ଆନ୍ନାମଲାଇଙ୍କ ନୂଆ ଆନ୍ଦୋଳନ, ମାତ୍ର କେଇ ଘଣ୍ଟାରେ ଯୋଡ଼ିହେଲେ ୧୫ ଲକ୍ଷ ଲୋକ

ଚେନ୍ନାଇ: ଭାରତୀୟ ଜନତା ପାର୍ଟି (BJP)ରୁ ଇସ୍ତଫା ଦେବାର ମାତ୍ର କିଛି ଦିନ ମଧ୍ୟରେ କେ. ଆନ୍ନାମଲାଇ ତାମିଲନାଡୁ ରାଜନୀତିରେ ଏକ ବଡ଼ ବିପ୍ଳବ ସୃଷ୍ଟି କରିଛନ୍ତି। ସେ ରାଜ୍ୟରେ ଏକ ସମ୍ପୂର୍ଣ୍ଣ ନୂତନ ରାଜନୈତିକ ଆନ୍ଦୋଳନର ଶୁଭାରମ୍ଭ କରିଛନ୍ତି, ଯାହାର ନାମ ରଖାଯାଇଛି ‘ୱି ଦି ଲିଡର’ (We The Leader)।

ଏହି ଆନ୍ଦୋଳନ ଭାରତର ପୂର୍ବତନ ରାଷ୍ଟ୍ରପତି ତଥା ମିସାଇଲ ମ୍ୟାନ ଡକ୍ଟର ଏପିଜେ ଅବଦୁଲ କଲାମଙ୍କ ବିଚାରଧାରା ଉପରେ ଆଧାରିତ। ଏହି ଅଭିଯାନ ଆରମ୍ଭ ହେବାର ମାତ୍ର କେଇ ଘଣ୍ଟା ମଧ୍ୟରେ ୧୫ ଲକ୍ଷରୁ ଅଧିକ ଲୋକ ଏଥିରେ ସାମିଲ ହୋଇ ଏକ ନୂଆ ରେକର୍ଡ ସୃଷ୍ଟି କରିଛନ୍ତି। ଏହା ସହିତ ଆନ୍ନାମଲାଇ କୋଏମ୍ବାଟୁରଠାରେ ‘କଲାମ ସେଣ୍ଟର ଫର ଏଥିକ୍ସ ଆଣ୍ଡ ପଲିଟିକ୍ସ’ ନାମକ ଏକ ପ୍ରଶିକ୍ଷଣ ଓ ଗବେଷଣା ପ୍ରତିଷ୍ଠାନ ସ୍ଥାପନ କରିବାକୁ ମଧ୍ୟ ଘୋଷଣା କରିଛନ୍ତି।

ବିଜେପି ଛାଡ଼ିବା ପରେ ନୂଆ ରଣନୀତି

ଗତ ଜୁନ୍ ୫ ତାରିଖରେ ଆନ୍ନାମଲାଇ ଆନୁଷ୍ଠାନିକ ଭାବେ ବିଜେପିରୁ ବିଦାୟ ନେଇଥିଲେ ଏବଂ ଖୁବ୍ ଶୀଘ୍ର ଏକ ନୂଆ ରାଜନୈତିକ ପଦକ୍ଷେପ ନେବେ ବୋଲି ସଙ୍କେତ ଦେଇଥିଲେ। ସେ ବୈଜ୍ଞାନିକ ତଥା ପୂର୍ବତନ ରାଷ୍ଟ୍ରପତି ଏପିଜେ ଅବଦୁଲ କଲାମଙ୍କୁ ଦେଶପ୍ରେମ, ତ୍ୟାଗ, ଏକତା, ନିଷ୍ଠା ଓ ଶ୍ରେଷ୍ଠତାର ପ୍ରତୀକ ଭାବେ ବର୍ଣ୍ଣନା କରିଛନ୍ତି। ଜଣେ ଗର୍ବିତ ତାମିଲ ଏବଂ ରାଷ୍ଟ୍ରବାଦୀ ନେତା ଭାବେ କଲାମଙ୍କ ନୀତିକୁ ଆଧାର କରି ଆନ୍ନାମଲାଇ ତାମିଲନାଡୁରେ ଏକ ନୂଆ ରାଜନୈତିକ ଅଧ୍ୟାୟର ସୂତ୍ରପାତ କରିଛନ୍ତି।

ବିଜେପି ସହ ୬ ବର୍ଷର ସମ୍ପର୍କ ଛିନ୍ନ

ଆନ୍ନାମଲାଇ ବିଗତ ୬ ବର୍ଷ ଧରି ବିଜେପି ସହ ଜଡ଼ିତ ଥିଲେ ଏବଂ ଦକ୍ଷିଣ ଭାରତରେ ଦଳର ଏକ ପ୍ରମୁଖ ତଥା ପ୍ରଭାବଶାଳୀ ଚେହେରା ଭାବେ ଉଭା ହୋଇଥିଲେ। ତେବେ ବର୍ତ୍ତମାନ ସମୟରେ ତାମିଲନାଡୁରେ ଟିଭିକେ (TVK) ଦଳ କ୍ଷମତାକୁ ଆସିବା ପରେ ସେ ବିଜେପିରୁ ଇସ୍ତଫା ଦେଇଛନ୍ତି।ଏହି ନୂତନ ଆନ୍ଦୋଳନ ମାଧ୍ୟମରେ ଆଗାମୀ ଦିନରେ ଏକ ନୂଆ ରାଜନୈତିକ ଦଳ ଗଠନ କରାଯିବ। ୨୦୩୧ ତାମିଲନାଡୁ ବିଧାନସଭା ନିର୍ବାଚନରେ ସମ୍ପୂର୍ଣ୍ଣ ଶକ୍ତିର ସହ ପ୍ରତିଦ୍ୱନ୍ଦ୍ୱିତା କରିବାକୁ ଆନ୍ନାମଲାଇ ଲକ୍ଷ୍ୟ ରଖିଥିବା କୁହାଯାଉଛି ।

ଇଣ୍ଟରନେଟରେ ଜନସାଧାରଣଙ୍କୁ ସମ୍ବୋଧିତ କରି ସେ ନିଜ ଜୀବନର ସଂଘର୍ଷ, ରାଜନୈତିକ ଅଭିଜ୍ଞତା ଏବଂ ଭବିଷ୍ୟତର ରଣନୀତି ବିଷୟରେ ଆଲୋଚନା କରିଛନ୍ତି। ୪୨ ବର୍ଷୀୟ ଏହି ପୂର୍ବତନ ଆଇପିଏସ୍ (IPS) ଅଧିକାରୀ ସ୍ପଷ୍ଟ କରିଛନ୍ତି ଯେ, ତାଙ୍କର ବିଜେପି ଛାଡ଼ିବା ନିଷ୍ପତ୍ତି ହଠାତ୍ ନିଆଯାଇ ନାହିଁ। ଏହା ଏକ ଦୀର୍ଘଦିନର ଚିନ୍ତାଧାରାର ପରିଣାମ ଏବଂ ଏହି ବିଷୟରେ ସେ ବହୁ ପୂର୍ବରୁ ଦଳର କେନ୍ଦ୍ରୀୟ ନେତୃତ୍ୱକୁ ଅବଗତ କରାଇ ସାରିଥିଲେ।