ନୂଆଦିଲ୍ଲୀ: ମଧ୍ୟପ୍ରାଚ୍ୟରେ ମହାଯୁଦ୍ଧର ପ୍ରଭବ ଭାରତ ଉପରେ ଗୁରୁତର ଭାବରେ ପଡ଼ିଛି । ଭାରତରେ ଗ୍ୟାସ୍ ସଂକଟ ଉଗ୍ରରୂପ ଧାରଣ କରିଥିବା ବେଳେ, ଆଗକୁ ସ୍ଥିତି ଆହୁରି ସଙ୍ଗୀନ ହୋଇପାରେ । ଏହାରି ମଧ୍ୟରେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସଂସଦରେ ଗୁରୁତ୍ବପୂର୍ଣ୍ଣମ ମନ୍ତବ୍ୟ ଦେଇଛନ୍ତି । ଭୟଙ୍କର ସ୍ଥିତିକୁ ମୁକାବିଲା କରିବାକୁ ଭାରତ ସରକାର କଣ ସବୁ ଯୋଜନା କରିଛନ୍ତି ସେନେଇ ଖୋଲାଖୋଲି ଭାବରେ କହିଛନ୍ତି ପିଏମ ମୋଦୀ ।
ପଶ୍ଚିମ ଏସିଆରେ ଚାଲିଥିବା ଯୁଦ୍ଧର ପ୍ରଭାବ ଏବେ ଭାରତରେ ସ୍ପଷ୍ଟ ଭାବରେ ଦେଖାଯାଉଛି । ସଂସଦରେ ଏହି ପ୍ରସଙ୍ଗରେ ପ୍ରତିକ୍ରିୟା ଦେଇ ନରେନ୍ଦ୍ର ମୋଦୀ କହିଛନ୍ତି ଯେ, ଏହି ଯୁଦ୍ଧ ଭାରତ ପାଇଁ ଗୁରୁତ୍ୱପୂର୍ଣ୍ଣ ଏବଂ ଅପ୍ରତ୍ୟାଶିତ ଚ୍ୟାଲେଞ୍ଜ ସୃଷ୍ଟି କରିଛି। ଏହି ସଙ୍କଟର ମୁକାବିଲା ପାଇଁ ସରକାର ଅର୍ଥନୈତିକ, ସୁରକ୍ଷା ଏବଂ ମାନବିକତା ଭଳି ୩ଟି ସ୍ତରରେ ସମ୍ପୂର୍ଣ୍ଣ ପ୍ରସ୍ତୁତ ।
ଯୁଦ୍ଧ ଭାରତ ପାଇଁ ଚ୍ୟାଲେଞ୍ଜ ସୃଷ୍ଟି କରିଛି
ପ୍ରଧାନମନ୍ତ୍ରୀ ଲୋକସଭାରେ କହିଛନ୍ତି ଯେ, ପଶ୍ଚିମ ଏସିଆର ପରିସ୍ଥିତି ଅତ୍ୟନ୍ତ ଚିନ୍ତାଜନକ ଏବଂ ଏହି ସଙ୍କଟ ତିନି ସପ୍ତାହରୁ ଅଧିକ ସମୟ ଧରି ଜାରି ରହିଛି। ଏହା ବିଶ୍ୱ ଅର୍ଥନୀତି ଏବଂ ସାଧାରଣ ଲୋକଙ୍କ ଜୀବନକୁ ପ୍ରଭାବିତ କରୁଛି। ସେ ଆହୁରି ମଧ୍ୟ କହିଛନ୍ତି ଯେ, ଭାରତ ପାଇଁ ମଧ୍ୟ ପରିସ୍ଥିତି ସହଜ ନୁହେଁ ଏବଂ ଅନେକ କ୍ଷେତ୍ରରେ ଚ୍ୟାଲେଞ୍ଜ ସୃଷ୍ଟି ହୋଇଛି।
ଗଲ୍ଫ ଦେଶରେ ଅଛନ୍ତି ୧ କୋଟି ଭାରତୀୟ
ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ, ଯେଉଁ ଅଞ୍ଚଳରେ ଯୁଦ୍ଧ ଚାଲିଛି ତାହା ବିଶ୍ୱ ବାଣିଜ୍ୟ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଏହା ସହିତ, ପ୍ରାୟ ୧ କୋଟି ଭାରତୀୟ ଉପସାଗରୀୟ ଦେଶଗୁଡ଼ିକରେ ରୁହନ୍ତି ଏବଂ କାମ କରନ୍ତି। ତେଣୁ, ସେମାନଙ୍କ ସୁରକ୍ଷା ସରକାରଙ୍କ ସର୍ବୋଚ୍ଚ ପ୍ରାଥମିକତା। ପ୍ରଧାନମନ୍ତ୍ରୀ ସୂଚନା ଦେଇଛନ୍ତି ଯେ, ଯୁଦ୍ଧ ଆରମ୍ଭ ହେବା ପରଠାରୁ ୩୭୫୦୦୦ରୁ ଅଧିକ ଭାରତୀୟଙ୍କୁ ସୁରକ୍ଷିତ ଭାବରେ ସ୍ୱଦେଶ ଫେରାଇ ଅଣାଯାଇଛି। କେବଳ ଇରାନରୁ ପ୍ରାୟ ୧୦୦୦ ଭାରତୀୟଙ୍କୁ ସୁରକ୍ଷିତ ଭାବରେ ଉଦ୍ଧାର କରାଯାଇଛି । ଯେଉଁଥିରେ ୭୦୦ ରୁ ଅଧିକ ଡାକ୍ତରୀ ଛାତ୍ର ମଧ୍ୟ ଅଛନ୍ତି।
ପେଟ୍ରୋଲ-ଡିଜେଲ ସଙ୍କଟ ସମାଧାନ ପାଇଁ ସରକାରଙ୍କ ଯୋଜନା
ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ, ଭାରତର ଅଶୋଧିତ ତେଲ, ଗ୍ୟାସ ଏବଂ ସାରର ଏକ ଗୁରୁତ୍ୱପୂର୍ଣ୍ଣ ଅଂଶ ହର୍ମୁଜ୍ ପ୍ରଣାଳୀ ଦେଇ ଆସେ । ଫଳରେ ସରକାର ପେଟ୍ରୋଲ, ଡିଜେଲ ଏବଂ ଗ୍ୟାସର ସୁଗମ ଯୋଗାଣ ସୁନିଶ୍ଚିତ କରିବା ପାଇଁ ଏକ ନିର୍ଦ୍ଦିଷ୍ଟ ରଣନୀତି ଗ୍ରହଣ କରିଛନ୍ତି। ଭାରତ ଏଲପିଜି ଆବଶ୍ୟକତାର ପ୍ରାୟ ୬୦% ଆମଦାନୀ କରେ । ତେଣୁ ଘରୋଇ ଆବଶ୍ୟକତାକୁ ପ୍ରାଥମିକତା ଦିଆଯାଉଛି ଏବଂ ଉତ୍ପାଦନ ବୃଦ୍ଧି କରାଯାଉଛି।
ଶକ୍ତି ସୁରକ୍ଷା ପାଇଁ ପ୍ରମୁଖ ପଦକ୍ଷେପ
ପ୍ରଧାନମନ୍ତ୍ରୀ କହିଛନ୍ତି ଯେ, ଭାରତ ଏବେ ପୂର୍ବ ଅପେକ୍ଷା ଅଧିକ ଦେଶରୁ ଇନ୍ଧନ ଆମଦାନୀ କରୁଛି। ପୂର୍ବରୁ ୨୭ଟି ଦେଶରୁ ଆମଦାନୀ ହେଉଥିଲା କିନ୍ତୁ ଏବେ ୪୧କୁ ବୃଦ୍ଧି ପାଇଛି। ଏହା ବ୍ୟତୀତ, ଦେଶରେ ୫.୩ ନିୟୁତ ମେଟ୍ରିକ୍ ଟନ୍ ରୁ ଅଧିକ ତୈଳ ଗଚ୍ଛିତ ଅଛି। ସେ କହିଛନ୍ତି ଯେ, ଗତ କିଛି ବର୍ଷ ମଧ୍ୟରେ ଇଥାନଲ୍ ଉତ୍ପାଦନ ବୃଦ୍ଧି ମଧ୍ୟ ସାହାଯ୍ୟ କରିଛି ଏବଂ ଏବେ ୨୦% ଇଥାନଲ୍ ପେଟ୍ରୋଲରେ ମିଶ୍ରିତ ହେଉଛି। ଏହା ବ୍ୟତୀତ, ରେଳବାଇର ବିଦ୍ୟୁତୀକରଣ ଦ୍ୱାରା ଶକ୍ତି ଚାପ ମଧ୍ୟ ହ୍ରାସ ପାଇଛି।
ଅନ୍ୟପଟେ ପ୍ରଧାନମନ୍ତ୍ରୀ ମୋଦୀ ଆହୁରି କହିଛନ୍ତି, ଯୁଦ୍ଧ କୃଷିକୁ ପ୍ରଭାବିତ କରିପାରେ । କିନ୍ତୁ ଦେଶରେ ବର୍ତ୍ତମାନ ପର୍ଯ୍ୟାପ୍ତ ଖାଦ୍ୟଶସ୍ୟ ଅଛି। ଚାଷୀମାନଙ୍କ ପାଇଁ ପର୍ଯ୍ୟାପ୍ତ ସାର ଉପଲବ୍ଧ କରାଯାଇଛି ଏବଂ କୃଷି ଉପରେ ପ୍ରଭାବକୁ କମ କରିବା ପାଇଁ ୬ଟି ନୂତନ ୟୁରିଆ ପ୍ଲାଣ୍ଟ କାର୍ଯ୍ୟକ୍ଷମ କରାଯାଇଛି।
ଭାରତ ଯେକୌଣସି ପରିସ୍ଥିତି ପାଇଁ ପ୍ରସ୍ତୁତ- ମୋଦୀ
ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ, ସାମୁଦ୍ରିକ ମାର୍ଗର ସୁରକ୍ଷା ସୁନିଶ୍ଚିତ କରିବା ପାଇଁ ସରକାର ସହଯୋଗୀ ରାଷ୍ଟ୍ରଙ୍କ ସହିତ ଯୋଗାଯୋଗରେ ଅଛନ୍ତି। ସେ ଆଶ୍ୱାସନା ଦେଇଛନ୍ତି ଯେ, ଭାରତ ଏହି ସଙ୍କଟର ଦୃଢ଼ ମୁକାବିଲା କରିବ । ଦେଶର ଅର୍ଥନୀତିକୁ ସୁରକ୍ଷିତ ରଖିବା ପାଇଁ ସମସ୍ତ ଆବଶ୍ୟକୀୟ ପଦକ୍ଷେପ ନିଆଯାଉଛି।
