ଦୁଇ ଦିନିଆ ଜିଲ୍ଲାପାଳ ଓ ଏସପି ସମ୍ମିଳନୀ : ୬ ମାସ ଭିତରେ ରାଜସ୍ବ ବିଭାଗରେ ପଡ଼ିଥିବା ସବୁ କେସ୍‌ର ହେବ ସମାଧାନ

ଭୁବନେଶ୍ବର ୧୮।୧୧: ଆରମ୍ଭ ହେଲା ଦୁଇ ଦିନିଆ ଜିଲ୍ଲାପାଳ ଓ ଏସପି ସମ୍ମିଳନୀ । ଲୋକସେବା ଭବନରେ ଆୟୋଜିତ ଏହି ସମ୍ମିଳନୀରେ ରାଜ୍ୟରେ କାର୍ଯ୍ୟକାରୀ ହେଉଥିବା ସମସ୍ତ ସରକାରୀ ଯୋଜନା ଏବଂ ଆଇନ ଶୃଙ୍ଖଳା ପରିସ୍ଥିତି ନିୟନ୍ତ୍ରଣ ନେଇ ଆଲୋଚନା କରାଯିବ । ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ସମ୍ମିଳନୀରେ ଉପସ୍ଥିତ ରହି ସମସ୍ତ ଜିଲ୍ଲାର ଜିଲ୍ଲାପାଳ ଓ ଏସପି ମାନଙ୍କୁ ମାର୍ଗଦର୍ଶନ କରାଇବେ ।

ଏହି ଅବସରରେ ରାଜସ୍ୱ ମନ୍ତ୍ରୀ ସୁରେଶ ପୂଜାରୀ କହିଛନ୍ତି, ୬ ମାସ ଭିତରେ ରାଜସ୍ବ ବିଭାଗରେ ପଡ଼ିଥିବା ସବୁ କେସର ସମାଧାନ ହେବ । ଏଥିପାଇଁ ବିଭାଗ ଗୁଡିକୁ ନିର୍ଦ୍ଦେଶ ଦିଆଯାଇଛି । ୫ ବର୍ଷରେ ଓଡ଼ିଶାରେ ରହିବେନି ଭୂମିହୀନ । ଆମ ସରକାର ୨୪ ହଜାର ଶିକ୍ଷାନୁଷ୍ଠାନକୁ ପଟ୍ଟା ଦେବାରେ ସଫଳ ହୋଇଛନ୍ତି । ୨୫ ହଜାର ଭୂମିହୀନକୁ ଜମି ଦିଆଯାଇଛି । ଏହାସହ ଜନଗଣନା ପୂର୍ବରୁ ସମସ୍ତ ରାଜସ୍ବ ଗ୍ରାମ ଆବେଦନକୁ ସୁପାରିଶ କରିବାକୁ ଅଧିକାରୀଙ୍କୁ ନିର୍ଦ୍ଦେଶ ଦେଲେ ରାଜସ୍ବ ମନ୍ତ୍ରୀ । ଏହାସହ ରାଜସ୍ବ ମନ୍ତ୍ରୀ କହିଛନ୍ତି ଲୋକଟିଏ ଜମି ପାଇଁ ଆମ ପାଖକୁ ନଆସୁ । ଆମେ ସର୍ଭେ କରି ସେମାନଙ୍କୁ ସେବା ଦେବାକୁ ଅଧିକାରୀଙ୍କୁ କହିଛୁ ବୋଲି ସୁରେଶ ପୂଜାରୀ କହିଛନ୍ତି ।