ନୂଆଦିଲ୍ଲୀ: ମାଲାୟାଲମ ସୁପରଷ୍ଟାର ମୋହନଲାଲ ୨୦୨୩ ପାଇଁ ପାଇବେ ଦାଦାସାହେବ ଫାଲକେ ସମ୍ମାନ । ସିନେମା ଜଗତରେ ତାଙ୍କର ଦୀର୍ଘ ଓ ସଫଳ କ୍ୟାରିୟର ପାଇଁ ଭାରତ ସରକାର ଦାଦାସାହେବ ଫାଲକେ ଆୱାର୍ଡ ୨୦୨୩ ପ୍ରଦାନ କରିବେ । ଶନିବାର କେନ୍ଦ୍ର ସୂଚନା ଓ ପ୍ରସାରଣ ମନ୍ତ୍ରଣାଳୟ ପକ୍ଷରୁ ଏହି ଘୋଷଣା କରାଯାଇଛି । ଉଲ୍ଲେଖଯୋଗ୍ୟ ଯେ ଏହି ଆୱାର୍ଡ ଭାରତୀୟ ସିନେମାର ସର୍ବୋଚ୍ଚ ସମ୍ମାନ । ସିନେମା ଉଦ୍ୟୋଗକୁ ବିଶେଷ ଯୋଗଦାନ ପାଇଁ ବିଶିଷ୍ଟ ବ୍ୟକ୍ତିଙ୍କୁ ଏହା ପ୍ରଦାନ କରାଯାଇଥାଏ । ଚାରି ଦଶନ୍ଧିରୁ ଅଧିକ ସମୟ ଧରି ଅଭିନୟ କରିଆସୁଥିବା ମୋହନଲାଲ ଭିନ୍ନ ଭିନ୍ନ ଚରିତ୍ରରେ ଅଭିନୟ କରି ସିନେ ପ୍ରେମୀଙ୍କ ମନରେ ଅଲିଭା ଛାପ ଛାଡ଼ିଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏହି ଅବସରରେ ଏକ୍ସରେ ପୋଷ୍ଟ କରି ମୋହନଲାଲଙ୍କୁ ଶୁଭେଚ୍ଛା ଜଣାଇଛନ୍ତି।
ସୂଚନା ଓ ପ୍ରସାରଣ ମନ୍ତ୍ରଣାଳୟ ଶନିବାର ଏକ୍ସରେ ଲେଖିଛି, “ଦାଦାସାହେବ ଫାଲକେ ପୁରସ୍କାର ଚୟନ କମିଟିର ସୁପାରିଶ କ୍ରମେ, ଭାରତ ସରକାର ଶ୍ରୀ ମୋହନଲାଲଙ୍କୁ ୨୦୨୩ ମସିହାର ପ୍ରତିଷ୍ଠିତ ଦାଦାସାହେବ ଫାଲକେ ପୁରସ୍କାର ପ୍ରଦାନ କରିବେ । ମୋହନଲାଲଙ୍କ ଉଲ୍ଲେଖନୀୟ ସିନେମା ଯାତ୍ରା ଅନେକ ପିଢ଼ିକୁ ଅନୁପ୍ରାଣିତ କରେ ! ଭାରତୀୟ ସିନେମାରେ ତାଙ୍କର ସ୍ମରଣୀୟ ଅବଦାନ ପାଇଁ ଏହି ପ୍ରସିଦ୍ଧ ଅଭିନେତା, ନିର୍ଦ୍ଦେଶକ ଏବଂ ପ୍ରଯୋଜକଙ୍କୁ ସମ୍ମାନିତ କରାଯାଉଛି । ତାଙ୍କର ଅତୁଳନୀୟ, ବହୁମୁଖୀ ପ୍ରତିଭା ଏବଂ କଠିନ ପରିଶ୍ରମ ଭାରତୀୟ ଚଳଚ୍ଚିତ୍ର ଇତିହାସରେ ଏକ ସ୍ୱର୍ଣ୍ଣିମ ମାନଦଣ୍ଡ ସ୍ଥାପନ କରିଛି । ଏହି ପୁରସ୍କାର ୨୩ ସେପ୍ଟେମ୍ବର ୨୦୨୫ରେ ୭୧ତମ ଜାତୀୟ ଚଳଚ୍ଚିତ୍ର ପୁରସ୍କାର ସମାରୋହରେ ପ୍ରଦାନ କରାଯିବ ।”
On the recommendation of the Dadasaheb Phalke Award Selection Committee, the Government of India is pleased to announce that Shri. Mohanlal will be conferred the prestigious Dadasaheb Phalke Award 2023.
Mohanlal’s remarkable cinematic journey inspires generations! 🌟
— Ministry of Information and Broadcasting (@MIB_India) September 20, 2025
ଭାରତୀୟ ସିନେମା ଜଗତର ପିତା ଭାବେ ପରିଚିତ ଦାଦାସାହେବଙ୍କ ନାମରେ ଏହି ପୁରସ୍କାର ୧୯୬୯ ମସିହାରେ ପ୍ରତିଷ୍ଠା କରାଯାଇଥିଲା । ୧୯୧୩ ମସିହାରେ ଦାଦା ସାହେବ ଦେଶର ପ୍ରଥମ ଫିଚର ଫିଲ୍ମ ରାଜା ହରିଶ୍ଚନ୍ଦ୍ରର ନିର୍ଦ୍ଦେଶନା ଦେଇଥିଲେ। ପ୍ରତିବର୍ଷ ଜାତୀୟ ସିନେମା ଉତ୍ସବରେ ଏହି ପୁରସ୍କାର ପ୍ରଦାନ କରାଯାଇଥାଏ ।
୧୯୬୦ ମେ ୨୧ରେ ପଠାଣମଥିଟ୍ଟା ଜିଲ୍ଲାର ଇଲାନ୍ଥୁରରେ ମୋହନଲାଲ ଜନ୍ମଗ୍ରହଣ କରିଥିଲେ । ପୂର୍ବତନ ପ୍ରଶାସକ ବିଶ୍ୱନାଥନ ନାୟାର ଏବଂ ଶାନ୍ତାକୁମାରୀଙ୍କ ଦ୍ୱିତୀୟ ପୁତ୍ର । ସେ ଦୁଇଥର ଶ୍ରେଷ୍ଠ ଅଭିନେତା ସମେତ ପାଞ୍ଚଟି ଜାତୀୟ ଚଳଚ୍ଚିତ୍ର ପୁରସ୍କାର ଜିତିଛନ୍ତି । ୨୦୦୧ ମସିହାରେ, ତାଙ୍କୁ କେନ୍ଦ୍ର ସରକାର ଦ୍ୱାରା ଦେଶର ଚତୁର୍ଥ ସର୍ବୋଚ୍ଚ ନାଗରିକ ପୁରସ୍କାର ପଦ୍ମଶ୍ରୀ ଏବଂ ୨୦୧୯ରେ ଦେଶର ତୃତୀୟ ସର୍ବୋଚ୍ଚ ନାଗରିକ ପୁରସ୍କାର ପଦ୍ମଭୂଷଣ ପ୍ରଦାନ କରାଯାଇଥିଲା । ୨୦୦୯ ମସିହାରେ ତାଙ୍କୁ ଭାରତୀୟ କ୍ଷେତ୍ରୀୟ ସେନାରେ ଲେଫ୍ଟନାଣ୍ଟ କର୍ଣ୍ଣେଲ ପଦବୀ ମଧ୍ୟ ପ୍ରଦାନ କରାଯାଇଥିଲା, ଯାହା କୌଣସି ଅଭିନେତାଙ୍କ ପାଇଁ ପ୍ରଥମ ଥିଲା । ସିନେମା ଏବଂ ସଂସ୍କୃତ ନାଟକ ଜଗତରେ ଅବଦାନ ପାଇଁ ମୋହନଲାଲଙ୍କୁ କାଲାଡି ଶ୍ରୀ ଶଙ୍କରାଚାର୍ଯ୍ୟ ସଂସ୍କୃତ ବିଶ୍ୱବିଦ୍ୟାଳୟରୁ ଡକ୍ଟରେଟ୍ ଡିଗ୍ରୀରେ ମଧ୍ୟ ସମ୍ମାନିତ କରାଯାଇଛି ।
