ନୂଆଦିଲ୍ଲୀ: ବହୁଚର୍ଚ୍ଚିତ ଦାରା ସିଂହର ମାମଲାରେ ଆଜି ସୁପ୍ରିମକୋର୍ଟରେ ଗୁରୁତ୍ୱପୂର୍ଣ୍ଣ ଶୁଣାଣି ଅନୁଷ୍ଠିତ ହୋଇଯାଇଛି। ଏହି ମାମଲାରେ ଓଡ଼ିଶା ସରକାରଙ୍କ ତରଫରୁ ଆଡଭୋକେଟ୍ ଜେନେରାଲ୍ ପିତାମ୍ବର ଆଚାର୍ଯ୍ୟ କୋର୍ଟରେ ପକ୍ଷ ରଖିଛନ୍ତି।
ରାଜ୍ୟ ସରକାରଙ୍କ ଯୁକ୍ତି ଓ ତର୍ଜମା ପ୍ରକ୍ରିୟା
ଆଡଭୋକେଟ୍ ଜେନେରାଲ୍ ସୁପ୍ରିମକୋର୍ଟଙ୍କୁ ଅବଗତ କରାଇଛନ୍ତି ଯେ, ଦାରା ସିଂହର ଆଗାମୀ ମୁକ୍ତି ନେଇ ଜିଲ୍ଲା ପ୍ରଶାସନ ଏବଂ ଜେଲ୍ କର୍ତ୍ତୃପକ୍ଷ ପ୍ରଦାନ କରିଥିବା ରିପୋର୍ଟକୁ ବର୍ତ୍ତମାନ ତର୍ଜମା କରାଯାଉଛି।
* ‘ରାଜ୍ୟ ବନ୍ଦୀ ମୁକ୍ତି ନୀତି-୨୦୨୨’ ଅନୁଯାୟୀ ଏହି ପ୍ରସଙ୍ଗରେ ଥିବା ସମସ୍ତ ତଥ୍ୟକୁ ପୁଙ୍ଖାନୁପୁଙ୍ଖ ଭାବେ ତନଖି କରାଯିବ।
* ସମସ୍ତ ଦିଗକୁ ଯାଞ୍ଚ କରିବା ପରେ ଓଡ଼ିଶା ଷ୍ଟେଟ୍ ସେଣ୍ଟେନ୍ସ ରିଭ୍ୟୁ ବୋର୍ଡ ଏହି ସମ୍ପର୍କରେ ଚୂଡ଼ାନ୍ତ ନିଷ୍ପତ୍ତି ଗ୍ରହଣ କରିବେ ବୋଲି ଏଜି ଶ୍ରୀ ଆଚାର୍ଯ୍ୟ ସର୍ବୋଚ୍ଚ ନ୍ୟାୟାଳୟଙ୍କୁ ସୂଚନା ଦେଇଛନ୍ତି।
ମେ’ ୧୩ କୁ ଘୁଞ୍ଚିଲା ପରବର୍ତ୍ତୀ ଶୁଣାଣି
ରାଜ୍ୟ ସରକାରଙ୍କ ପକ୍ଷ ଏବଂ ଯୁକ୍ତି ଶୁଣିବା ପରେ ରିଭ୍ୟୁ ବୋର୍ଡର ଚୂଡ଼ାନ୍ତ ନିଷ୍ପତ୍ତି ଆସିବା ପର୍ଯ୍ୟନ୍ତ ସୁପ୍ରିମକୋର୍ଟ ମେ’ ୧୩ ତାରିଖ ଯାଏଁ ସମୟ ପ୍ରଦାନ କରିଛନ୍ତି। ତେଣୁ ଏହି ମାମଲାର ପରବର୍ତ୍ତୀ ଶୁଣାଣି ଆସନ୍ତା ମେ’ ୧୩ ତାରିଖରେ ହେବ ବୋଲି ଆଡଭୋକେଟ୍ ଜେନେରାଲ୍ ପିତାମ୍ବର ଆଚାର୍ଯ୍ୟ ସୂଚନା ଦେଇଛନ୍ତି।
