ମମତା ବାନାର୍ଜୀଙ୍କ ପକ୍ଷରୁ ୟୁସୁଫ ପଠାନଙ୍କୁ ଇସ୍ତଫା ଦେବାକୁ କହିଥିଲେ କି ଗାଙ୍ଗୁଲି ? ଜବାବ ଦେଲେ ପୂର୍ବତନ ଅଧିନାୟକ

କୋଲକାତା: ଭାରତୀୟ କ୍ରିକେଟ ଦଳର ପୂର୍ବତନ ଅଧିନାୟକ ସୌରଭ ଗାଙ୍ଗୁଲି ନିଜକୁ ନେଇ ଚାଲିଥିବା ଏକ ବଡ଼ ରାଜନୈତିକ ଚର୍ଚ୍ଚା ଉପରେ ସ୍ପଷ୍ଟୀକରଣ ଦେଇଛନ୍ତି। ପଶ୍ଚିମବଙ୍ଗର ପୂର୍ବତନ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ତରଫରୁ ସେ ସାଂସଦ ୟୁସୁଫ୍ ପଠାନଙ୍କୁ ଇସ୍ତଫା ଦେବା ପାଇଁ କହିଥିବା ଖବରକୁ ଗାଙ୍ଗୁଲି ସମ୍ପୂର୍ଣ୍ଣ ମିଥ୍ୟା ଓ ଭିତ୍ତିହୀନ ବୋଲି କହିଛନ୍ତି। ଗଣମାଧ୍ୟମରେ ଏକ ରିପୋର୍ଟ ପ୍ରକାଶ ପାଇଥିଲା ଯେ, ମମତା ବାନାର୍ଜୀଙ୍କୁ ବହରମପୁର ଲୋକସଭା ଆସନରୁ ଉପ-ନିର୍ବାଚନ ଲଢ଼ାଇବା ପାଇଁ ଯୋଜନା ଚାଲିଛି। ଏଥିପାଇଁ ସୌରଭ ଗାଙ୍ଗୁଲି ଜଣେ ମଧ୍ୟସ୍ଥି ଭାବରେ କାର୍ଯ୍ୟ କରି ମମତାଙ୍କ ବାର୍ତ୍ତା ନେଇ ୟୁସୁଫ୍ ପଠାନଙ୍କ ପାଖକୁ ଯାଇଥିଲେ ଏବଂ ତାଙ୍କୁ ନିଜ ସାମ୍ବିଧାନିକ ପଦବୀରୁ ଇସ୍ତଫା ଦେବାକୁ କହିଥିଲେ।

ଅଭିଯୋଗକୁ ଖଣ୍ଡନ କଲେ ଗାଙ୍ଗୁଲି

ଏହି ଗୁଜବ ଉପରେ ନିଜର ପ୍ରତିକ୍ରିୟା ରଖି ସୌରଭ ଗାଙ୍ଗୁଲି ଏକ ବିବୃତ୍ତି ଜାରି କରିଛନ୍ତି। ସେ କହିଛନ୍ତି, ‘ପଶ୍ଚିମବଙ୍ଗର ପୂର୍ବତନ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ତରଫରୁ ମୁଁ ୟୁସୁଫ୍ ପଠାନଙ୍କୁ ଯୋଗାଯୋଗ କରିଥିଲି ଏବଂ ଉପ-ନିର୍ବାଚନ ପାଇଁ ତାଙ୍କୁ ଇସ୍ତଫା ଦେବାକୁ କହିଥିଲି ବୋଲି ଯେଉଁ ଅଭିଯୋଗ ହେଉଛି, ତାହା ସମ୍ପୂର୍ଣ୍ଣ ଅସତ୍ୟ ଓ ଭିତ୍ତିହୀନ।’ ସେ ଆହୁରି ମଧ୍ୟ କହିଛନ୍ତି ଯେ, ଏଭଳି ଦାୟିତ୍ୱହୀନ ଖବର ପ୍ରକାଶ ପାଇବା ଅତ୍ୟନ୍ତ ଦୁର୍ଭାଗ୍ୟଜନକ। ରିପୋର୍ଟ ପ୍ରକାଶ କରିବା ପୂର୍ବରୁ ସତ୍ୟାସତ୍ୟ ଜାଣିବା ପାଇଁ କୌଣସି ଚେଷ୍ଟା କରାଯାଇ ନାହିଁ ଏବଂ ସତ୍ୟକୁ ସମ୍ପୂର୍ଣ୍ଣ ଅଣଦେଖା କରି ଏଭଳି ମିଥ୍ୟା କାହାଣୀ ପ୍ରସ୍ତୁତ କରାଯାଇଛି।

Former Captain of the Indian Cricket Team, Sourav Ganguly, says, “…It was alleged that I had contacted Mr Yusuf Pathan on behalf of Mamta Banerjee, the former Chief Minister of West Bengal and had carried her message that he should step down/resign from his Constitutional post… pic.twitter.com/0RkRsRhYfo

— ANI (@ANI) June 6, 2026

ଗାଙ୍ଗୁଲି ସ୍ପଷ୍ଟ ଭାବରେ ଜଣାଇଛନ୍ତି ଯେ, ମମତା ବାନାର୍ଜୀ ତାଙ୍କୁ କେବେ ହେଲେ ୟୁସୁଫ୍ ପଠାନଙ୍କ ପାଖକୁ କୌଣସି ବାର୍ତ୍ତା ପଠାଇବାକୁ ଅନୁରୋଧ କରିନାହାନ୍ତି। ଗାଙ୍ଗୁଲି କହିଛନ୍ତି ଯେ, ଯେତେବେଳେ ଏଭଳି କୌଣସି ଆଲୋଚନା ହିଁ ହୋଇନାହିଁ, ସେତେବେଳେ ରିପୋର୍ଟରେ କୁହାଯାଇଥିବା ୟୁସୁଫ୍ ପଠାନଙ୍କ ପ୍ରତିକ୍ରିୟାକୁ ନେଇ କୌଣସି ପ୍ରଶ୍ନ ହିଁ ଉଠୁନାହିଁ। ନିଜର ଆଭିମୁଖ୍ୟ ସ୍ପଷ୍ଟ କରି ପୂର୍ବତନ ଅଧିନାୟକ କହିଛନ୍ତି, ‘ମୁଁ ମୋ ଜୀବନର କୌଣସି ସ୍ତରରେ କେବେ ବି କାହା ସହିତ କୌଣସି ରାଜନୈତିକ ମାମଲାରେ ଜଡ଼ିତ ରହିନାହିଁ।’

ପଶ୍ଚିମବଙ୍ଗର ବହରମପୁର ଲୋକସଭା ଆସନକୁ ନେଇ ଗତ କିଛି ଦିନ ହେବ ବିଭିନ୍ନ ପ୍ରକାର କଳ୍ପନାଜଳ୍ପନା ଚାଲିଛି। ମମତା ବାନାର୍ଜୀଙ୍କୁ ସଂସଦକୁ ପଠାଇବା ପାଇଁ ଏହି ଆସନରୁ ଉପ-ନିର୍ବାଚନ କରାଯିବା ନେଇ ଚର୍ଚ୍ଚା ହେଉଥିଲା, ଯାହାକୁ କେନ୍ଦ୍ର କରି ସୌରଭ ଗାଙ୍ଗୁଲିଙ୍କ ନାମ ଏହି ବିବାଦ ଭିତରକୁ ଟଣାଯାଇଥିଲା। ତେବେ ଗାଙ୍ଗୁଲିଙ୍କ ଏହି କଡ଼ା ଜବାବ ପରେ ଏହି ସମସ୍ତ ଗୁଜବ ଉପରେ ଏବେ ପୂର୍ଣ୍ଣଚ୍ଛେଦ ପଡ଼ିଛି।