ଭୁବନେଶ୍ବର ୧୨।୧୦: ବିଜେପିରେ ଜୟ ଢୋଲକିଆ ମିଶିବା ପରେ ଉତ୍ସାହିତ ପଦ୍ମ ଶିବିର । ଏହା ଭିତରେ ଚୂଡ଼ାନ୍ତ ପ୍ରାର୍ଥୀ ଚୟନ ପାଇଁ ବସିଛି ବିଜେପି କୋର୍ କମିଟି ବୈଠକ । ଏଥିରେ ସମ୍ଭାବ୍ୟ ପ୍ରାର୍ଥୀ ତାଲିକା ପ୍ରସ୍ତୁତ କରି ସଂସଦୀୟ ବୋର୍ଡକୁ ଦଳ ପଠାଇବ ଏବଂ ରେସ୍ରେ ଜୟ ହିଁ ଆଗରେ ଅଛନ୍ତି । ସେପଟେ ସମସ୍ତଙ୍କ ନଜର ବସନ୍ତ ପଣ୍ଡାଙ୍କ ଉପରେ ଥିବାବେଳେ ଦଳ ଯାହାକୁ ପ୍ରାର୍ଥୀ କଲେ ମଧ୍ୟ ସେ ଦଳ ସହ ରହିବେ ବୋଲି କହିଛନ୍ତି ବରିଷ୍ଠ ବିଜେପି ନେତା ବସନ୍ତ ପଣ୍ଡା ।
ବିଜେପି କୋର୍ କମିଟି ବୈଠକରେ ନୂଆପଡ଼ା ଉପନିର୍ବାଚନ ପାଇଁ ପ୍ରସ୍ତୁତ ହେଲା ରଣନୀତି । ପୂର୍ବତନ ସଭାପତି, ମହମନ୍ତ୍ରୀ, ମନ୍ତ୍ରୀ ଏବଂ ବିଧାୟକ ମାନଙ୍କୁ ଟାସ୍କ ଦିଆଯାଇଛି । ସହମତି ଭିତ୍ତିରେ ପ୍ରାର୍ଥୀ ଦିଆଯିବ ଏବଂ ସେ କେମିତି ଜିତିବେ ସେଥିପାଇଁ ସମସ୍ତେ କର୍ଯ୍ୟ କରିବେ । ପ୍ରାର୍ଥୀ କିଏ ହେବ ତାହା ସଂସଦୀୟ ବୋର୍ଡ ସ୍ଥିର କରିବ । ୧୩ ତାରିଖରେ ନାମାଙ୍କନ ପାତ୍ର ଦାଖଲ ହେବାକୁ ଥିବାରୁ ଖୁବ୍ ଶୀଘ୍ର ପ୍ରାର୍ଥୀଙ୍କ ନାଁ ଘୋଷଣା ହେବ । ମୋଟାମୋଟି ଭାବେ ନୂଆପଡ଼ା ଉପନିର୍ବାଚନ ପ୍ରାର୍ଥୀ ଏବଂ ରଣନୀତି ନେଇ ଆଜିର କୋର୍ କମିଟି ବୈଠକରେ ଆଲୋଚନା ହୋଇଥିବା ବରିଷ୍ଠ ବିଜେପି ନେତା ବସନ୍ତ ପଣ୍ଡା କହିଛନ୍ତି ।
ସେପଟେ ଜୟ ବିଗାଡ଼ି ଦେଲେ ବିଜେଡି ବିଜୟ ଗଣିତ । ପ୍ରାର୍ଥୀ ଖୋଜିବାକୁ ନାକେଦମ୍ ହେଲାଣି ଦଳ । ସୋମବାର ନୂଆପଡା ଉପନିର୍ବାଚନ ପାଇଁ ବିଧିବଦ୍ଧ ବିଜ୍ଞପ୍ତି ପ୍ରକାଶ ପାଇବ । ହେଲେ ଜୟ ଢୋଲକିଆ ବିଜେପିରେ ମିଶିବା ପରେ ବିଜେଡିର ଅଡୁଆ ବଢିଯାଇଛି । ଏହାର ସମାଧାନ ପାଇଁ ରବିବାର ସନ୍ଧ୍ୟାରେ ରାଜ୍ୟ ସ୍ତରୀୟ ନେତାଙ୍କ ଏକ ଟିମ୍ ନୂଆପଡା ଯାଇଛନ୍ତି । ସୋମବାର ୧୧ଟାରେ ନିର୍ବାଚନ ଦାୟିତ୍ବରେ ଥିବା ୩ କମିଟି ଓ ପରେ ସ୍ଥାନୀୟ ନେତୃତ୍ବଙ୍କ ସହ ଆଲୋଚନା କରି ପ୍ରାର୍ଥୀ ସର୍ଟଲିଷ୍ଟ କରିବେ । ପରେ ଏହି ତାଲିକାରୁ ଚୂଡ଼ୀନ୍ତ ପ୍ରାର୍ଥୀ ଘୋଷଣା କରିବେ ସଭାପତି । ତେବେ ପ୍ରାର୍ଥୀ ରେସ୍ରେ ଅବନୀ ଯୋଶୀ, ମନୋଜ ମିଶ୍ର ଓ ଭାନୁ ମିଶ୍ର ଆଗରେ । ଏହାସହ ବିଜେପି କାହାକୁ ପ୍ରାର୍ଥୀ କରୁଛି ଦଳ ତାଙ୍କ ଉପରେ ମଧ୍ୟ ନଜର ରଖିଛି । ତେବେ ବିଜୟ ନେଇ ଦମ୍ଭ ଦେଖାଇଛନ୍ତି ବିଜେଡି ବିଧାୟକ ।
