ନୂଆଦିଲ୍ଲୀ: ଗାଜାକୁ ଧ୍ୱଂସସ୍ତୁପ ପରିଣତ କରିଦେଇଛି ଇସ୍ରାଏଲ। ଯୁଆଡେ ଦେଖିଲେ ମୃତ୍ୟୁର ଭୟ। ଏହାରି ଭିତରେ ବଡ଼ ଘୋଷଣା କରିଛି ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ କାର୍ଯ୍ୟାଳୟ। ସେ କହିଛନ୍ତି ଯେ ଗାଜା ସହର ଦଖଲ କରିବା ଯୋଜନାକୁ ମଞ୍ଜୁରୀ ଦେଇଛି ଇସ୍ରାଏଲର ସୁରକ୍ଷା କ୍ୟାବିନେଟ୍ । ଏହି ନିଷ୍ପତ୍ତି ହମାସର ଆକ୍ରମଣର ଜବାବରେ ନିଆଯାଇଛି। ହମାସ ଏବଂ ଇସ୍ରାଏଲ ମଧ୍ୟରେ ୨୨ ମାସ ଧରି ଯୁଦ୍ଧ ଚାଲିଛି।
ପିଏମଓ ଏକ ବିବୃତ୍ତିରେ କହିଛି, ‘ହମାସର ପରାଜୟ ପାଇଁ ପ୍ରଧାନମନ୍ତ୍ରୀଙ୍କ ପ୍ରସ୍ତାବକୁ ସୁରକ୍ଷା କ୍ୟାବିନେଟ୍ ଅନୁମୋଦନ କରିଛି। ଏହି ଯୁଦ୍ଧରେ ଏପର୍ଯ୍ୟନ୍ତ ହଜାର ହଜାର ପାଲେଷ୍ଟାଇନୀ ନିହତ ହୋଇଛନ୍ତି, ଗାଜର ଏକ ବଡ଼ ଅଂଶ ନଷ୍ଟ ହୋଇଯାଇଛି ଏବଂ ପ୍ରାୟ ୨୦ ଲକ୍ଷ ପାଲେଷ୍ଟାଇନୀଙ୍କ ଅଞ୍ଚଳ ଦୁର୍ଭିକ୍ଷ ଆଡ଼କୁ ଠେଲି ଦିଆଯାଇଛି। ସୁରକ୍ଷା କ୍ୟାବିନେଟ୍ ବୈଠକ ପୂର୍ବରୁ ନେତାନ୍ୟାହୁ କହିଥିଲେ ଯେ ଇସ୍ରାଏଲ ସମଗ୍ର ଅଞ୍ଚଳର ନିୟନ୍ତ୍ରଣ ଫେରାଇ ନେବାକୁ ଏବଂ ଏହାକୁ ହମାସ ବିରୋଧୀ ବନ୍ଧୁ ଆରବ ଶକ୍ତିକୁ ହସ୍ତାନ୍ତର କରିବାକୁ ଯୋଜନା କରୁଛି।
ଜଣେ ଇସ୍ରାଏଲୀ ଅଧିକାରୀ ପୂର୍ବରୁ କହିଥିଲେ ଯେ ସୁରକ୍ଷା ପରିଷଦ ଗାଜାର ସମସ୍ତ କିମ୍ବା କିଛି ଅଂଶ ଦଖଲ କରିବା ଯୋଜନା ଉପରେ ଆଲୋଚନା କରିବ ଯାହା ଏପର୍ଯ୍ୟନ୍ତ ଇସ୍ରାଏଲୀ ନିୟନ୍ତ୍ରଣରେ ନାହିଁ। ଯାହା ଅନୁମୋଦନ ମିଳିଲେ, ହମାସ ଉପରେ ଚାପ ବୃଦ୍ଧି କରିବା ପାଇଁ ଏହାକୁ ଧୀରେ ଧୀରେ କାର୍ଯ୍ୟକାରୀ କରାଯିବ। ସୁରକ୍ଷା କ୍ୟାବିନେଟ୍ ବୈଠକରେ ନେତାନ୍ୟାହୁ କହିଥିଲେ ଯେ ଆମର ସୁରକ୍ଷା ସୁନିଶ୍ଚିତ କରିବା ପାଇଁ, ଆମେ ସେଠାରୁ ହମାସକୁ ହଟାଇବାକୁ ଚାହୁଁଛୁ ଯାହା ଦ୍ୱାରା ଲୋକଙ୍କୁ ଗାଜାରୁ ମୁକ୍ତ ହୋଇପାରିବ। ଆମେ ଏହାକୁ ଆମ ପାଖରେ ରଖିବାକୁ ଚାହୁଁନାହୁଁ। ଆମେ ଏକ ସୁରକ୍ଷା ବୃତ୍ତ ସୃଷ୍ଟି କରିବାକୁ ଚାହୁଁଛୁ। ଆମେ ଏହାକୁ ଆରବ ସେନାକୁ ହସ୍ତାନ୍ତର କରିବାକୁ ଚାହୁଁଛୁ ଯେଉଁମାନେ ଆମ ପାଇଁ କୌଣସି ବିପଦ ବିନା ଏହାକୁ ସଠିକ୍ ଭାବରେ ଶାସନ କରିବେ। ଗାଜାର ଲୋକମାନଙ୍କୁ ଏକ ଭଲ ଜୀବନ ପ୍ରଦାନ କରିବେ।’
ଇସ୍ରାଏଲ ଗାଜା ସହର ଉପରେ ପ୍ରବଳ ବୋମାମାଡ଼ କରିଛି। ଏତେ ପରିମାଣର ଗୁଳିଗୋଳା ନିକ୍ଷେପ କରାଯାଇଛି ଯେ ଗାଜାରେ ବିନାଶ ଏବଂ ଧ୍ୱଂସ ବ୍ୟତୀତ ଆଉ କିଛି ଦେଖାଯାଉନାହିଁ। ଲକ୍ଷ ଲକ୍ଷ ଲୋକ ବିସ୍ଥାପିତ ହେଉଛନ୍ତି। ସ୍ଥାନୀୟ ହସ୍ପିଟାଲ ଅନୁଯାୟୀ, ଗୁରୁବାର ଦକ୍ଷିଣ ଗାଜାରେ ଇସ୍ରାଏଲୀ ବିମାନ ଆକ୍ରମଣ ଏବଂ ଗୁଳିଚାଳନା ଯୋଗୁଁ ଅତି କମରେ ୪୨ ଜଣ ପାଲେଷ୍ଟାଇନୀଙ୍କ ମୃତ୍ୟୁ ଘଟିଛି।
