ନୂଆଦିଲ୍ଲୀ: ଆମେରିକା ବଳରେ ବଳିଆନ୍ ପାକିସ୍ତାନ। ଭାରତକୁ ଦେଉଛି ପରମାଣୁ ଧମକ। ଭାରତ ବିରୁଦ୍ଧରେ ପୁଣି ବିଷ ଓଗାଳିଛନ୍ତି ପାକିସ୍ତାନର ସେନା ମୁଖ୍ୟ ଫିଲ୍ଡ ମାର୍ଶାଲ ଅସୀମ ମୁନିର। ନୂଆଦିଲ୍ଲୀ ବିରୋଧରେ ଦେଇଛନ୍ତି ଉତ୍ତେଜନାପୂର୍ଣ୍ଣ ବୟାନ। ଭାରତର ଯେକୌଣସି ଜବାବର ଘାତକ ଜବାବରେ ଦେବାକୁ ପାକିସ୍ତାନ ପ୍ରସ୍ତୁତ ଥିବା ସେ କହିଛନ୍ତି। ଆବୋଟାବାଦର କାଲୁଲରେ ଥିବା ପାକିସ୍ତାନ ସାମରିକ ଏକାଡେମୀରେ କ୍ୟାଡେଟମାନଙ୍କୁ ସମ୍ବୋଧିତ କରି ଏହା କହିଛନ୍ତି ମୁନିର।
ମୁନିର କହିଥିଲେ ଯେ ଭାରତର ଭୌଗୋଳିକ ବିଶାଳତାର ଭ୍ରମକୁ ଭାଙ୍ଗି ଦେବ ପାକିସ୍ତାନ। ଉତ୍ତେଜନାପୂର୍ଣ୍ଣ ବୟାନବାଜିରୁ ନିବୃତ୍ତ ରହିବା ଏବଂ ଜାତିସଂଘ ପ୍ରସ୍ତାବ ଏବଂ ଅନ୍ତର୍ଜାତୀୟ ଚୁକ୍ତି ଅନୁଯାୟୀ ସମସ୍ତ ବିବାଦର ସମାଧାନ କରିବାକୁ ଆହ୍ୱାନ କରିଛନ୍ତି। ପାକିସ୍ତାନକୁ ଦମନ କିମ୍ବା ଭୟଭୀତ କରାଯାଇପାରିବ ନାହିଁ ବୋଲି କହିଛନ୍ତି ମୁନିର।
ଏହା ପ୍ରଥମ ଥର ନୁହେଁ ଯେତେବେଳେ ଅସୀମ ମୁନିର ଭାରତ ବିଷୟରେ ଏପରି ଅନେକ ଥର ବୟାନ ଦେଇଛନ୍ତି। ଅଗଷ୍ଟ ୨୦୨୫ରେ, ଆମେରିକାର ଟାମ୍ପାରେ ଏକ କାର୍ଯ୍ୟକ୍ରମ ସମୟରେ ସେ କହିଥିଲେ ଯେ ଯଦି ପାକିସ୍ତାନ ଏକ ଅସ୍ତିତ୍ୱ ସଙ୍କଟର ସମ୍ମୁଖୀନ ହୁଏ, ତେବେ ଏହା ଅଧା ବିଶ୍ୱକୁ ନିଜ ସହିତ ନେଇଯିବ।
ସେ ଏହା ମଧ୍ୟ କହିଥିଲେ ଯେ ଯଦି ଭାରତ ସିନ୍ଧୁ ନଦୀ ଉପରେ ଏକ ବନ୍ଧ ନିର୍ମାଣ କରେ, ତେବେ ପାକିସ୍ତାନ ୧୦ଟି ମିଶାଇଲ ସହିତ ଏହାକୁ ଧ୍ୱଂସ କରିବ। ପାକିସ୍ତାନ ଏହି ବିବୃତ୍ତିଗୁଡ଼ିକୁ ଆନ୍ତର୍ଜାତୀୟ ସ୍ତରରେ ବ୍ଲାକମେଲ୍ ଏବଂ ଦାୟିତ୍ୱହୀନ ମନ୍ତବ୍ୟ କରୁହାଯାଇଥିଲା।
ଭାରତକୁ ଅସୀମ ମୁନିର ଟାର୍ଗେଟ କରିବା ଏହା ପ୍ରଥମଥର ନୁହେଁ। କିନ୍ତୁ ଏପରି ବୟାନ ଆଞ୍ଚଳିକ ସ୍ଥିରତା ପାଇଁ ବିପଦ ସୃଷ୍ଟି କରେ ବୋଲି କହିଛି ନୂଆଦିଲ୍ଲୀ। ଏହା ବ୍ୟତୀତ, ବୈଦେଶିକ ମନ୍ତ୍ରଣାଳୟର ମୁଖପାତ୍ର କହିଛନ୍ତି ଯେ ପାକିସ୍ତାନର ସେନାର ଆତଙ୍କବାଦୀ ସଂଗଠନ ସହିତ ସମ୍ପର୍କର ଇତିହାସ ରହିଛି। ତେଣୁ ଏହାର ପରମାଣୁ ଧମକ ଦେବା ଏବଂ ଏନେଇ ବିଶ୍ୱ ଚିନ୍ତିତ ହେବା ସ୍ୱାଭାବିକ।
