ନୂଆଦିଲ୍ଲୀ: ଡୋନାଲ୍ଡ ଟ୍ରମ୍ପଙ୍କ ଶୁଳ୍କ ଚାପ ସତ୍ତ୍ୱେ ବି ମୋବାଇଲ୍ କମ୍ପାନୀଗୁଡ଼ିକ ଭାରତରେ ନିଜର ଉତ୍ପାଦନ ବୃଦ୍ଧି କରିଛନ୍ତି। ଆଉ ରେକର୍ଡ ସଂଖ୍ୟକ ରପ୍ତାନୀ ବି କରିଛନ୍ତି। ଏଥିରେ ସର୍ବାଧିକ ଭାଗ ରହିଛି ଆମେରିକୀୟ କମ୍ପାନୀ ଆପଲର। ଏହି କମ୍ପାନୀ ଆମେରିକାକୁ ସର୍ବାଧିକ ସ୍ମାର୍ଟଫୋନ ରପ୍ତାନୀ କରିଛି।
ଇଣ୍ଡିଆନ୍ ସେଲ୍ୟୁଲାର୍ ଆଣ୍ଡ୍ ଇଲେକ୍ଟ୍ରୋନିକ୍ସ ଆସୋସିଏସନ୍ (ICEA) ଦ୍ୱାରା ସଂକଳିତ ତଥ୍ୟ ଅନୁଯାୟୀ, ଏପ୍ରିଲ୍ ଏବଂ ଅଗଷ୍ଟ ୨୦୨୫ ମଧ୍ୟରେ ଆମେରିକାକୁ ସ୍ମାର୍ଟଫୋନ୍ ରପ୍ତାନୀ ୧୯୦% ବୃଦ୍ଧି ପାଇ ୮.୪ ବିଲିୟନ ଡଲାର ହୋଇଛି। ଯାହା ଗତ ବର୍ଷର ସମାନ ସମୟରେ ୨.୯ ବିଲିୟନ ଡଲାର ଥିଲା। ସମଗ୍ର ଆର୍ଥିକ ବର୍ଷ ୨୫ରେ ଆମେରିକାକୁ ପଠାଯାଇଥିବା ମୋଟ ୧୦.୬ ବିଲିୟନ ଡଲାରର ପ୍ରାୟ ୮୦% କେବଳ ଏହି ପାଞ୍ଚ ମାସରେ ହୋଇଛି।
ଏହି ଅଭିବୃଦ୍ଧିର ପ୍ରମୁଖ ଅଂଶ ଆପଲ୍ ରପ୍ତାନୀ ବୃଦ୍ଧି ଯୋଗୁ ହୋଇଛି। ବର୍ଷର ପ୍ରାରମ୍ଭିକ ମାସଗୁଡ଼ିକରେ, ୱାଶିଂଟନରେ ସମ୍ଭାବ୍ୟ ଶୁଳ୍କ ଉପରେ ଆଲୋଚନା ଜୋର ଧରି ଥିବା ବେଳେ ଆପଲ କମ୍ପାନୀ ଭାରତରୁ ରପ୍ତାନୀ ତ୍ୱରାନ୍ୱିତ କରିଥିଲା। ତାଇୱାନିଜ୍ କଣ୍ଟ୍ରାକ୍ଟ ନିର୍ମାତା ଫକ୍ସକନ୍ ଏବଂ ଟାଟା ଗ୍ରୁପ୍ ଦ୍ୱାରା ପରିଚାଳିତ ଉତ୍ପାଦନ ୟୁନିଟ୍ ବର୍ଦ୍ଧିତ ଚାହିଦା ପୂରଣ କରିବା ପାଇଁ ଉତ୍ପାଦନ ବୃଦ୍ଧି କରିଥିଲେ।
ଆମେରିକାରେ ବିକ୍ରି ହେଉଥିବା ଅଧିକାଂଶ ଫୋନ ଭାରତରେ ତିଆି ହେଉଛନ୍ତି ବୋଲି ଗତ ଜୁଲାଇ ମାସରେ ଆପଲର ମୁଖ୍ୟ କାର୍ଯ୍ୟନିର୍ବାହୀ ଟିମ୍ କୁକ୍ ସୂଚନା ଦେଇଥିଲେ। ସାମଗ୍ରିକ ଭାବରେ, ଭାରତ ଆର୍ଥିକ ବର୍ଷ ୨୦୨୬ ର ପ୍ରଥମ ପାଞ୍ଚ ମାସରେ $୧୧.୭ ବିଲିୟନ (ପ୍ରାୟ ୧ ଲକ୍ଷ କୋଟି ଟଙ୍କା) ମୂଲ୍ୟର ସ୍ମାର୍ଟଫୋନ୍ ରପ୍ତାନି କରିଛି, ଯାହା ଗତ ବର୍ଷର ସମାନ ସମୟ ମଧ୍ୟରେ $୭.୬ ବିଲିୟନରୁ ୫୫% ଅଧିକ। ସବୁଠାରୁ ବଡ଼ କଥା ହେଲା ଆମେରିକାକୁ ଅଧିକାଂଶ ରପ୍ତାନୀ କରାଯାଇଛି।
