ଚେନ୍ନାଇ / ନୂଆଦିଲ୍ଲୀ: ପ୍ରସିଦ୍ଧ ଭାରତୀୟ ସଫ୍ଟୱେର୍ କମ୍ପାନୀ ‘ଜୋହୋ’ (Zoho) ୩୦୦ ଜଣ ଫ୍ରେସର୍ସଙ୍କୁ (Freshers) ହଠାତ୍ ଚାକିରିରୁ ବାହାର କରିଦେଇଥିବା ନେଇ ଏକ ପୋଷ୍ଟ ସୋସିଆଲ ମିଡିଆରେ ଖୁବ୍ ଭାଇରାଲ୍ ହେବାରେ ଲାଗିଛି। ଏହି ଘଟଣା ଭାରତୀୟ ଆଇଟି କ୍ଷେତ୍ରରେ ଏଣ୍ଟ୍ରି-ଲେଭଲ୍ ପ୍ରତିଭାଙ୍କ ଭବିଷ୍ୟତକୁ ନେଇ ଚିନ୍ତା ବଢ଼ାଇଦେଇଥିଲା। ତେବେ ଏହି ଭାଇରାଲ୍ ଅଭିଯୋଗ ଉପରେ କମ୍ପାନୀ ପକ୍ଷରୁ ସ୍ପଷ୍ଟୀକରଣ ଦିଆଯାଇଛି ଯେ କୌଣସି କର୍ମଚାରୀଙ୍କୁ ଚାକିରିରୁ ବାହାର କରାଯାଇନାହିଁ। ଜୋହୋର ଜଣେ ବରିଷ୍ଠ ଅଧିକାରୀ କହିଛନ୍ତି ଯେ, ସୋସିଆଲ ମିଡିଆରେ ଭାଇରାଲ୍ ହେଉଥିବା ପୋଷ୍ଟରେ କମ୍ପାନୀର ଇଣ୍ଟର୍ନସିପ୍ ପ୍ରୋଗ୍ରାମକୁ ପୂର୍ଣ୍ଣକାଳୀନ ଚାକିରି ବୋଲି ଭୁଲରେ ଧରିନିଆଯାଇଛି।
ଭାଇରାଲ୍ ପୋଷ୍ଟରେ କ’ଣ ଥିଲା ଅଭିଯୋଗ?
300 freshers laid off by Zoho. No notice. No explanation.
They turned down TCS, Cognizant & Capgemini for this.
One full-time employee asked “are you replacing us with trainees?” and shortly after: 300 young careers were paused.
These weren’t job hoppers. They were kids from… pic.twitter.com/gQcp0356dQ
— Dhanush N (@Dhanush_Nehru) April 14, 2026
ଏକ୍ସ (X) ରେ ବ୍ୟାପକ ଭାବେ ସେୟାର ହେଉଥିବା ଏହି ପୋଷ୍ଟଟି ଜଣେ ପ୍ରଭାବିତ ଟ୍ରେନିଙ୍କ ଆକାଉଣ୍ଟରୁ କରାଯାଇଥିବା ଦାବି କରାଯାଇଛି। ସେଥିରେ ଉଲ୍ଲେଖ ଅଛି ଯେ, ସେମାନେ ଜୋହୋ ପାଇଁ ଟିସିଏସ୍ (TCS), କଗ୍ନିଜାଣ୍ଟ (Cognizant) ଏବଂ କ୍ୟାପଜେମିନି (Capgemini) ଭଳି କମ୍ପାନୀର ଅଫର୍ ଛାଡ଼ିଦେଇଥିଲେ। କିନ୍ତୁ ଏବେ ବିନା କୌଣସି କାରଣରେ ସେମାନଙ୍କୁ ବାହାର କରିଦିଆଯାଇଛି।
- ଅଜ୍ଞାତ ଇଣ୍ଟର୍ଣ୍ଣ ଜଣକ ଲେଖିଛନ୍ତି, “ସେହି କମ୍ପାନୀଗୁଡ଼ିକରେ ବେଞ୍ଚରେ ବସିଥିଲେ ମଧ୍ୟ ମୋତେ କିଛି ସ୍ଥିରତା ମିଳିଥାନ୍ତା। ଏହି ଘଟଣା ମୋତେ ବହୁତ ବାଧିଛି। ମୁଁ ଏକ ଗରିବ ପରିବାରରୁ ଆସିଛି ଏବଂ ଏହି ଚାକିରି ଉପରେ ମୋ ପରିବାର ନିର୍ଭର କରୁଥିଲା।”
- ଜୋହୋର ସହ-ପ୍ରତିଷ୍ଠାତା ଶ୍ରୀଧର ଭେମ୍ବୁଙ୍କୁ ଟାର୍ଗେଟ୍ କରି ସେ ଲେଖିଛନ୍ତି ଯେ, ଗ୍ରାମାଞ୍ଚଳ ଏବଂ ଛୋଟ ସହରର ପିଲାଙ୍କୁ ନିଯୁକ୍ତି ଦେବା ନେଇ ବଡ଼ ବଡ଼ କଥା କୁହାଯାଉଥିବା ବେଳେ ଏପରି ବିନା କାରଣରେ ଶହ ଶହ ଯୁବ କର୍ମଚାରୀଙ୍କୁ ବାହାର କରିଦେବା ସମ୍ପୂର୍ଣ୍ଣ ଓଲଟା କାହାଣୀ ବୟାନ କରୁଛି।
ଜୋହୋର ଜବାବ: ‘ଇଣ୍ଟର୍ନସିପ୍ ଚାକିରି ନୁହେଁ’
ଏହି ଅଭିଯୋଗର ଜବାବ ରଖି ଜୋହୋର ଗ୍ଲୋବାଲ୍ ଏଚ୍ଆର୍ ଅପରେସନ୍ସର ଆସୋସିଏଟ୍ ଡାଇରେକ୍ଟର ମହମ୍ମଦ ସୋହେଲ କହିଛନ୍ତି:
- “ଏହି ପୋଷ୍ଟରେ ଆମର ଇଣ୍ଟର୍ନସିପ୍ ପ୍ରୋଗ୍ରାମକୁ ଚାକିରି ସହ ଯୋଡ଼ି ଭ୍ରମ ସୃଷ୍ଟି କରାଯାଉଛି। ଏ ଦୁଇଟି ସମ୍ପୂର୍ଣ୍ଣ ଅଲଗା: ଇଣ୍ଟର୍ନସିପ୍ ହେଉଛି କେବଳ ଶିଖିବାର ଏକ ସୁଯୋଗ, ଏହା କୌଣସି ପୂର୍ଣ୍ଣକାଳୀନ ଚାକିରିର ଗ୍ୟାରେଣ୍ଟି ଦିଏନାହିଁ।”
- ସେ ସୂଚନା ଦେଇଛନ୍ତି ଯେ, ୨୦୨୬ ବ୍ୟାଚ୍ର ୩୦ ପ୍ରତିଶତରୁ ଅଧିକ ଇଣ୍ଟର୍ଣ୍ଣଙ୍କୁ ଆଗରୁ ହିଁ ଫୁଲ୍-ଟାଇମ୍ ଚାକିରିର ଅଫର୍ ଦିଆଯାଇସାରିଛି କିମ୍ବା ସେମାନଙ୍କର ମୂଲ୍ୟାଙ୍କନ ଚାଲିଛି।
- ଯେଉଁ ଇଣ୍ଟର୍ଣ୍ଣମାନଙ୍କୁ ଚାକିରି ମିଳିନାହିଁ, ସେମାନଙ୍କୁ କମ୍ପାନୀ ‘ଛଟେଇ’ (Laid off) କରିଛି ବୋଲି କହିବା ସମ୍ପୂର୍ଣ୍ଣ ଭୁଲ୍। ଯେଉଁମାନେ ନିଜର ‘ଅସାଧାରଣ ଦକ୍ଷତା’ ପ୍ରଦର୍ଶନ କରନ୍ତି କମ୍ପାନୀ ସେମାନଙ୍କୁ ନିଯୁକ୍ତି ଦିଏ। ବାକି ପିଲାମାନେ ନିର୍ଦ୍ଧାରିତ ସମୟରେ ନିଜର ଇଣ୍ଟର୍ନସିପ୍ ଶେଷ କରିଥାନ୍ତି ଏବଂ ଅନ୍ୟ କମ୍ପାନୀରେ ଚାକିରି ଆବେଦନ କରିବାକୁ ସେମାନେ ସମ୍ପୂର୍ଣ୍ଣ ମୁକ୍ତ।
