- ଇସ୍ରାଏଲରୁ ସ୍ପେନ ନିଜ ରାଜଦୂତଙ୍କୁ ସ୍ଥାୟୀ ରୂପେ ପ୍ରତ୍ୟାହାର କରିଥିବା ଜଣାପଡିଛି
- ଇରାନ ଉପରେ ଆମେରିକା ଓ ଇସ୍ରାଏଲର ମିଳିତ ଆକ୍ରମଣକୁ ସ୍ପେନ ବିରୋଧ କରୁଛି
- ଏଣୁ ଦୁଇ ଦେଶଙ୍କ ମଧ୍ୟରେ କୂଟନୈତିକ ଗତିରୋଧ ବଢି ଯାଇଛି
ମାଦ୍ରିଦ ୧୨।୩: ଇସ୍ରାଏଲରୁ ସ୍ପେନ ନିଜ ରାଜଦୂତଙ୍କୁ ପ୍ରତ୍ୟାହାର କରିନେଇଛି। କାରଣ ଇରାନ ଉପରେ ଆମେରିକା ଓ ଇସ୍ରାଏଲର ମିଳିତ ଆକ୍ରମଣକୁ ସ୍ପେନର ବିରୋଧ ଯୋଗୁ ଦୁଇ ଦେଶଙ୍କ ମଧ୍ୟରେ କୂଟନୈତିକ ଗତିରୋଧ ବଢି ଯାଇଥିଲା। ଏଣୁ ଇସ୍ରାଏଲରୁ ସ୍ପେନ ନିଜ ରାଜଦୂତଙ୍କୁ ସ୍ଥାୟୀ ରୂପେ ପ୍ରତ୍ୟାହାର କରିଥିବା ଜଣାପଡିଛି। ଏହା ପୂର୍ବରୁ ସ୍ପେନ ଗତ ସେପ୍ଟେମ୍ବର ମାସରେ ଇସ୍ରାଏଲରୁ ନିଜ ରାଜଦୂତଙ୍କୁ ଡକାଇ ନେଇଥିଲା। ସେତେବେଳେ ଏହି ବିବାଦ ଗାଜାରେ ଇସ୍ରାଏଲର ସାମରିକ ଅଭିଯାନ କାରଣରୁ ହୋଇଥିଲା।
ସେତେବେଳେ ସ୍ପେନ ନିଜ ବନ୍ଦର ଓ ଏୟାରପୋର୍ଟକୁ ଇସ୍ରାଏଲର ଅସ୍ତ୍ରଶସ୍ତ୍ର ପରିବହନକାରୀ ବିମାନ ଓ ଜାହାଜଙ୍କ ନିମନ୍ତେ ବାରଣ କରିଥିଲା। ଏଣୁ ସ୍ପେନର ଏପରି ନୀତିକୁ ଇସ୍ରାଏଲ ବିଦେଶ ମନ୍ତ୍ରୀ ଗିଦୋନ ସା’ଆର ଇହୁଦୀ ବିରୋଧୀ ବୋଲି କହିଥିଲେ। ଏହା ପରେ ଏବେ ସ୍ପେନ ଗତ ୧୦ ମାର୍ଚ୍ଚ ମଙ୍ଗଳବାର ଅଧିକାରୀକ ଗେଜେଟରେ ଇସ୍ରାଏଲରେ ରାଜଦୂତ ପଦ ସମାପ୍ତ କରିଦିଆଯାଇଥିବା ପ୍ରକାଶ କରିଛି। ନିକଟ ଭବିଷ୍ୟତରେ ତେଲଆଭିବ ସ୍ଥିତ ସ୍ପେନ ଦୂତାବାସର ନେତୃତ୍ୱ ଜଣେ କାର୍ଯ୍ୟକାରୀ ରାଜଦୂତଙ୍କ ଉପରେ ନ୍ୟସ୍ତ କରାଯିବ।
ଏହି ପଦକ୍ଷେପକୁ ଦୁଇ ଦେଶଙ୍କ ମଧ୍ୟରେ କୂଟନୈତିକ ସମ୍ପର୍କର ନବୀନତମ ପ୍ରଗତିର ପ୍ରତୀକ ଭାବେ ଦେଖା ଯାଉଛି, ଯାହା ଅକ୍ଟୋବର ୨୦୨୩ରେ ଗାଜା ଷ୍ଟ୍ରିପ ଉପରେ ଆକ୍ରମଣ ଆରମ୍ଭ ହେବା ପରଠାରୁ ବେଶ୍ ଉତ୍ତେଜନାପୂର୍ଣ୍ଣ ଥିଲା। ସ୍ପେନରେ ମଧ୍ୟ ଇସ୍ରାଏଲ ଦୂତାବାସ ଏକ ଚାର୍ଜ ଡି’ଆଫାୟର୍ସ ଦ୍ୱାରା ପରିଚାଳିତ ହେଉଛି। କାରଣ ସ୍ପେନ ପାଲେଷ୍ଟାଇନ ଦେଶକୁ ମାନ୍ୟତା ଦେବା ବିରୋଧରେ ଗତ ମେ ମାସରେ ନିଜ ରାଜଦୂତଙ୍କୁ ତଲବ କରିଥିଲା। ଏଥିରେ ଏବେ ଆମେରିକା ଓ ଇସ୍ରାଏଲ ଦ୍ୱାରା ଇରାନ ଉପରେ ଆକ୍ରମଣ ଉତ୍ତେଜନାକୁ ଆହୁରି ବଢାଇ ଦେଇଛି।
Also Read..
