ବେଙ୍ଗାଲୁରୁ: ଇ-କମର୍ସ କମ୍ପାନୀ ଆମାଜନ ଫେବୃଆରୀ ୨୩ ତାରିଖରେ ବେଙ୍ଗାଲୁରୁର ଉପକଣ୍ଠରେ ଥିବା କାଟିଗେନାହାଲ୍ଲିରେ ଏସିଆର ଦ୍ୱିତୀୟ ସର୍ବବୃହତ ଅଫିସ୍ ଖୋଲିଛି। ୧୧ ଲକ୍ଷ ସ୍କୋୟାର ଫିଟ୍ ପରିବ୍ୟାପ୍ତ ଏହି ୧୨ ମହଲା ବିଶିଷ୍ଟ କ୍ୟାମ୍ପସରେ ଅନେକ ଅତ୍ୟାଧୁନିକ ସୁବିଧା ରହିଛି। ଏହି କାର୍ଯ୍ୟାଳୟରେ ଇ-କମର୍ସ, ଅପରେସନ୍ସ, ପେମେଣ୍ଟ, ଟେକ୍ନୋଲୋଜୀ ଓ ସେଲର ସର୍ଭିସେସ୍ ଭଳି ବିଭାଗରେ ୭,୦୦୦ ରୁ ଅଧିକ କର୍ମଚାରୀ ଏକା ସାଂଗରେ କାମ କରିବେ।
୨୦୩୦ ସୁଦ୍ଧା ଆଉ₹୩.୨୦ ଲକ୍ଷ କୋଟି ନିବେଶ କରିବ। କମ୍ପାନୀ
ଆମାଜନର ଏହି ନୂଆ କ୍ୟାମ୍ପସ୍ ପ୍ରାୟ ୫ ଏକର ଜମିରେ ତିଆରି ହୋଇଛି। ଆମାଜନର ଗ୍ଲୋବାଲ୍ ଆଫେୟାର୍ସ ଏବଂ ଲିଗାଲ୍ ଅଫିସର ଡେଭିଡ୍ ଜାପୋଲସ୍କି କହିଛନ୍ତି ଯେ ଭାରତରେ ଟେକ୍ନୋଲୋଜୀ ଅପଣାଇବାର ଗତି ଏବଂ ଏଆଇ ପ୍ରତି ଯେପରି ଉତ୍ସାହ ରହିଛି ବିଶ୍ୱର ଅନ୍ୟ କୌଣସି ଦେଶରେ ନାହିଁ। ସେ କହିଛନ୍ତି ଯେ ଆମାଜନ ଏପର୍ଯ୍ୟନ୍ତ ଭାରତରେ ଏହାର ସମସ୍ତ ବ୍ୟବସାୟରେ ୪୦ ବିଲିୟନ ଡଲାର (ପ୍ରାୟ ୩.୬୦ ଲକ୍ଷ କୋଟି ଟଙ୍କା) ନିବେଶ କରିସାରିଛି। କମ୍ପାନୀ ୨୦୩୦ ସୁଦ୍ଧା ଅତିରିକ୍ତ ୩୫ ବିଲିୟନ ଡଲାର (ପ୍ରାୟ ୩.୨୦ ଲକ୍ଷ କୋଟି ଟଙ୍କା) ନିବେଶ କରିବାକୁ ପ୍ରତିଶ୍ରୁତି ଦେଇଛି।
ଡେଭିଡ୍ ଜାପୋଲସ୍କି ଆହୁରି କହିଛନ୍ତି ଯେ ଭାରତର ଦ୍ରୁତ ଗତିଶୀଳ ସହରଗୁଡ଼ିକ ପାଇଁ ଡିଜାଇନ୍ କରାଯାଇଥିବା କ୍ୱିକ୍ କମର୍ସ ଆଉଟଲେଟ୍ ଆମାଜନ ନାଓଁ (Amazon Now) ବହୁତ ସଫଳ ହୋଇଛି। କମ୍ପାନୀ ଏବେ ଏହି ଭାରତୀୟ ମଡେଲକୁ ମଧ୍ୟପ୍ରାଚ୍ୟ, ଉତ୍ତର ଆମେରିକା, ୟୁରୋପ ଏବଂ ଲାଟିନ୍ ଆମେରିକା ଭଳି ବଜାରରେ ବିସ୍ତାର କରୁଛି ବୋଲି ସେ କହିଛନ୍ତି।
ବେଙ୍ଗାଲୁରୁ ଏକ ବିଶ୍ୱସ୍ତରୀୟ ନବସୃଜନକେନ୍ଦ୍ର(ଗ୍ଲୋବାଲ ଇନୋଭେସନ ହବ)ଭାବରେ ଉଭା ହୋଇଛି:ମନ୍ତ୍ରୀ ଏମବି ପାଟିଲ
କର୍ଣ୍ଣାଟକର ଭାରୀ ଏବଂ ମଧ୍ୟମ ଶିଳ୍ପ ମନ୍ତ୍ରୀ ଏମ.ବି. ପାଟିଲ ମଧ୍ୟ କ୍ୟାମ୍ପସ ଉଦଘାଟନ ଉତ୍ସବରେ ଯୋଗ ଦେଇଥିଲେ। ସେ କହିଥିଲେ ଯେ ବେଙ୍ଗାଲୁରୁରେ ଆମାଜନର ନିରନ୍ତର ନିବେଶ ଏକ ବିଶ୍ୱ ପ୍ରଯୁକ୍ତିବିଦ୍ୟା ଏବଂ ନବସୃଜନ କେନ୍ଦ୍ର ଭାବରେ ଭାରତର ବଢ଼ୁଥିବା ଶକ୍ତିକୁ ପ୍ରଦର୍ଶନ କରୁଛି। ସେ କହିଥିଲେ ଯେ ଏତେ ବଡ଼ କ୍ୟାମ୍ପସ କେବଳ ନିଯୁକ୍ତି ସୃଷ୍ଟି କରେ ନାହିଁ ବରଂ ସ୍ଥାନୀୟ ଇକୋସିଷ୍ଟମ ଏବଂ ଦେଶର ଡିଜିଟାଲ୍ ଅର୍ଥନୀତିକୁ ମଧ୍ୟ ସୁଦୃଢ଼ କରେ।
