ଯାତ୍ରୀବାହୀ ବସ୍‌କୁ ଧକ୍କା ଦେଲା ଟ୍ରକ୍ : ବସ୍ ହେଲ୍‌ପର ସମେତ ୩ ଗୁରୁତର, ଟ୍ରକ୍ ଡ୍ରାଇଭର-ହେଲ୍‌ପର ଅଟକ

ଜଳେଶ୍ବର ୩୦।୧୦: ପୁଣି ଦୁର୍ଘଟଣାଗ୍ରସ୍ତ ହେଲା ଆଉ ଏକ ଯାତ୍ରୀବାହୀ ବସ୍ । ‘ଏହସାନ’ ନାମକ ଯାତ୍ରୀବାହୀ ବସ୍‌କୁ ପଛପଟୁ ଧକ୍କା ଦେଲା ମକା ବୋଝେଇ ଟ୍ରକ୍ । ବାଲେଶ୍ୱର ଜିଲ୍ଲା ବସ୍ତା ଥାନା ଅଞ୍ଚଳରେ ଏଭଳି ଦୁର୍ଘଟଣା ଘଟିଛି । ଦୁର୍ଘଟଣା ଫଳରେ ବସ୍‌ର ହେଲ୍ପରଙ୍କ ସମେତ ୩ ଜଣ ଗୁରୁତର ହୋଇଛନ୍ତି । ସେମାନଙ୍କୁ ବସ୍ତା ଡାକ୍ତରଖାନରେ ଭର୍ତ୍ତି କରାଯାଇଛି । ଦୁର୍ଘଟଣା ଘଟାଇଥିବା ଟ୍ରକ୍‌କୁ ଜବତ କଲା ବସ୍ତା ପୋଲିସ । ବସ୍ ଡ୍ରାଇଭର ଘଟଣାସ୍ଥଳରୁ ଚମ୍ପଟ ମାରିଥିବା ବେଳେ ଟ୍ରକ୍ ଡ୍ରାଇଭର ଏବଂ ହେଲ୍ପର ଅଟକ ଅଛନ୍ତି ।

ସସୂଚନାଯୋଗ୍ୟ ଯେ, ଗୁରୁବାର ୭ଟା ୩୦ରୁ ୮ଟା ମଧ୍ୟରେ ‘ଏହସାନ’ ନାମକ ଯାତ୍ରୀବାହୀ ବସ୍ ପାଖାପାଖି ୩୫ ଯାତ୍ରୀଙ୍କୁ ନେଇ ବାଲେଶ୍ୱରରୁ ପଶ୍ଚିମବଙ୍ଗ କାଁଥି ଅଭିମୁଖେ ଯାଉଥିଲା । ବସ୍‌ଟି ୬୦ନଂ ଜାତୀୟ ରାଜପଥ ଦେଇ ଯାଉଥିବା ସମୟରେ ଜୁଣବଳଦା ଅଞ୍ଚଳରେ ଏକ ମକା ବୋଝେଇ ଟ୍ରକ୍ ଦ୍ରୁତ ଗତିରେ ଆସି ବସ୍‌କୁ ପଛପଟୁ ଧକ୍କା ଦେଇଥିଲା । ଟ୍ରକ୍ ଧକ୍କା ଦେବା ଫଳରେ ବସ୍‌ର ହେଲ୍ପର ସମେତ ୩ ଜଣ ଯାତ୍ରୀ ଗୁରୁତର ହୋଇଥିଲା ବେଳେ ୧୦ ଜଣ ଆହତ ହୋଇଛନ୍ତି । ଘଟଣାସ୍ଥଳରେ ବସ୍ତା ପୋଲିସ ଏବଂ ରାଜପଥ ପାଟ୍ରୋଲିଂ ଭ୍ୟାନ ପହଞ୍ଚି ଗୁରୁତର ଓ ଆହତ ମାନଙ୍କୁ ଉଦ୍ଧାର କରି ବସ୍ତା ଡାକ୍ତରଖାନାକୁ ପଠାଇଥିବା ବେଳେ ଅନ୍ୟ ଯାତ୍ରୀମାନଙ୍କୁ ଅନ୍ୟ ଏକ ବସ୍ ଯୋଗେ ଗନ୍ତବ୍ୟସ୍ଥଳକୁ ପଠାଇଛନ୍ତି । ଘଟଣାସ୍ଥଳରୁ ବସ୍ ଡ୍ରାଇଭର ଚମ୍ପଟ ମାରିଥିବା ବେଳେ ପୋଲିସ ଦୁର୍ଘଟଣା ଘଟଇଥିବା ଟ୍ରକ୍‌କୁ ଜବତ କରିବା ସହ ଟ୍ରକ୍ ଡ୍ରାଇଭର ଏବଂ ହେଲ୍ପରକୁ ଅଟକ ରଖି ଅଧିକ ତଦନ୍ତ ଜାରି ରଖିଛି ।