ନୂଆଦିଲ୍ଲୀ: ଭାରତୀୟ କ୍ରିକେଟ୍ ବୋର୍ଡର ପୂର୍ବତନ ଅଧ୍ୟକ୍ଷ ଇନ୍ଦ୍ରଜିତ୍ ସିଂହ ବିନ୍ଦ୍ରାଙ୍କ ପରଲୋକ ହୋଇଛି । ସୋମବାର ବିସିସିଆଇ ଓ ହରଭଜନ ସିଂହଙ୍କ ପରି ପୂର୍ବତନ କ୍ରିକେଟର ଦୁଃଖ ବ୍ୟକ୍ତ କରିଛନ୍ତି । ବିସିସିଆଇ ନିଜ ପୋଷ୍ଟରେ ବିନ୍ଦ୍ରାଙ୍କୁ ଜଣେ ଦୂରଦର୍ଶୀ ପ୍ରଶାସକ ଓ ଭାରତୀୟ କ୍ରିକେଟ୍ ବୋର୍ଡର ସଫଳ ସ୍ଥପତି ଭାବେ ବର୍ଣ୍ଣନା କରିଛି ।
ବିନ୍ଦ୍ରା ୧୯୯୩ରୁ ୧୯୯୬ ଯାଏ ବିସିସିଆଇର ଅଧ୍ୟକ୍ଷ ଥିଲେ । ରବିବାର ୮୪ ବର୍ଷ ବୟସରେ ତାଙ୍କର ନିଧନ ହୋଇଛି । ବିସିସିଆଇ ଅଧ୍ୟକ୍ଷ ମିଥୁନ ମନହାସ୍ କହିଛନ୍ତି, ଆଇ.ଏସ୍. ବିନ୍ଦ୍ରା ଦୂରଦର୍ଶୀ ପ୍ରଶାସକ ଥିଲେ, ଯାହାଙ୍କ ନେତୃତ୍ୱରେ ବିଶ୍ୱ କ୍ରିକେଟରେ ଭାରତର ଭୂମିକାକୁ ପୁଣି ଥରେ ପରିଭାଷିତ କରିବାରେ ସହାୟକ ହୋଇଥିଲା । ସେ କହିଛନ୍ତି, ପ୍ରଶାସନ ବ୍ୟତୀତ ବି ତାଙ୍କର ଯୋଗଦାନ ବହୁ ଅଧିକ ଥିଲା । ସେ ଏପରି ପ୍ରଣାଳୀ ଓ ସଂସ୍ଥାନର ନିର୍ମାଣରେ ସାହାଯ୍ୟ କରିଛନ୍ତି, ଯାହା ଆଜି ବି ଖେଳାଳି, ପ୍ରଶାସକ ଓ ଖେଳର ସେବା କରୁଛନ୍ତି । ବିସିସିଆଇ ଭାରତୀୟ କ୍ରିକେଟ୍ ପ୍ରଶାସନର ମହାନ ବ୍ୟକ୍ତିଙ୍କ ନିଧନରେ ଶୋକ ବ୍ୟକ୍ତ କରୁଛି ।
BCCI expresses its deep sorrow at the passing of Former President of the BCCI Mr Inderjit Singh Bindra.
Mr Bindra was one of the most influential figures in Indian cricket administration, whose vision and leadership helped shape the way the game is governed in the country and… pic.twitter.com/sOafsmiGYM
— BCCI (@BCCI) January 26, 2026
ବିସିସିଆଇର ସଭାପତି ଭାବରେ କାର୍ଯ୍ୟକାଳ ମଧ୍ୟରେ ବିନ୍ଦ୍ରା କ୍ରିକେଟ ଜଗତରେ ଭାରତର ସ୍ଥିତିକୁ ମଜଭୁତ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ । ସେ ୧୯୭୮ରୁ ୨୦୧୪ ପର୍ଯ୍ୟନ୍ତ ପଞ୍ଜାବ କ୍ରିକେଟ ଆସୋସିଏସନର ସଭାପତି ଭାବରେ ମଧ୍ୟ କାର୍ଯ୍ୟ କରିଥିଲେ । ୨୦୧୫ରେ ମୋହାଲିର ପିସିଏ ଷ୍ଟାଡିୟମକୁ ତାଙ୍କ ସମ୍ମାନାର୍ଥେ ଆଇଏସ୍ ବିନ୍ଦ୍ରା ଷ୍ଟାଡିୟମ ଭାବରେ ନାମିତ କରାଯାଇଥିଲା ।
ବିସିସିଆଇ ସଚିବ ଦେବଜିତ ସାଇକିଆ କହିଛନ୍ତି, “ଭାରତୀୟ କ୍ରିକେଟ୍ ଏହାର ଜଣେ ପ୍ରଭାବଶାଳୀ ସ୍ଥପତିଙ୍କୁ ହରାଇଛି ।” ଖେଳ ପ୍ରତି ବିନ୍ଦ୍ରାଙ୍କ ପ୍ରତିବଦ୍ଧତା, ତାଙ୍କର ପ୍ରଶାସନିକ ଦୂରଦୃଷ୍ଟି ଏବଂ ସ୍ଥାୟୀ ଭିତ୍ତିଭୂମି ନିର୍ମାଣ ପ୍ରତି ତାଙ୍କର ଆଗ୍ରହ ଏକ ଏପରି ଐତିହ୍ୟ ଛାଡିଛି ଯାହାକୁ କ୍ରିକେଟ ଜଗତରେ ସମ୍ମାନର ସହିତ ମନେ ରଖାଯିବ । ବିନ୍ଦ୍ରା, ପୂର୍ବତନ ଅଧ୍ୟକ୍ଷ ଏନକେପି ସାଲଭେ ଏବଂ ଜଗମୋହନ ଡାଲମିଆଙ୍କ ସହିତ ମିଶି ୧୯୮୭ ମସିହାରେ ଭାରତରେ ଏକଦିବସୀୟ ବିଶ୍ୱକପ୍ ଆୟୋଜନ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ । ଏହା ପ୍ରଥମ ଥର ଥିଲା ଯେତେବେଳେ ଇଂଲଣ୍ଡ ବାହାରେ ଏକଦିବସୀୟ ବିଶ୍ୱକପ୍ ଅନୁଷ୍ଠିତ ହୋଇଥିଲା ।
