ଆମେରିକାର ଦୋମୁହାଁ ନୀତି। ଋଷ୍ ସହ ନିଜେ କରୁଛି ବ୍ୟବସାୟ, ଭାରତ କଲେ ରାଗୁଛି। ଟାରିଫ ଧମକ ଦେଇ ଡରଉଛି। କିନ୍ତୁ ଭାରତ ଏହା ମଧ୍ୟ କହିଛି ଯେ ସେ ଆମେରିକାର ଚାପ ଆଗରେ ମୁଣ୍ଡ ନଇଁବ ନାହିଁ।
ନିଜେ ବେପାର କରୁଛି, ଆଉ କେହି କଲେ ସହିପାରୁନି। ଆମେରିକା ଦେଖାଇ ହେଉଛି ଋଷିଆ ସହ ସେ ସମ୍ପର୍କ ରଖେନି। ହେଲେ ଭିତରେ ଭିତରେ କରୁଛି ବଢିଆ ବେପାର। ତେଲକୁ ନେଇ ଭାରତ ସହ ଖେଳ ଖେଳୁଛି ଆମେରିକା। ଉପରେ ଗୋଟିଏ, ଭିତରେ ଆଉ ଏକ ରୂପ ଦେଖାଉଛି। ତେଲକୁ ନେଇ ଭାରତକୁ ଜ୍ଞାନ ଦେଉଛି। ଭାରତ-ରୁଷର ବନ୍ଧୁତାକୁ ସହିପାରୁନି। ରୁଷରୁ ତେଲ ନ କିଣିବା ପାଇଁ ଆମେରିକା ଭାରତ ଉପରେ ଚାପ ପକାଉଛି। ସେ ଛଳନା କରି କହୁଛି, ରୁଷ ତେଲରୁ ଆସୁଥିବା ଟଙ୍କାକୁ ୟୁକ୍ରେନ ବିରୁଦ୍ଧରେ ଯୁଦ୍ଧରେ ବ୍ୟବହାର କରୁଛି। ହେଲେ ସେ ନିଜେ ରୁଷ୍ ସହିତ ବ୍ୟବସାୟିକ ସମ୍ପର୍କ ରଖୁଛି। ଏହା ଆମେରିକାର ଦୋମୁହାଁ ନୀତିକୁ ସ୍ପଷ୍ଟ କରୁଛି।
କିନ୍ତୁ ଭାରତ ଏହା ମଧ୍ୟ କହିଛି ଯେ ସେ ଆମେରିକାର ଚାପ ଆଗରେ ମୁଣ୍ଡ ନଇଁବ ନାହିଁ। ଆମେରିକାର ଦୋମୁହାଁ ନୀତିକୁ ନେଇ ଭାରତ କହିଛି ଯେ ସେ ଦେଶ ଆମକୁ କ’ଣ ଜ୍ଞାନ ଦେବ ଯିଏ ନିଜେ ରୁଷ ସହିତ କୋଟି କୋଟି ଡଲାରର ବ୍ୟବସାୟ କରୁଛି। ଯଦି ଆମେ ବାସ୍ତବତାକୁ ଦେଖିବା, ତେବେ ଏତେ ହଙ୍ଗାମା ସତ୍ତ୍ୱେ, ଆମେରିକା ରୁଷ ସହିତ ତା’ର ସମ୍ପର୍କ ଶେଷ କରିନାହିଁ ବୋଲି ଆମେରିକାକୁ ଚେତେଇ ଦେଇଛି ଭାରତ।
ଆମେରିକା ଏବେ ବି ରୁଷରୁ ଏହାର ପରମାଣୁ ଶିଳ୍ପ ପାଇଁ ୟୁରାନିୟମ ହେକ୍ସା-ଫ୍ଲୋରାଇଡ୍, ଇଭି ଶିଳ୍ପ ପାଇଁ ପାଲାଡିୟମ୍, ଏବଂ ସାର ଏବଂ ରାସାୟନିକ ପଦାର୍ଥ ଆମଦାନୀ କରୁଛି। ସେହିପରି, ୟୁରୋପୀୟ ସଂଘ ମଧ୍ୟ ୨୦୨୪ ମସିହାରେ ରୁଷ ସହିତ ୬୭.୫ ବିଲିୟନ ୟୁରୋ ମୂଲ୍ୟର ସାମଗ୍ରୀ ବ୍ୟବସାୟ କରିଥିଲା।
Also Read
ଏଥିରୁ ସ୍ପଷ୍ଟ ଯେ ଆମେରିକା ଏଥିରେ ବି ନିଜର ସ୍ୱାର୍ଥ ପୂରଣ କରିବାକୁ ଚେଷ୍ଟା କରୁଛି। ଯଦି ସେ ଏତେ ସଚ୍ଚୋଟ ହୋଇଥାନ୍ତା, ତେବେ ସେ ପ୍ରଥମେ ରୁଷ ସହିତ ବ୍ୟବସାୟିକ ସମ୍ପର୍କ ଶେଷ କରିଥାନ୍ତା ଏବଂ ତା’ପରେ ଭାରତକୁ ପରାମର୍ଶ ଦେଇଥାନ୍ତା ବୋଲି ଭାରତ କହିଛନ୍ତି।
