ନୂଆଦିଲ୍ଲୀ ଆଫଗାନିସ୍ତାନର ରାଜଧାନୀ କାବୁଲରେ ବିସ୍ଫୋରଣ। ତେହରିକ-ଏ-ତାଲିବାନ ପାକିସ୍ତାନ (ଟିଟିପି)କୁ ଟାର୍ଗେଟ କରି ଇସଲାମାବାଦର ଏୟାରଷ୍ଟ୍ରାଇକ। ଆଫଗାନିସ୍ତାନର ବୈଦେଶିକ ମନ୍ତ୍ରୀ ଆମିର ଖାନ ମୁତ୍ତାକି ତାଙ୍କର ଭାରତ ଗସ୍ତରେ ଥିବା ସମୟରେ ଏହି ଆକ୍ରମଣ ହୋଇଛି। ଏହା ସ୍ପଷ୍ଟ ଭାବରେ ସୂଚିତ କରେ ଯେ ନୂଆଦିଲ୍ଲୀ ଏବଂ କାବୁଲ ମଧ୍ୟରେ ବଢ଼ୁଥିବା କୂଟନୈତିକ ଘନିଷ୍ଠତା ବିଷୟରେ ପାକିସ୍ତାନ ଚିନ୍ତିତ ଥିବା ଏଥିରେ ବାରିହୋଇପଡୁଛି।
ଏହି ଘଟଣା ଏପରି ସମୟରେ ଘଟିଛି ଯେତେବେଳେ ତାଲିବାନ ଏବଂ ପାକିସ୍ତାନ ମଧ୍ୟରେ ସମ୍ପର୍କରେ ଉତ୍ତେଜନା ଦେଖାଦେଇଛି। ପାକିସ୍ତାନ ଦୀର୍ଘ ଦିନ ଧରି ଆଫଗାନିସ୍ତାନ ଉପରେ ଟିଟିପିକୁ ଆର୍ଥିକ ଏବଂ ସାମରିକ ସହାୟତା ଯୋଗାଇବାର ଅଭିଯୋଗ ଆଣିଛି।
ସ୍ଥାନୀୟ ରିପୋର୍ଟ ଅନୁଯାୟୀ, ସହିଦ ଅବଦୁଲ ହକ୍ ଚୌକ ନିକଟରେ ହୋଇଥିବା ଏୟାର ଷ୍ଟ୍ରାଇକ ଟିଟିପି ମୁଖ୍ୟ ନୁର ୱାଲି ମେହସୁଦଙ୍କ ଉପରେ କରାଯାଇଥିଲା। ସେ ୨୦୧୮ରେ ସଂଗଠନର ନେତୃତ୍ୱ ନେଇଥିଲେ। ତଥାପି, ମେହସୁଦ ଏକ ଅଡିଓ ବାର୍ତ୍ତାରେ କହିଛନ୍ତି ଯେ ସେ ସୁରକ୍ଷିତ ଅଛନ୍ତି ଏବଂ ତାଙ୍କ ମୃତ୍ୟୁ କିମ୍ବା ନିଖୋଜ ହେବାର ରିପୋର୍ଟ ମିଥ୍ୟା।
ମେହସୁଦ ୯/୧୧ ଆକ୍ରମଣ ପରେ ଆମେରିକା ସହିତ ପାକିସ୍ତାନର ମେଣ୍ଟକୁ ବିଶ୍ୱାସଘାତକତା ବୋଲି ବିବେଚନା କରିଥିଲେ ଏବଂ ଇସଲାମାବାଦ ପାଇଁ ସମସ୍ୟାର ଉତ୍ସ ହୋଇ ରହିଛି। ଟିଟିପି ସାମ୍ପ୍ରତିକ ବର୍ଷଗୁଡ଼ିକରେ ପାକିସ୍ତାନରେ ସାମରିକ କର୍ମଚାରୀମାନଙ୍କୁ ବାରମ୍ବାର ଆକ୍ରମଣ କରିଛି। ଅକ୍ଟୋବର ୮ ତାରିଖରେ ହୋଇଥିବା ଆକ୍ରମଣରେ ଆଫଗାନ ସୀମା ନିକଟରେ ଦୁଇ ବରିଷ୍ଠ ଅଧିକାରୀ ସମେତ ୧୧ ଜଣ ପାକିସ୍ତାନୀ ସୈନିକଙ୍କ ମୃତ୍ୟୁ ଘଟିଥିଲା।
ପୂର୍ବତନ ଆମେରିକୀୟ ରାଷ୍ଟ୍ରଦୂତ ଜାଲମୟ ଖଲିଲଜାଦ ଏହି ବିମାନ ଆକ୍ରମଣକୁ ବିପଜ୍ଜନନକ ବୋଲି ବର୍ଣ୍ଣନା କରିଛନ୍ତି। ପାକିସ୍ତାନ-ତାଲିବାନ ଆଲୋଚନା ପାଇଁ ଆହ୍ୱାନ କରିଥିଲେ। ପାକିସ୍ତାନର ପ୍ରତିରକ୍ଷା ମନ୍ତ୍ରୀ ଖୱାଜା ଆସିଫ ଚେତାବନୀ ଦେବାର 24 ଘଣ୍ଟା ପରେ ଏହି ଆକ୍ରମଣ ହୋଇଥିଲା। ଆସିଫ ଜାତୀୟ ପରିଷଦରେ ସ୍ପଷ୍ଟ ଭାବରେ କହିଥିଲେ ଯେ ପାକିସ୍ତାନର ଧୈର୍ଯ୍ୟ ଶେଷ ହୋଇଯାଇଛି କାରଣ ଏହାର ମାଟିକୁ ଟାର୍ଗେଟ କରୁଥିବା ଆତଙ୍କବାଦୀମାନେ ଲଗାତାର ଆଫଗାନିସ୍ତାନ ଅଞ୍ଚଳ ବ୍ୟବହାର କରୁଛନ୍ତି। ସେ କହିଥିଲେ ଯେ “ବହୁତ ହେଲା।”
ତାଲିବାନ ଏବଂ ଭାରତକୁ ଏକ ବାର୍ତ୍ତା ପଠାଇବା ପାଇଁ କାବୁଲରେ ଆକ୍ରମଣର ସମୟ ବାଛିଥିଲା ପାକିସ୍ତାନ। ତାଲିବାନ ବୈଦେଶିକ ମନ୍ତ୍ରୀ ମୁତାକି ଛଅ ଦିନିଆ ଭାରତ ଗସ୍ତରେ ଅଛନ୍ତି, ଏହି ସମୟରେ ସେ ବୈଦେଶିକ ମନ୍ତ୍ରୀ ଏସ. ଜୟଶଙ୍କର ଏବଂ ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲଙ୍କ ସହ ସାକ୍ଷାତ କରିବେ।
