ନୂଆଦିଲ୍ଲୀ: ଏପ୍ରିଲ ୯ରେ ହେବାକୁ ଥିବା ଆସାମ ବିଧାନସଭା ନିର୍ବାଚନ ପୂର୍ବରୁ କଂଗ୍ରେସକୁ ବଡ଼ ଝଟକା ଲାଗିଛି । ନିର୍ବାଚନ ପୂର୍ବରୁ ୩ ପ୍ରାର୍ଥୀଙ୍କ ପ୍ରାର୍ଥୀପତ୍ର ଖାରଜ ହୋଇଛି । ମୁଖ୍ୟମନ୍ତ୍ରୀ ହିମନ୍ତ ବିଶ୍ବଶର୍ମାଙ୍କ ବିପକ୍ଷରେ ମୈଦାନକୁ ଓହ୍ଲାଇଥିବା କଂଗ୍ରେସ ପ୍ରାର୍ଥୀଙ୍କର ମଧ୍ୟ ପ୍ରାର୍ଥୀପତ୍ର ଖାରଜ ହୋଇଛି । ମୋଟ ୧୮ ଜଣ ପ୍ରାର୍ଥୀଙ୍କ ପ୍ରାର୍ଥୀପତ୍ର ରଦ୍ଦ ହୋଇଥିବା ଜଣାପଡ଼ିଛି । ନିର୍ବାଚନ କମିଶନଙ୍କ ୱେବସାଇଟ୍ ଅନୁଯାୟୀ, ଧାକୁଆଖାନା ଆସନରୁ କଂଗ୍ରେସ ପ୍ରାର୍ଥୀ ଆନନ୍ଦ ନାରାହ, ହାଫଲଙ୍ଗ ଆସନରୁ ନିର୍ମଳ ଲାଙ୍ଗଥାସା ଏବଂ ଜାଲୁକବାରି ଆସନରୁ ବିଦିଶା ନେଓଗଙ୍କ ପ୍ରାର୍ଥୀପତ୍ର ଖାରଜ ହୋଇଛି ।
ଧାକୁଆଖାନା ଆସନରେ ପୂର୍ବତନ ମନ୍ତ୍ରୀ ଏବଂ ବିଜେପି ନେତା ନବ କୁମାର ଡୋଲି ନିର୍ବାଚନ ଲଢ଼ିବେ । ହାଫଲଙ୍ଗ ଆସନ ପାଇଁ କଂଗ୍ରେସ ପ୍ରାର୍ଥୀ ଭାବରେ ବିଜେପି ସରକାରରେ ମନ୍ତ୍ରୀ ନନ୍ଦିତା ଗାର୍ଲୋସାଙ୍କ ପ୍ରାର୍ଥୀପତ୍ର ଗ୍ରହଣ କରାଯାଇଛି। ଗାର୍ଲୋସା ରବିବାର ରାତିରେ କଂଗ୍ରେସରେ ଯୋଗ ଦେଇଥିଲେ ଏବଂ ପରଦିନ ତାଙ୍କର ନାମାଙ୍କନ ପତ୍ର ଦାଖଲ କରିଥିଲେ।
କେତେ ପ୍ରାର୍ଥୀଙ୍କୁ ଲାଗିଛି ଝଟକା ?
ଏପର୍ଯ୍ୟନ୍ତ ଯେଉଁ ପ୍ରାର୍ଥୀଙ୍କ ନାମାଙ୍କନ ପ୍ରତ୍ୟାଖ୍ୟାନ କରାଯାଇଛି ସେମାନଙ୍କ ମଧ୍ୟରେ ଝାଡ଼ଖଣ୍ଡ ମୁକ୍ତି ମୋର୍ଚ୍ଚା ଏବଂ ଭୋଟର୍ସ ପାର୍ଟି ଇଣ୍ଟରନ୍ୟାସନାଲର ତିନି ଜଣ ଲେଖାଏଁ, SUCI (କମ୍ୟୁନିଷ୍ଟ) ଏବଂ ଆପନି ଜନତା ପାର୍ଟିର ଜଣେ ଲେଖାଏଁ ଏବଂ ଆଠ ଜଣ ସ୍ୱାଧୀନ ପ୍ରାର୍ଥୀ ମଧ୍ୟ ଅଛନ୍ତି। ରାଜ୍ୟ ବିଧାନସଭାର ୧୨୬ଟି ଆସନ ପାଇଁ ୮୧୫ ରୁ ଅଧିକ ପ୍ରାର୍ଥୀ ମୋଟ ୧,୩୮୯ ନାମାଙ୍କନ ପତ୍ର ଦାଖଲ କରିଛନ୍ତି । ଅନେକ ପ୍ରାର୍ଥୀ ଗୋଟିଏରୁ ଅଧିକ ସେଟର ନାମାଙ୍କନ ଦାଖଲ କରିଥିବା ଜଣାପଡ଼ିଛି ।
ବିଧାନସଭା ନିର୍ବାଚନ ସମ୍ପର୍କରେ ବଡ଼ ବୈଠକ
ନିର୍ବାଚନ ପ୍ରସ୍ତୁତିକୁ ଆହୁରି ମଜଭୁତ କରିବା ପାଇଁ ନିର୍ବାଚନ କମିଶନ ୫ଟି ନିର୍ବାଚନ ରାଜ୍ୟ ଏବଂ ସେମାନଙ୍କର ପଡ଼ୋଶୀ ରାଜ୍ୟର ଅଧିକାରୀଙ୍କ ସହିତ ବୈଠକ କରିଥିଲେ। ନିର୍ବାଚନୀ ରାଜ୍ୟଗୁଡ଼ିକରେ ସମନ୍ୱୟ ବୃଦ୍ଧି କରିବା, ବେଆଇନ କାର୍ଯ୍ୟକଳାପକୁ ରୋକିବା ଏବଂ ଶାନ୍ତିପୂର୍ଣ୍ଣ, ନିରାପଦ, ହିଂସାମୁକ୍ତ ମତଦାନ ସୁନିଶ୍ଚିତ କରିବାକୁ ନେଇ ରଣନୀତି ଉପରେ ଆଲୋଚନା ହୋଇଛି ।
ସୂଚନାଯୋଗ୍ୟ, ଆସାମ, କେରଳ, ପଶ୍ଚିମବଙ୍ଗ, ତାମିଲନାଡୁ ଏବଂ ପୁଡୁଚେରୀରେ ଆସନ୍ତା ମାସରେ ବିଧାନସଭା ନିର୍ବାଚନ ହେବାକୁ ଯାଉଛି । ପଶ୍ଚିମବଙ୍ଗ ଏବଂ ଆସାମ ବାଂଲାଦେଶ ସହିତ ସୀମା ସେୟାର କରୁଥିବାରୁ, ସୁରକ୍ଷା ଏବଂ ନିରୀକ୍ଷଣ ଉପରେ ବିଶେଷ ଗୁରୁତ୍ୱ ଦିଆଯାଉଛି।
