ନୂଆଦିଲ୍ଲୀ: ଇରାନ ଯୁଦ୍ଧର ଭୟଙ୍କର ପ୍ରଭାବ ପଡ଼ିଲାଣି । ପ୍ରଥମେ ଗ୍ୟାସ ସଙ୍କଟ, ଆଉ ଏବେ ପେଟ୍ରୋଲ୍ ଏବଂ ଡିଜେଲ ଅଭାବ ଭଳି ସ୍ଥିତି ଉପୁଜିଲାଣି । ଲୋକେ ଏନେଇ ଆଶଙ୍କାରେ ଥିବା ବେଳେ, ସରକାର ଆଶ୍ବସ୍ତି ଦେଇଛନ୍ତି । ଦେଶରେ ୬୦ ଦିନ ପାଇଁ ତୈଳ ଗଚ୍ଛିତ ଅଛି ବୋଲି ସରକାର କହିଛନ୍ତି । କିନ୍ତୁ ଏହାରି ମଧ୍ୟରେ, ଦେଶର ଏକ ବଡ଼ ଇନ୍ଧନ କମ୍ପାନୀ Nayara Energy ପେଟ୍ରୋଲ୍ ଏବଂ ଡିଜେଲ୍ ଦାମ ବୃଦ୍ଧି କରିଛି ।
ପେଟ୍ରୋଲ-ଡିଜେଲ୍ ମହଙ୍ଗା
ନାୟାରା ଏନର୍ଜି ଗୁରୁବାର ପେଟ୍ରୋଲ୍ ଲିଟର ପିଛା ୫ ଟଙ୍କା ବୃଦ୍ଧି କରିଥିବା ବେଳେ ଡିଜେଲ୍ ମୂଲ୍ୟ ପ୍ରତି ଲଟିର ୩ ଟଙ୍କା ବଢ଼ାଇଛି । ମଧ୍ୟପ୍ରାଚ୍ୟରେ ଯୁଦ୍ଧ ପରେ ଅଶୋଧିତ ତୈଳ ମୂଲ୍ୟ ବୃଦ୍ଧି ହୋଇଛି । ଆଉ ଏବେ ଗ୍ରାହକଙ୍କ ପାଖରୁ ଏହି ଖର୍ଚ୍ଚ ଉଠାଇବ କମ୍ପାନୀ । ଭାରତରେ ଇନ୍ଧନ ବିପଣନ କମ୍ପାନୀଗୁଡ଼ିକ ଚାପରେ ଅଛନ୍ତି। ଫେବୃଆରୀ ୨୮ ତାରିଖରୁ ବିଶ୍ୱରେ ଅଶୋଧିତ ତୈଳ ମୂଲ୍ୟରେ ପ୍ରାୟ ୫୦ ପ୍ରତିଶତ ବୃଦ୍ଧି ସତ୍ତ୍ୱେ ଖୁଚୁରା ପେଟ୍ରୋଲ ଏବଂ ଡିଜେଲ ମୂଲ୍ୟ ସ୍ଥିର ରହିଛି। ଫେବୃଆରୀ ୨୮ରେ ଆମେରିକା ଏବଂ ଇସ୍ରାଏଲ, ଇରାନ ଉପରେ ଯୁଦ୍ଧ ଆରମ୍ଭ କରିଥିଲେ । ଏହି ଯୁଦ୍ଧ ତୀବ୍ର ରୂପ ଧାରଣ କରିଥିବା ବେଳେ ଆହୁରି ବ୍ୟାପୁଛି ।
Also Read: LPG ଉପଭୋକ୍ତାଙ୍କୁ PNG ବ୍ୟବହାର କରିବାକୁ କାହିଁକି ବାଧ୍ୟ କରୁଛନ୍ତି ସରକାର, ରହିଛି ୫ ବଡ଼ କାରଣ
ସୂତ୍ର ଅନୁସାରେ, ଭାରତର ୧୦୨,୦୭୫ ପେଟ୍ରୋଲ ପମ୍ପ ମଧ୍ୟରୁ ୬,୯୬୭ଟି ପେଟ୍ରୋଲ ପମ୍ପ ପରିଚାଳନା କରୁଥିବା ନାୟାରା ଏନର୍ଜି କିଛି ବର୍ଦ୍ଧିତ ଇନପୁଟ୍ ଖର୍ଚ୍ଚ ଗ୍ରାହକଙ୍କ ଉପରେ ଲଦିବାକୁ ନିଷ୍ପତ୍ତି ନେଇଛି। ସେପଟେ ୨,୧୮୫ଟି ପେଟ୍ରୋଲ ପମ୍ପ ଥିବା ଜିଓ-ବିପି ପେଟ୍ରୋଲ ଏବଂ ଡିଜେଲ ଉପରେ ମୂଲ୍ୟ ବୃଦ୍ଧି କରି ନାହିଁ ।
ତୈଳ ଦର ବୃଦ୍ଧି
ସୂତ୍ର ଅନୁଯାୟୀ, ରୁଷିଆନ୍ କମ୍ପାନୀ ରୋସନେଫ୍ଟର ମାଲିକାନାରେ ଥିବା ନାୟାରା ପେଟ୍ରୋଲର ମୂଲ୍ୟ ଲିଟର ପିଛା ୫ ଟଙ୍କା ଏବଂ ଡିଜେଲର ମୂଲ୍ୟ ଲିଟର ପିଛା ୩ ବୃଦ୍ଧି କରିଛି । ତେବେ ଏହି ମୂଲ୍ୟ ବୃଦ୍ଧି ରାଜ୍ୟ ଅନୁସାରେ ଭିନ୍ନ ହୋଇଥାଏ। ଏହି ପାର୍ଥକ୍ୟ ଭାଟ୍ ଭଳି ସ୍ଥାନୀୟ କରର ହାର ଉପରେ ନିର୍ଭର କରେ। କିଛି ସ୍ଥାନରେ, ପେଟ୍ରୋଲ ଲିଟର ପିଛା ୫.୩୦ ଟଙ୍କାରେ ପହଞ୍ଚିଛି। ଅଶୋଧିତ ତୈଳ ମୂଲ୍ୟ ବୃଦ୍ଧି ହେବା ପରେ ମଧ୍ୟ, ଭାରତରେ ପେଟ୍ରୋଲ୍ ଏବଂ ଡିଜେଲ୍ ମୂଲ୍ୟ ସ୍ଥିର ରହିଛି । ହେଲେ ଏଥିପାଇଁ ତୈଳ ବିପଣନ କମ୍ପାନୀ କ୍ଷତି ମଧ୍ୟ ସହୁଛନ୍ତି । ତେଣୁ ନାୟାରା ଏନର୍ଜି ଭଳି ଅନ୍ୟ କମ୍ପାନୀ ମଧ୍ୟ ତୈଳ ବୃଦ୍ଧି କରିବାକୁ ନିଷ୍ପତ୍ତି ନେଇପାରନ୍ତି ବୋଲି ଚର୍ଚ୍ଚା ହେଉଛି । ଏହା ପୂର୍ବରୁ ପ୍ରିମିୟମ ପେଟ୍ରୋଲ୍ ଦାମ ବୃଦ୍ଧି କରିଥିଲେ କମ୍ପାନୀ ।
୮୮% ଆମଦାନୀ ଉପରେ ନିର୍ଭରଶୀଳ
ଡିଜେଲ ହେଉଛି ନିୟନ୍ତ୍ରଣମୁକ୍ତ ଉତ୍ପାଦ, ଯାହାର ମୂଲ୍ୟ ତୈଳ ବିପଣନ କମ୍ପାନୀଗୁଡ଼ିକ ଦ୍ୱାରା ସ୍ୱାଧୀନ ଭାବରେ ନିର୍ଣ୍ଣୟ କରାଯାଏ। ଭାରତ ଏହାର ଅଶୋଧିତ ତୈଳ ଆବଶ୍ୟକତାର ୮୮ ପ୍ରତିଶତ ଏବଂ ପ୍ରାକୃତିକ ଗ୍ୟାସ ଆବଶ୍ୟକତାର ପ୍ରାୟ ଅଧା ଆମଦାନୀ କରେ। ଏହି ଆମଦାନୀ ମୁଖ୍ୟତଃ ହର୍ମୁଜ୍ ପ୍ରଣାଳୀ ଦେଇ ହୋଇଥାଏ। କିନ୍ତୁ ଇରାନ୍ ଏହି ହର୍ମୁଜ୍ ପ୍ରଣାଳୀକୁ ପ୍ରାୟ ବନ୍ଦ କରିଦେବା ପରେ ସ୍ଥିତି ଅସମ୍ଭାଳ ହୋଇଛି। ସେପଟେ ୟୁକ୍ରେନ୍ ଉପରେ ରୁଷର ଆକ୍ରମଣ ପରେ ଜୁନ୍ ୨୦୨୨ରେ ପ୍ରତି ବ୍ୟାରେଲ ମୂଲ୍ୟ ୧୧୯ ଡଲାରକୁ ବୃଦ୍ଧି ପାଇଥିଲା। ସେହି ବର୍ଷ ତୈଳ କମ୍ପାନୀଗୁଡ଼ିକ ସାମାନ୍ୟ ଲାଭ କରିଥିଲେ । କିନ୍ତୁ ଆର୍ଥିକ ବର୍ଷ ୨୦୨୪ରେ ସେମାନେ ₹୮୧,୦୦୦ କୋଟିର ରେକର୍ଡ ଲାଭ କରିଥିଲେ, ଯାହା ପୂର୍ବ ମାର୍ଜିନ୍ କ୍ଷତିକୁ ପୂରଣ କରିବାରେ ସାହାଯ୍ୟ କରିଥିଲା।
