ଭୁବନେଶ୍ବର ୨୨।୧୦: ଭୁବନେଶ୍ବରରେ ଝାଡ଼ଖଣ୍ଡ ନାବାଳିକା ଦୁଷ୍କର୍ମ ଘଟଣା ପରେ ଯେଉଁ ବଡ଼ ସେକ୍ସ ରାକେଟ୍ର ଗୁମର ଖୋଲିଥିଲା ତାର ତନାଘନା ଜୋରଦାର କରିଛି କ୍ରାଇମବ୍ରାଞ୍ଚ । ସେପଟେ ଏହି ଘଟଣାରେ ଏକ ରୋଚକ ତଥ୍ୟ ସାମ୍ନାକୁ ଆସିଛି । ଲକ୍ଷ୍ମୀସାଗରର ଯେଉଁ ଘରୁ ସେକ୍ସ ରାକେଟ୍ ଠାବ ହୋଇଥିଲା ସେହି ଘରକୁ ଯାଇଥିବା ପ୍ରାୟ ସମସ୍ତ ଗ୍ରାହକଙ୍କୁ ଏଚ୍ଆଇଭି ବ୍ୟାପିଥିବା ସନ୍ଦେହ କରାଯାଉଛି I ସେଠାକୁ ନିୟମିତ ଆସୁଥିବା ଗ୍ରାହକଙ୍କ ମଧ୍ୟରୁ ପ୍ରାୟ ୨୭ ଜଣଙ୍କୁ ଏଚ୍ଆଇଭି ସଂକ୍ରମଣ ବ୍ୟାପିଥିବା ସନ୍ଦେହ ପ୍ରକାଶ ପାଇଛି I କ୍ୟାପିଟାଲ ଥାନା ପୋଲିସ ଦ୍ବାରା ଧରାପଡିଥିବା ଜଣେ ଅଭିଯୁକ୍ତ ପଜିଟିଭ୍ ହେବା ପରେ ତନାଘନା ଆରମ୍ଭ ହୋଇଛି I ଆଉ ସେଠାକୁ ନିୟମିତ ଯିବାଆସିବା କରୁଥିବା ଗ୍ରାହକଙ୍କ ଭିତରେ କୋକୁଆ ଭୟ ଖେଳିଯାଇଛି I
ଅନ୍ୟପଟେ ଏହି ଘଟଣାର ଗୁରୁତ୍ବକୁ ଦେଖି ଏହାକୁ ରେଡ୍ ଫ୍ଲାଗ୍ ଅନ୍ତର୍ଭୁକ୍ତ କରିଛି ପୋଲିସ । ଅର୍ଥାତ ୩ ମାସ ମଧ୍ୟରେ ଦୁଷ୍କର୍ମ ମାମଲାର ଚାର୍ଜସିଟ୍ କୋର୍ଟରେ ଦାଖଲ କରିବ ପୋଲିସ । ତଦନ୍ତରେ ସାମିଲ ହୋଇଛନ୍ତି କ୍ରାଇମ୍ ଏଗେନଷ୍ଟ ୱିମେନ (CAW)ର ୩ ଅଧିକାରୀ । ସିଏଡବ୍ଲୁ ଡିଏସ୍ପି କ୍ୟାପିଟାଲ ଥାନାର ତଦନ୍ତକାରୀ ଅଧିକାରୀଙ୍କୁ ତଦନ୍ତର ଅଗ୍ରଗତି ସଂପର୍କରେ ପଚାରି ବୁଝିଛନ୍ତି ।
ଯେଉଁ ଘରେ ସେକ୍ସ ରାକେଟ୍ ଠାବ ହୋଇଥିଲା ସେହିଘରୁ ଏଡସ୍ ମେଡିସିନ ଜବତ ହୋଇଥିଲା । ଯାହାକୁ ନେଇ ମଧ୍ୟ ଖୋଳତାଡ଼ ଆରମ୍ଭ ହୋଇଥିଲା । ଏହି ମେଡିସିନ କୋଲକାତାରୁ କିଣା ଯାଇଥିବା ମଧ୍ୟ ଜଣାପଡିଥିଲା । ଲକ୍ଷ୍ମୀସାଗର ସେକ୍ସ ରାକେଟ୍ରେ ଏସ୍ସ ରୋଗୀ ଥିବା ସନ୍ଦେହ କରାଯାଉଥିଲା ।
ଅନ୍ୟପଟେ ଏବେବି ପୋଲିସ ହାତରେ ଧରାପଡିନାହିଁ ସେକ୍ସ ରାକେଟ୍ ପରିଚାଳନା କରୁଥିବା ବାରିକ୍ ବାବୁ । ବାରିକ୍ ବାବୁକୁ ଧରିବା ପାଇଁ କ୍ୟାପିଟାଲ ଥାନା ପୋଲିସ ସହିତ ଲକ୍ଷ୍ମୀସାଗର ଥାନା ପୋଲିସ ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଛି । BNS 183ରେ ନାବାଳିକାଙ୍କ ବୟାନ କୋର୍ଟରେ ରେକର୍ଡ କରାଯିବ । ଏଥିରୁ ବହୁ ଗୁମର ଖୋଲିବା ସମ୍ଭାବନା ରହିଛି । ସେହିପରି ଉଦ୍ଧାର ହୋଇଥିବା ଯୁବତୀ ମାନଙ୍କୁ ସେମାନଙ୍କ ଘରକୁ ପଠାଇବା ପାଇଁ କୋର୍ଟର ନିର୍ଦ୍ଦେଶକୁ ଅପେକ୍ଷା କରିଛି ପୋଲିସ ।
