୨ ଲକ୍ଷ ଟଙ୍କାରେ ବି କେ.ଏଲ୍ ରାହୁଲଙ୍କୁ କିଣିଲେନି କେହି, ଜାଣନ୍ତୁ କାହିଁକି ଏମିତି ହେଲା

ବେଙ୍ଗାଲୁରୁ: ଭାରତୀୟ ଟିମର ଷ୍ଟାର୍ ଖେଳାଳି କେ.ଏଲ୍.ରାହୁଲ ହେଲେନି ବିକ୍ରି । ଭାରତୀୟ ଟେଷ୍ଟ ଦଳର ଉପ-ଅଧିନାୟକ କେ.ଏଲ୍ ରାହୁଲ ଶୁକ୍ରବାର ଅନୁଷ୍ଠିତ ମହାରାଜା ଟ୍ରଫି ୨୦୨୬ ନିଲାମରେ ଅନସୋଲ୍ଡ  ରହିଛନ୍ତି । ସେ ଏହି ନିଲାମରେ ସବୁଠାରୁ ବଡ଼ ଖେଳାଳିମାନଙ୍କ ମଧ୍ୟରୁ ଜଣେ ଥିଲେ । ନିକଟରେ ଶେଷ ହୋଇଥିବା ଆଇପିଏଲ୍ ୨୦୨୬ରେ ଦିଲ୍ଲୀ କ୍ୟାପିଟାଲ୍ସ ପାଇଁ ୧୪ଟି ମ୍ୟାଚରୁ ୫୯୩ ରନ୍ ସଂଗ୍ରହ କରିଥିବା ରାହୁଲ, ଏହି ନିଲାମ ପ୍ରକ୍ରିୟାରେ ଦ୍ଵିତୀୟ ଖେଳାଳି ଭାବେ ଆସିଥିଲେ । କିନ୍ତୁ ପ୍ରଥମ ରାଉଣ୍ଡରେ ଛଅଟି ଫ୍ରାଞ୍ଚାଇଜ୍ ମଧ୍ୟରୁ କେହି ମଧ୍ୟ ତାଙ୍କୁ କିଣିବାକୁ ଇଚ୍ଛା ପ୍ରକାଶ କରି ନ ଥିଲେ । ତେବେ ଏହା ପଛର ସବୁଠୁ ବଡ଼ କାରଣ ହେଉଛି ଏହି ଟୁର୍ନାମେଣ୍ଟରେ ତାଙ୍କର ଉପଲବ୍ଧତା ଅନିଶ୍ଚିତ ରହିଛି ।

୩୩ ବର୍ଷୀୟ ଏହି ଖେଳାଳି ୨ ଲକ୍ଷ ଟଙ୍କାର ବେସ୍ ପ୍ରାଇସ୍ ସହ ନିଲାମରେ ସାମିଲ ହୋଇଥିଲେ । ରାହୁଲ ବର୍ତ୍ତମାନ ନିଉ ଚଣ୍ଡୀଗଡ଼ରେ ଆଫଗାନିସ୍ତାନ ବିପକ୍ଷରେ ହେବାକୁ ଥିବା ଏକମାତ୍ର ଟେଷ୍ଟ ମ୍ୟାଚ୍ ପାଇଁ ଭାରତୀୟ ଦଳରେ ଅଛନ୍ତି ଏବଂ ତାଙ୍କୁ ଉପ-ଅଧିନାୟକ କରାଯାଇଛି । ଏହା ବ୍ୟତୀତ ଆଗାମୀ ଦିନରେ ଭାରତର ଆଫଗାନିସ୍ତାନ ଦିନିକିଆ ସିରିଜ୍ ଏବଂ ଇଂଲଣ୍ଡ ଗସ୍ତ ଭଳି ଅନ୍ତର୍ଜାତୀୟ ମ୍ୟାଚଗୁଡ଼ିକରେ ମଧ୍ୟ ସେ ସାମିଲ ହେବାର ସମ୍ଭାବନା ରହିଛି । ଆସନ୍ତା ତିନି ମାସ ପର୍ଯ୍ୟନ୍ତ ବ୍ୟସ୍ତବହୁଳ ଅନ୍ତର୍ଜାତୀୟ ସେଡ୍ୟୁଲ୍ ଥିବାରୁ, ଫ୍ରାଞ୍ଚାଇଜଗୁଡ଼ିକ ତାଙ୍କୁ କିଣିବା ପାଇଁ ଇଚ୍ଛା ପ୍ରକାଶ କଲେ ନାହିଁ ।

ନିଲାମ ପୂର୍ବରୁ ରାହୁଲଙ୍କୁ ନେଇ ବେଶ୍ ଚର୍ଚ୍ଚା ହେଉଥିଲା, କିନ୍ତୁ ସେ ଅନସୋଲ୍ଡ ରହିବା ପଛରେ ତାଙ୍କର ଫର୍ମ ନୁହେଁ ବରଂ ଉପଲବ୍ଧତାକୁ ନେଇ ଅନିଶ୍ଚିତତା ହିଁ ମୁଖ୍ୟ କାରଣ । ଦିଲ୍ଲୀ କ୍ୟାପିଟାଲ୍ସ ସହ ଦୁଇ ମାସର ଆଇପିଏଲ୍ ଅଭିଯାନ ଶେଷ କରିବା ପରେ, ସେ ବର୍ତ୍ତମାନ ଜାତୀୟ ଦଳର ଦାୟିତ୍ଵ ଏବଂ ଏକାଧିକ ଅନ୍ତର୍ଜାତୀୟ ମ୍ୟାଚ୍‌କୁ ଦୃଷ୍ଟିରେ ରଖି ନିଜର କାର୍ଯ୍ୟଭାର ପରିଚାଳନା ଉପରେ ଧ୍ୟାନ ଦେଉଛନ୍ତି ।

ଅନ୍ୟପଟେ ନିଲାମରେ କର୍ଣ୍ଣାଟକର ଅନେକ ଖେଳାଳି ଦେବଦତ୍ତ ପାଡିକ୍କଲ, ମୟଙ୍କ ଅଗ୍ରୱାଲ, ବିଜୟକୁମାର ବୈଶାଖ, ଶ୍ରେୟସ ଗୋପାଳ, କରୁଣ ନାୟାର ଏବଂ ମନୀଷ ପାଣ୍ଡେ ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲେ । ସୂଚନାଯୋଗ୍ୟ ଯେ, ମହାରାଜା ଟ୍ରଫି KSCA ଟି-୨୦ର ପଞ୍ଚମ ସଂସ୍କରଣ ଆସନ୍ତା ଜୁନ୍ ୧୨ରୁ ଜୁଲାଇ ୧୨ ପର୍ଯ୍ୟନ୍ତ ମହୀଶୂର, ହୁବଳୀ ଏବଂ ବେଙ୍ଗାଲୁରୁରେ ଖେଳାଯିବ ।