S

କୋଲଡ୍ରିଫ୍ କଫ୍ ସିରପ୍ ନିର୍ମାତା କମ୍ପାନୀ ଶ୍ରୀସନ୍ ମେଡିକାଲ୍ସର ମାଲିକଙ୍କୁ ଗିରଫ କରାଯାଇଛି। ମଧ୍ୟପ୍ରଦେଶରେ କଫ୍‌ ସିରପ୍ ପିଇ ଅତି କମରେ ୨୧ ଜଣ ଶିଶୁଙ୍କ ମୃତ୍ୟୁ ହେବା ଘଟଣାରେ ଶ୍ରୀସନ୍ ମେଡିକାଲ୍ସର ମାଲିକ ଜି. ରଙ୍ଗନାଥନଙ୍କୁ ଚେନ୍ନାଇରୁ ଗିରଫ କରାଯାଇଛି। ସିରପ୍‌ରେ ପ୍ରଚୁର ପରିମାଣରେ ବିଷାକ୍ତ ଶିଳ୍ପ ରାସାୟନିକ ଡାଇଥାଇଲିନ୍ ଗ୍ଲାଇକଲ୍ ଥିବା ଜଣାପଡ଼ିବା ପରେ ତାଙ୍କୁ ଗିରଫ କରାଯାଇଛି।
ପୋଲିସ ସୂଚନା ଅନୁଯାୟୀ, ମାଲିକ ରଙ୍ଗନାଥନଙ୍କୁ ଗତକାଲି ରାତିରେ ଚେନ୍ନାଇରୁ ଗିରଫ କରାଯାଇଥିଲା ଏବଂ ଟ୍ରାଞ୍ଜିଟ୍ ରିମାଣ୍ଡ ପାଇବା ପରେ ତାଙ୍କୁ ମଧ୍ୟପ୍ରଦେଶର ଛିନ୍ଦୱାଡା ଜିଲ୍ଲା – ଯେଉଁଠାରେ ଅଧିକାଂଶ ମୃତ୍ୟୁ ରିପୋର୍ଟ ହୋଇଛି – ନିଆଯିବ। ମଧ୍ୟପ୍ରଦେଶ ପୋଲିସ ରଙ୍ଗନାଥନଙ୍କୁ ହେପାଜତକୁ ନେଇ ପଚରାଉଚରା କରିଛି।
ପ୍ରାରମ୍ଭିକ ତଦନ୍ତରୁ ଜଣାପଡିଛି ଯେ ମଧ୍ୟପ୍ରଦେଶ ବ୍ୟତୀତ ଓଡ଼ିଶା ଏବଂ ପୁଡୁଚେରୀକୁ ମଧ୍ୟ କଫ ସିରପ ଯୋଗାଣ କରାଯାଇଥିଲା।
ତାମିଲନାଡୁ ଡ୍ରଗ୍ସ କଣ୍ଟ୍ରୋଲ ବିଭାଗର ଏକ ସାଂଘାତିକ ୨୬ ପୃଷ୍ଠାର ରିପୋର୍ଟ କାନସେପୁରାର ଫାର୍ମା ଫ୍ୟାକ୍ଟ୍ରିରେ କଫ ସିରପ ତିଆରି ହେଉଥିବା ଅସ୍ୱଚ୍ଛ ପରିସ୍ଥିତିକୁ ପଦାରେ ପକାଇଛି। ରାଜ୍ୟ ନିୟାମକ ସଂସ୍ଥା ଦ୍ୱାରା ଚିହ୍ନଟ କରାଯାଇଥିବା ୩୫୦ଟି ଉଲ୍ଲଂଘନ ମଧ୍ୟରେ ଅଣ-ଫାର୍ମା-ଗ୍ରେଡ୍ ରାସାୟନିକ ପଦାର୍ଥର ଅବୈଧ ବ୍ୟବହାର ମଧ୍ୟ।
ତାମିଲନାଡୁ (Tamilnadu) ନିୟାମକ ସଂସ୍ଥା ଦ୍ୱାରା କରାଯାଇଥିବା ଯାଞ୍ଚରୁ ଜଣାପଡିଛି ଯେ ୪୮ ପ୍ରତିଶତ ପର୍ଯ୍ୟନ୍ତ ଶିଳ୍ପ ତରଳ ପଦାର୍ଥ ମିଶିଛି, ଯଦିଓ ୦.୧ ପ୍ରତିଶତ ମିଶାଇବା ପାଇଁ ଅନୁମୋଦନ ଥିଲା। ଗୁଡ୍ ମାନୁଫାକ୍ଚରିଂ ପ୍ରାକ୍ଟିସ୍ (GMP) ପ୍ରମାଣପତ୍ର ଅଭାବ ସତ୍ତ୍ୱେ, ରଙ୍ଗନାଥନଙ୍କ କମ୍ପାନୀ ଜେନେରିକ୍ ଔଷଧ ଉତ୍ପାଦନ ଏବଂ ବିକ୍ରୟ ଜାରି ରଖିଥିଲା।
ଏହା ଜଣା ପଡିବା ପରେ, ନିୟାମକ ସଂସ୍ଥା କମ୍ପାନୀର ଲାଇସେନ୍ସକୁ ସ୍ଥଗିତ କରିବା ସହିତ ଏକ ଉତ୍ପାଦନ ବନ୍ଦ ଆଦେଶ ଜାରି କରିଥିଲା।
ଫାର୍ମା କମ୍ପାନୀର କାଞ୍ଚିପୁରମ କାରଖାନାରେ ଏଭଳି ରାସାୟନିକ ପଦାର୍ଥର ଅପମିଶ୍ରଣ ଜଣା ପଡିବା ପରେ, କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟର କହିଛି ଯେ କୋଲଡ୍ରିଫରେ ବିଷାକ୍ତ ରାସାୟନିକ ପଦାର୍ଥ ଚିହ୍ନଟ ହେବା ପରେ କେନ୍ଦ୍ରୀୟ ଔଷଧ ମାନକ ନିୟନ୍ତ୍ରଣ ସଂଗଠନ (CDSCO) ଔଷଧର ଉତ୍ପାଦନ ଲାଇସେନ୍ସ ବାତିଲ କରିବାକୁ ପୂର୍ବରୁ କହିସାରିଛି।