ନୂଆଦିଲ୍ଲୀ: ଭାରତରେ ଏଣ୍ଟ୍ରି-ଲେଭଲ୍ ବା ଶସ୍ତା କଞ୍ଜ୍ୟୁମର ଇଲେକ୍ଟ୍ରୋନିକ୍ସ ସାମଗ୍ରୀର ଦାମ୍ ଏବେ ହୁ ହୁ ହୋଇ ବଢ଼ିବାରେ ଲାଗିଛି। ଟେକ୍ନୋଲୋଜି ସମୟ ସହିତ ଶସ୍ତା ହେବାର ଟ୍ରେଣ୍ଡ୍ ଏବେ ବଦଳିଯାଇଛି ଏବଂ ଏହାର ଦରବୃଦ୍ଧି କମି ୬ ରୁ ୮ ବର୍ଷ ପୁରୁଣା ସ୍ତରରେ ପହଞ୍ଚିବାକୁ ଯାଉଛି। ‘ଦି ଇକୋନୋମିକ୍ ଟାଇମ୍ସ’ର ଏକ ରିପୋର୍ଟ ଅନୁଯାୟୀ, ନିର୍ମାଣ ଖର୍ଚ୍ଚ ବଢ଼ୁଥିବାରୁ କମ୍ପାନୀଗୁଡ଼ିକ ଏହି ବୋଝ ସିଧାସଳଖ ଗ୍ରାହକଙ୍କ ଉପରେ ପକାଉଛନ୍ତି, ଫଳରେ ସ୍ମାର୍ଟଫୋନ୍, ଟିଭି, ଏସି ଏବଂ ଫ୍ରିଜ୍ ଭଳି ସାମଗ୍ରୀ କିଣିବା ସାଧାରଣ ଲୋକଙ୍କ ପାଇଁ କଷ୍ଟକର ହୋଇପଡ଼ିବ।
ଗୋଦରେଜ୍ ଏଣ୍ଟରପ୍ରାଇଜେସର ଘରୋଇ ଉପକରଣ ବିଭାଗ ମୁଖ୍ୟ କମଲ ନନ୍ଦୀ କହିଛନ୍ତି ଯେ, “ଦାମ୍ ଏବେ ରେକର୍ଡ ସ୍ତରରେ ପହଞ୍ଚିଛି। ଏହି ଦରବୃଦ୍ଧି ଯୋଗୁଁ ଚାହିଦା କମିବାର ଆଶଙ୍କା ରହିଛି, କେବଳ ପ୍ରବଳ ଖରା ହେଲେ ହିଁ ଏସି ବା ଫ୍ରିଜ୍ ବିକ୍ରି ବଢ଼ିପାରେ।”
କେଉଁ ସାମଗ୍ରୀର ଦାମ୍ କେତେ ବଢ଼ିବ?
- ସ୍ମାର୍ଟଫୋନ୍ (Smartphones): ଗତ ଦୀପାବଳି ବେଳକୁ ଯେଉଁ ଏଣ୍ଟ୍ରି-ଲେଭଲ୍ 5G ଫୋନ୍ ୧୦,୦୦୦ ଟଙ୍କା ତଳେ ମିଳୁଥିଲା, ତାହା ଏବେ ବଢ଼ି ୧୩,୦୦୦ ରୁ ୧୪,୦୦୦ ଟଙ୍କା ଛୁଇଁଲାଣି। ଆସନ୍ତା ତ୍ରୈମାସିକ ସୁଦ୍ଧା ଏହା ୧୭ ରୁ ୧୮ ହଜାର ଟଙ୍କା ଏବଂ ଜୁନ୍ ସୁଦ୍ଧା ୨୦ ହଜାର ଟଙ୍କା ପର୍ଯ୍ୟନ୍ତ ପହଞ୍ଚିପାରେ ବୋଲି ଶିଳ୍ପ ବିଶେଷଜ୍ଞମାନେ ଆକଳନ କରୁଛନ୍ତି।
- ସ୍ମାର୍ଟ ଟିଭି (Smart TV): ଗତବର୍ଷ ୬,୫୦୦ ଟଙ୍କାରେ ମିଳୁଥିବା ୩୨ ଇଞ୍ଚର ସ୍ମାର୍ଟ ଟିଭି ଏବେ ୮,୫୦୦ ଟଙ୍କା ହୋଇଥିବା ବେଳେ ମେ’ ମାସ ସୁଦ୍ଧା ଏହା ୧୦,୦୦୦ ଟଙ୍କା ଛୁଇଁପାରେ, ଯାହାକି ୨୦୧୭-୧୮ ମସିହା ସମୟର ଦର ଥିଲା।
- ଏୟାର କଣ୍ଡିସନର୍ (AC): ସାଧାରଣ ଲୋକଙ୍କ ପ୍ରଥମ ପସନ୍ଦ ‘୩-ଷ୍ଟାର୍ ୧.୫ ଟନ୍’ ଏସିର ଦାମ୍ ଗତ ଗ୍ରୀଷ୍ମ ଋତୁରେ ୩୨-୩୪ ହଜାର ଟଙ୍କା ଥିବା ବେଳେ, ଚଳିତ ବର୍ଷ ଏପ୍ରିଲ୍ରୁ ଏହା ୩୭ ରୁ ୪୦ ହଜାର ଟଙ୍କା ମଧ୍ୟରେ ବିକ୍ରି ହେବ।
ଦରବୃଦ୍ଧିର ପ୍ରକୃତ କାରଣ କ’ଣ?
ପୂର୍ବରୁ କମ୍ପାନୀମାନେ ଅଧିକ ଉତ୍ପାଦନ କରି ଖର୍ଚ୍ଚ କମାଉଥିଲେ ଏବଂ ଗ୍ରାହକଙ୍କୁ ଶସ୍ତାରେ ସାମଗ୍ରୀ ଯୋଗାଉଥିଲେ। କିନ୍ତୁ ଗତ ୫-୬ ମାସ ଧରି ମେମୋରୀ ଚିପର ଦାମ୍ ବୃଦ୍ଧି, ପଶ୍ଚିମ ଏସିଆ/ଉପସାଗରୀୟ ଯୁଦ୍ଧ କାରଣରୁ ଯୋଗାଣ ଶୃଙ୍ଖଳା ପ୍ରଭାବିତ ହେବା ଏବଂ ଟଙ୍କାର ମୂଲ୍ୟ ହ୍ରାସ ପାଇବା କାରଣରୁ କମ୍ପାନୀମାନେ ବାଧ୍ୟ ହୋଇ ଦାମ୍ ବଢ଼ାଉଛନ୍ତି। ଅଲ୍ ଇଣ୍ଡିଆ ମୋବାଇଲ୍ ରିଟେଲର୍ସ ଆସୋସିଏସନର ପ୍ରତିଷ୍ଠାତା କୈଳାଶ ଲଖ୍ୟାନି କହିଛନ୍ତି ଯେ, କମ୍ପାନୀମାନେ ନୂଆ ମଡେଲରେ ପୁରୁଣା ଫିଚର୍ସ ଦେଉଥିଲେ ମଧ୍ୟ ଦାମ୍ ୩୬% ପର୍ଯ୍ୟନ୍ତ ବଢ଼ାଇ ଦେଇଛନ୍ତି।
ବନ୍ଦ ହେଲା ରିହାତି, ସେକେଣ୍ଡ୍ ହ୍ୟାଣ୍ଡ୍ ମୋବାଇଲ୍
ସବୁଠାରୁ ବଡ଼ ସମସ୍ୟା ହେଉଛି, ପୂର୍ବରୁ ମିଳୁଥିବା ସାଧାରଣ ଡିସକାଉଣ୍ଟ ଏବଂ କ୍ୟାସବ୍ୟାକ୍ ଅଫର୍ ମଧ୍ୟ ଏବେ ପ୍ରାୟତଃ ବନ୍ଦ ହୋଇଯାଇଛି। ନଭେମ୍ବର-ଡିସେମ୍ବର ମାସରୁ ପ୍ରତି ୩୦ ରୁ ୬୦ ଦିନରେ ଦର ବଢ଼ୁଛି। ଫଳରେ ଅଧିକାଂଶ ଗ୍ରାହକ ଏବେ ନୂଆ ଫୋନ୍ କିଣିବା ବଦଳରେ ସେକେଣ୍ଡ୍ ହ୍ୟାଣ୍ଡ୍ ବା ରିଫର୍ବିସ୍ଡ୍ ଡିଭାଇସ୍ କିଣିବାକୁ ବାଧ୍ୟ ହେଉଛନ୍ତି କିମ୍ବା କିଣିବା ଯୋଜନା ସ୍ଥଗିତ ରଖୁଛନ୍ତି।
ଏହି ସ୍ଥିତିରୁ ମୁକୁଳିବା ପାଇଁ ଏବଂ ବଜାର ଚାହିଦା ବଢ଼ାଇବା ପାଇଁ ୨୦,୦୦୦ ଟଙ୍କା ପର୍ଯ୍ୟନ୍ତ ସ୍ମାର୍ଟଫୋନ୍ ଉପରେ ଲାଗୁଥିବା ଜିଏସଟି ହାରକୁ ୧୮% ରୁ ୫% କୁ ହ୍ରାସ କରିବାକୁ ସରକାରଙ୍କ ନିକଟରେ ଖୁବଶୀଘ୍ର ଦାବି କରିବ ରିଟେଲର୍ସ ଆସୋସିଏସନ୍।
