରତିକ୍ରିୟା ଦେଇ ସେ ଆହୁରି କହିଛନ୍ତି, “ମୁଁ ଭାବୁଛି ଏହା ସବୁକିଛିର ଏକ ସମ୍ମିଶ୍ରଣ । ଆପଣ ଅଧିକ ଚିନ୍ତା କରନ୍ତି, ତା’ପରେ ସହଜ ଭୁଲ୍ କରନ୍ତି ଏବଂ ଶେଷରେ ସୁଯୋଗ ହାତଛଡ଼ା କରନ୍ତି ।” ସ୍ନାଇଡର୍ ସ୍ୱୀକାର କରିଛନ୍ତି ଯେ ସେ ମ୍ୟାଚ୍ ସମୟରେ ପ୍ରତିପକ୍ଷଙ୍କ ଭାବପ୍ରବଣତାକୁ ଲକ୍ଷ୍ୟ କରିଥିଲେ କିନ୍ତୁ ନିଜ ଖେଳ ଉପରେ ଧ୍ୟାନ କେନ୍ଦ୍ରିତ କରିଥିଲେ । ସ୍ନାଇଡର୍ କହିଛନ୍ତି, “ନିଶ୍ଚିତ ଭାବରେ ମୁଁ ତାଙ୍କର ହତାଶାର କିଛି ମୁହୂର୍ତ୍ତ ଦେଖିଥିଲି । ମୁଁ ଆରିନାଙ୍କୁ ଜାଣେ, ସେ ଜଣେ ଭାବପ୍ରବଣ ବ୍ୟକ୍ତି ।”
ଏହି ଟୁର୍ଣ୍ଣାମେଣ୍ଟରେ ଅନେକ ବଡ଼ ବିପର୍ଯ୍ୟୟ ଦେଖିବାକୁ ମିଳିଛି, ଯେଉଁଥିରେ ଡିଫେଣ୍ଡିଂ ଚାମ୍ପିଅନ୍ କୋକୋ ଗଫ୍, ଚାରିଥରର ବିଜେତା ଇଗା ସ୍ୱିଆଟେକ୍, ଜାନିକ୍ ସିନର୍ ଏବଂ ନୋଭାକ ଜୋକୋଭିକ୍ ସମସ୍ତେ ବାଦ୍ ପଡ଼ିଛନ୍ତି । ‘ଅପ୍ଟା’ ଅନୁଯାୟୀ, ୧୯୭୭ ଫ୍ରେଞ୍ଚ ଓପନ୍ ପରେ ଏହା ହେଉଛି ପ୍ରଥମ ଗ୍ରାଣ୍ଡ ସ୍ଲାମ ଯେଉଁଠାରେ ପୁରୁଷ କିମ୍ବା ମହିଳା ସେମିଫାଇନାଲରେ କୌଣସି ପୂର୍ବତନ ଚାମ୍ପିଅନ୍ ନାହାନ୍ତି।
