ନୂଆଦିଲ୍ଲୀ: କଂଗ୍ରେସ ସାଂସଦ ଏବଂ ଲୋକସଭାର ବିରୋଧୀ ଦଳ ନେତା ରାହୁଲ ଗାନ୍ଧୀ କେନ୍ଦ୍ର ସରକାରଙ୍କ ‘ଗ୍ରେଟ୍ ନିକୋବର ବିକାଶ ପ୍ରକଳ୍ପ’ (Great Nicobar Development Project) କୁ ନେଇ ପୁଣି ଥରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସରକାରଙ୍କୁ ତୀବ୍ର ସମାଲୋଚନା କରିଛନ୍ତି। ସୋସିଆଲ ମିଡିଆ ପ୍ଲାଟଫର୍ମ X (ପୂର୍ବରୁ ଟ୍ୱିଟର) ରେ ଏକ ପୋଷ୍ଟ ସେୟାର କରି ରାହୁଲ ଅଭିଯୋଗ କରିଛନ୍ତି ଯେ, କେନ୍ଦ୍ର ସରକାର ସ୍ଥାନୀୟ ଜୈବ ବିବିଧତା ଏବଂ ଆଦିବାସୀଙ୍କ କଲ୍ୟାଣ ଅପେକ୍ଷା ବ୍ୟବସାୟିକ ସ୍ୱାର୍ଥକୁ ଅଧିକ ଗୁରୁତ୍ୱ ଦେଉଛନ୍ତି।
ସ୍କୁବା ଡାଇଭିଂ ଏବଂ ଇନ୍ଦିରା ପଏଣ୍ଟ ଗସ୍ତ
ରାହୁଲ ଗାନ୍ଧୀ ନିକଟରେ ‘ଇନ୍ଦିରା ପଏଣ୍ଟ’ ଗସ୍ତ କରିଥିଲେ। ସେ ସେଠାରେ ରହୁଥିବା ସ୍ଥାନୀୟ ଆଦିବାସୀ ସମ୍ପ୍ରଦାୟ ଏବଂ ପୂର୍ବରୁ ସେଠାରେ ବସବାସ କରୁଥିବା ଲୋକଙ୍କ ସହ ଆଲୋଚନା କରିଥିଲେ। ରାହୁଲ ଗାନ୍ଧୀ ଶେୟାର କରିଥିବା ଏକ ଭିଡିଓରେ ସେ ଗ୍ରେଟ୍ ନିକୋବରର ସମୁଦ୍ରରେ କୋରାଲ୍ ରୀଫ୍ (ପ୍ରବାଳ ପ୍ରାଚୀର) ମଧ୍ୟରେ ସ୍କୁବା ଡାଇଭିଂ (Scuba Diving) କରୁଥିବା ଏବଂ ସ୍ଥାନୀୟ ଲୋକଙ୍କୁ ଭେଟୁଥିବା ଦେଖିବାକୁ ମିଳିଛି।
ରାହୁଲ ଗାନ୍ଧୀଙ୍କ ଅଭିଯୋଗ
ଗ୍ରେଟ୍ ନିକୋବର ପ୍ରକଳ୍ପକୁ ନେଇ ରାହୁଲ ଗାନ୍ଧୀ କେନ୍ଦ୍ର ସରକାରଙ୍କ ବିରୋଧରେ ଗୁରୁତର ଅଭିଯୋଗ ଆଣିଛନ୍ତି । ଏହି ପ୍ରକଳ୍ପ ଯୋଗୁଁ ପ୍ରାୟ ୧.୫ କୋଟି ଗଛ କଟାଯିବ, ଯାହା ପରିବେଶ ପାଇଁ ବଡ଼ ବିପଦ ସୃଷ୍ଟି କରିବ। ଜଙ୍ଗଲ ଅଧିକାର ଆଇନ (Forest Rights Act) ର ଉଲ୍ଲଂଘନ କରି ଆଦିବାସୀମାନଙ୍କୁ ସେମାନଙ୍କ ଜମିରୁ ବେଦଖଲ କରାଯାଉଛି। ଏପରିକି ସରକାରଙ୍କ ଦ୍ୱାରା ସେଠାରେ ଥଇଥାନ ହୋଇଥିବା ପୂର୍ବତନ ସୈନିକମାନଙ୍କୁ ମଧ୍ୟ ଉପଯୁକ୍ତ କ୍ଷତିପୂରଣ ମିଳୁନାହିଁ ବୋଲି ସେ ଅଭିଯୋଗ କରିଛନ୍ତି।
ସେ ଆହୁରି କହିଛନ୍ତି, ଏହି ପ୍ରକଳ୍ପ ପାଇଁ ମାନଚିତ୍ରରୁ କୋରାଲ୍ ରୀଫ୍ (ପ୍ରବାଳ ପ୍ରାଚୀର) ଗୁଡ଼ିକୁ ସରକାର ଚତୁରତାର ସହ ହଟାଇ ଦେଇଛନ୍ତି, ଫଳରେ ସମୁଦ୍ରର ଜୈବ ବିବିଧତା ନଷ୍ଟ ହେବ। ସେହିଭଳି ଟ୍ରାନ୍ସସିପମେଣ୍ଟ ବନ୍ଦରର ଆବଶ୍ୟକତା ନାହିଁ ବୋଲି ରାହୁଲ ଗାନ୍ଧୀ କହିଛନ୍ତି । ବିଜେପି ନେତୃତ୍ୱାଧୀନ କେନ୍ଦ୍ର ସରକାର ଏହି ଗ୍ରେଟ୍ ନିକୋବର ପ୍ରକଳ୍ପକୁ ଦେଶର ସାମରିକ ତଥା ରଣନୈତିକ ସୁରକ୍ଷା ଦୃଷ୍ଟିରୁ ଗୁରୁତ୍ୱପୂର୍ଣ୍ଣ ବୋଲି ଦର୍ଶାଉଛନ୍ତି। ଏହାର ଜବାବରେ ରାହୁଲ କହିଛନ୍ତି, ଯଦି ରାଷ୍ଟ୍ରୀୟ ସୁରକ୍ଷା ହିଁ ସରକାରଙ୍କ ପ୍ରାଥମିକତା, ତେବେ ସେମାନେ ଆଣ୍ଡାମାନ ଓ ନିକୋବରରେ ଥିବା ଭାରତୀୟ ନୌସେନାର ଏୟାର ଷ୍ଟେସନ ‘INS ବାଜ୍’ (INS Baaz) ର ସମ୍ପ୍ରସାରଣକୁ ପ୍ରାଥମିକତା ଦେବା ଉଚିତ। ବିଗତ ୫ ବର୍ଷ ହେବ ନୌସେନା ଏହାର ସମ୍ପ୍ରସାରଣ ପାଇଁ ଦାବି କରୁଛି, କିନ୍ତୁ ସରକାର ଏହାକୁ ଅଣଦେଖା କରୁଛନ୍ତି। ଯଦି ସରକାର ‘INS ବାଜ୍’ ର ସମ୍ପ୍ରସାରଣ କରନ୍ତି, ତେବେ ବିରୋଧୀ ଦଳ ସରକାରଙ୍କୁ ସମ୍ପୂର୍ଣ୍ଣ ସମର୍ଥନ ଜଣାଇବ।
I visited the southernmost tip of India.
I stood at Indira Point. I walked under trees that have stood for centuries. I dove into coral reefs among the most vibrant on earth.
And I sat with the people who live there. Tribal communities, whose land is being taken away by… pic.twitter.com/RLNtT6L0U4
— Rahul Gandhi (@RahulGandhi) June 5, 2026
ସ୍ଥାୟୀ ପର୍ଯ୍ୟଟନ ଉପରେ ଗୁରୁତ୍ୱ
ରାହୁଲ ଗାନ୍ଧୀ କହିଛନ୍ତି ଯେ, ସେ ପରିବେଶର ସନ୍ତୁଳିତ ବିକାଶର ସମର୍ଥକ। ଗ୍ରେଟ୍ ନିକୋବର ମଧ୍ୟରେ ବିଶ୍ୱର ସବୁଠାରୁ ଆକର୍ଷଣୀୟ ଏବଂ ପରିବେଶ ଅନୁକୂଳ ସ୍ଥାୟୀ ପର୍ଯ୍ୟଟନ ସ୍ଥଳୀ (Sustainable Destination) ହେବାର ଅପାର ସମ୍ଭାବନା ରହିଛି। ବ୍ୟବସାୟିକ ଫାଇଦା ପାଇଁ ଏହି ପ୍ରକୃତିର ସନ୍ତୁଳନକୁ ନଷ୍ଟ ନ କରି ଏକ ସୁନ୍ଦର ତଥା ସବୁଜ ଭାରତ ଗଠନ ପାଇଁ ଲଢ଼େଇ ଜାରି ରହିବ ବୋଲି ସେ ନିଜର ଦାବି ଦୋହରାଇଛନ୍ତି।
