ନୂଆଦିଲ୍ଲୀ: ଶିକ୍ଷା କ୍ଷେତ୍ରରେ ଭାରତ ଏବଂ ବ୍ରିଟେନ ମଧ୍ୟରେ ବଡ଼ ଡିଲ୍। ଶିକ୍ଷା ସମ୍ପର୍କକୁ ନୂତନ ଉଚ୍ଚତାରେ ପହଞ୍ଚାଇବା ପାଇଁ ବଡ଼ ଘୋଷଣା କଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ୯ ପ୍ରତିଷ୍ଠିତ ବ୍ରିଟେନ ବିଶ୍ୱବିଦ୍ୟାଳୟ ଖୁବ୍ ଶୀଘ୍ର ଭାରତରେ କ୍ୟାମ୍ପସ ସ୍ଥାପନ କରିବେ। ଏହି ଘୋଷଣା ବ୍ରିଟିଶ ପ୍ରଧାନମନ୍ତ୍ରୀ କୀର ଷ୍ଟାରମରଙ୍କ ଭାରତ ଗସ୍ତ ସମୟରେ କରାଯାଇଛି। ଏହା ଦୁଇ ଦେଶ ମଧ୍ୟରେ ଏକ ମୁକ୍ତ ବାଣିଜ୍ୟ ଚୁକ୍ତି ସ୍ୱାକ୍ଷରିତ ହେବା ପରେ ଦ୍ୱିପାକ୍ଷିକ ସମ୍ପର୍କରେ ନୂତନ ଗତିର ପ୍ରତୀକ।
ପ୍ରଧାନମନ୍ତ୍ରୀ ମୋଦି ଟ୍ୱିଟ୍ କରିଛନ୍ତି, “ପ୍ରଧାନମନ୍ତ୍ରୀ ଷ୍ଟାରମରଙ୍କ ସହିତ ଏପର୍ଯ୍ୟନ୍ତର ସବୁଠାରୁ ବଡ଼ ଏବଂ ପ୍ରଭାବଶାଳୀ ଶିକ୍ଷା ପ୍ରତିନିଧି ଦଳ ଅଛନ୍ତି। ଏହା ବହୁତ ଖୁସିର କଥା ଯେ ନଅଟି ୟୁକେ ୟୁନିଭରର୍ସିଟି ଏବେ ଭାରତରେ କ୍ୟାମ୍ପସ ଖୋଲିବେ। ସାଉଥାମ୍ପଟନ୍ ବିଶ୍ୱବିଦ୍ୟାଳୟର ଗୁରୁଗ୍ରାମ କ୍ୟାମ୍ପସ୍ ଉଦଘାଟନ କରାଯାଇଥିଲା। ଛାତ୍ରମାନଙ୍କର ନାମ ଲେଖାଇ ସାରିଲେଣି। ସେ ଏହାକୁ ଭାରତ-ୟୁକେ ଶିକ୍ଷା ସହଭାଗୀତାରେ ଏକ “ନୂତନ ଅଧ୍ୟାୟ” ଭାବରେ ବର୍ଣ୍ଣନା କରିଥିଲେ।
ଏହି ପଦକ୍ଷେପ ଅଧୀନରେ, ନଅଟି ଶ୍ରେଷ୍ଠ ୟୁକେ ବିଶ୍ୱବିଦ୍ୟାଳୟ ଭାରତର ବିଭିନ୍ନ ସହରରେ କ୍ୟାମ୍ପସ ଖୋଲିବେ। ଏଥିମଧ୍ୟରୁ ଗୋଟିଏ, ସାଉଥାମ୍ପଟନ୍ ବିଶ୍ୱବିଦ୍ୟାଳୟର ଗୁରୁଗ୍ରାମ କ୍ୟାମ୍ପସ୍, ଖୋଲିସାରିଛି, ଏବଂ ଛାତ୍ରମାନଙ୍କର ପ୍ରଥମ ବ୍ୟାଚ୍ ସେମାନଙ୍କର ଅଧ୍ୟୟନ ଆରମ୍ଭ କରିସାରିଛି। ୫ଟି ବିଶ୍ୱବିଦ୍ୟାଳୟର ନାମ ହୋଇଥିବା ବେଳେ ବାକି ଚାରୋଟି ବିଶ୍ୱବିଦ୍ୟାଳୟ ଖୁବ୍ ଶୀଘ୍ର ଘୋଷଣା କରାଯିବ।
ପ୍ରମୁଖ ବିଶ୍ୱବିଦ୍ୟାଳୟଗୁଡ଼ିକର ତାଲିକା:
ସାଉଥାମ୍ପଟନ୍ ବିଶ୍ୱବିଦ୍ୟାଳୟ: ଗୁରୁଗ୍ରାମ
ଲିଭରପୁଲ୍ ବିଶ୍ୱବିଦ୍ୟାଳୟ: ବେଙ୍ଗାଲୁରୁ
ୟର୍କ ବିଶ୍ୱବିଦ୍ୟାଳୟ: ମୁମ୍ବାଇ
ଆବରଡିନ୍ ବିଶ୍ୱବିଦ୍ୟାଳୟ: ମୁମ୍ବାଇ
ବ୍ରିଷ୍ଟଲ୍ ବିଶ୍ୱବିଦ୍ୟାଳୟ: ମୁମ୍ବାଇ
ଭାରତୀୟ ଛାତ୍ରମାନେ ଏବେ ବିଦେଶ ନ ଯାଇ ବ୍ରିଟିଶ ଶିକ୍ଷାର ଅନୁଭବ କରିବେ। ଭାରତରେ ବିଶ୍ୱସ୍ତରୀୟ ପାଠ୍ୟକ୍ରମ ଏବଂ ଗବେଷଣା ସୁଯୋଗ ଉପଲବ୍ଧ ହେବ। ଶିକ୍ଷା, ଦକ୍ଷତା ବିକାଶ ଏବଂ ନିଯୁକ୍ତି ପାଇଁ ନୂତନ ରାସ୍ତା ଖୋଲିବ। ଏହା ଭାରତକୁ “ବିଶ୍ୱସ୍ତରୀୟ ଶିକ୍ଷା କେନ୍ଦ୍ର” କରିବା ଦିଗରେ ଏକ ଦୃଢ଼ ପଦକ୍ଷେପ। ଶିକ୍ଷା ବିଶେଷଜ୍ଞମାନେ କହିଛନ୍ତି ଯେ ଏହି ପଦକ୍ଷେପ ଭାରତକୁ ଉଚ୍ଚଶିକ୍ଷାରେ ଏକ ପ୍ରମୁଖ ଶକ୍ତି ଭାବରେ ଉଭା ହେବାରେ ସାହାଯ୍ୟ କରିବ। ଏହା କେବଳ ଛାତ୍ରଛାତ୍ରୀମାନଙ୍କୁ ଲାଭ ଦେବ ନାହିଁ ବରଂ ବିଦେଶୀ ନିବେଶ ଏବଂ ଗବେଷଣା ସହଯୋଗକୁ ମଧ୍ୟ ବୃଦ୍ଧି କରିବ।
