T

ବଡ ରେଳ ଦୁର୍ଘଟଣା ଘଟିଛି। ଟ୍ରାକ୍ ପାର ହେଉଥିବା ବେଳେ ପିଟି ଦେଲା ଟ୍ରେନ୍। ବୁଧବାର ଦିନ ଉତ୍ତର ପ୍ରଦେଶର ମିର୍ଜାପୁର ଜିଲ୍ଲାର ଚୁନାର ରେଳ ଷ୍ଟେସନରେ ସାମ୍ନାପଟୁ ଆସୁଥିବା ଏକ ଟ୍ରେନ ଧକ୍କାରେ ଛଅ ଜଣ ଶ୍ରଦ୍ଧାଳୁ ପ୍ରାଣ ହରାଇଛନ୍ତି। ଛଅ ଜଣଙ୍କ ମଧ୍ୟରେ ସମସ୍ତେ ମହିଳା ରହିଛନ୍ତି। ହାଓଡା-କାଲକା ନେତାଜୀ ଏକ୍ସପ୍ରେସ ସେମାନଙ୍କୁ ଧକ୍କା ଦେଇଥିଲା।
“ଚୋପନ ଏକ୍ସପ୍ରେସ୍ ଚାରି ନମ୍ବର ପ୍ଲାଟଫର୍ମରେ ଅଟକିଥିଲା। କିଛି ଯାତ୍ରୀ ଫୁଟ୍ ଓଭରବ୍ରିଜ୍ ବ୍ୟବହାର କରିବା ପରିବର୍ତ୍ତେ ସିଧାସଳଖ ଟ୍ରାକ ଉପରେ ଓହ୍ଲାଇବାକୁ ଚେଷ୍ଟା କରିଥିଲେ। ଯାହା ଫଳରେ ଅପର ପାର୍ଶ୍ବରୁ ଆସୁଥିବା ଟ୍ରେନ୍ ସେମାନଙ୍କ ଉପରେ ଚଢ଼ି ଯାଇଥିଲା,” ଏନସିଆର୍ ପ୍ରୟାଗରାଜ ଡିଭିଜନର ଜନସମ୍ପର୍କ ଅଧିକାରୀ ଅମିତ ସିଂହ କହିଛନ୍ତି।
ମିର୍ଜାପୁର ଜିଆରପି ଇନ୍ସପେକ୍ଟର ରାଘବେନ୍ଦ୍ର ସିଂହ କହିଛନ୍ତି ଯେ “ତୀର୍ଥଯାତ୍ରୀମାନେ ପ୍ରୟାଗରାଜ-ବରୱାଡିହ ପାସେଞ୍ଜର ଟ୍ରେନ ଯୋଗେ ସୋନଭଦ୍ରରୁ ଚୁନାରରେ ପହଞ୍ଚିଥିଲେ। ସେମାନେ ବାରାଣସୀ ଅଭିମୁଖେ ଯାଉଥିବା ବେଳେ ଗୋଟିଏ ପ୍ଲାଟଫର୍ମରୁ ଅନ୍ୟ ପ୍ଲାଟଫର୍ମକୁ ଯିବାକୁ ଚେଷ୍ଟା କରୁଥିବା ସମୟରେ କାଲକା ଟ୍ରେନ୍ ଏହି ଦୁର୍ଘଟଣା ଘଟାଇଥିଲା।”
ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଏହି ଘଟଣାରେ ଗଭୀର ଦୁଃଖ ପ୍ରକାଶ କରିବା ସହିତ ମୃତକଙ୍କ ପରିବାର ପ୍ରତି ସମବେଦନା ଜଣାଇଛନ୍ତି। ସେ ସ୍ଥାନୀୟ କର୍ତ୍ତୃପକ୍ଷଙ୍କୁ ତୁରନ୍ତ ଘଟଣାସ୍ଥଳରେ ପହଞ୍ଚି ତୁରନ୍ତ ଉଦ୍ଧାର ଏବଂ ରିଲିଫ୍ କାର୍ଯ୍ୟ କରିବାକୁ ନିର୍ଦ୍ଦେଶ ଦେଇଛନ୍ତି।
ଦୁର୍ଘଟଣା ସ୍ଥଳରେ ସହାୟତା ପାଇଁ NDRF ଓ SDRF ର ଦଳଗୁଡ଼ିକୁ ପଠାଯାଇଥିଲା। ଦୁର୍ଘଟଣାଟି ବୁଧବାର ସକାଳ ୯ଟା ୧୫ ରେ ଘଟିଥିଲା ଏବଂ ମୃତଦେହଗୁଡ଼ିକୁ ପୋଷ୍ଟମର୍ଟମ ପାଇଁ ପଠାଯାଇଛି।
ପ୍ରତ୍ୟକ୍ଷଦର୍ଶୀମାନେ କହିଛନ୍ତି ଯେ ତୀର୍ଥଯାତ୍ରୀମାନେ ଗଙ୍ଗାରେ ପବିତ୍ର ବୁଡ଼ ପକାଇ ଦକ୍ଷିଣାଞ୍ଚଳକୁ ଫେରୁଥିଲେ।